Sun. Jun 20th, 2021

प्रेमासाठी ‘ताज महाल’, तरुण पोहचला तुरुंगात

आपलं ज्या मुलीवर प्रेम आहे त्या मुलीला लग्नाची मागणी घालण्यासाठी ताज महालची प्रतिकृती वापरणे एका 22 वर्षीय तरुणाला चांगलेच महाग पडले आहे. हा तरुण तुरुंगात पोहोचला आहे. या तरुणाचे शेजारी राहणाऱ्या मुलीवर प्रेम होते. तो बऱ्याच दिवसांपासून तिचा पाठलाग करत होता.

या तरुणाने सोमवारी रात्री ताज महालची प्रतिकृती गिफ्ट पॅक करुन तो बॉक्स मुलीच्या गच्चीवर फेकला. मात्र दुर्देवाने तो गिफ्टचा बॉक्स मुलीच्या वडिलांच्या डोक्यावर जाऊन आदळला. त्यावेळी ते गच्चीवर भोजन करत होते. अचानक घरात येऊन पडलेल्या या ताज महालच्या प्रतिकृतीवरुन बराच गदारोळ झाला.

त्यानंतर या घटनेची तक्रार पोलिसात करण्यात आली. 20 वर्षीय तरुणी आणि तिचे कुटुंबिय ताज महालची प्रतिकृती घेऊन पोलीस स्टेशनमध्ये गेले व युवकाविरोधात तक्रार नोंदवली. गेल्या काही महिन्यांपासून आरोपी युवक आपल्या मागे लागला होता. मी जेव्हा कधीही घराच्या बाहेर पाऊल ठेवायची तेव्हा तो आपल्या मागे यायचा असे या तरुणीने पोलिसांना सांगितले.

ताज महालची प्रतिकृती स्वीकारुन मी त्याच्या प्रेमाला मान्यता द्यावी यासाठी तो युवक आपल्या मागे लागला होता. पण मी कधीही ती प्रतिकृती स्वीकारली नाही असे तक्रारदार तरुणीने सांगितले. गिफ्ट नाकारले तर गंभीर परिणाम भोगावे लागतील अशी धमकी सुद्धा आरोपीच्या भावाकडून देण्यात आली होती.

Leave a Reply

Your email address will not be published. Required fields are marked *