Actor Pankaj Tripathi's Mother Passes Away : बॉलिवूडमधील अत्यंत गुणी आणि साधे अभिनेते पंकज त्रिपाठी (Pankaj Tripathi) यांच्यावर सध्या दुःखाचा डोंगर कोसळला आहे. त्यांची आई, श्रीमती हेमवंती देवी यांचे 89 व्या वर्षी निधन झाले आहे. पंकज त्रिपाठी यांच्याकडून जारी करण्यात आलेल्या एका निवेदनाद्वारे ही दुःखद बातमी समोर आली आहे. या निवेदनात म्हटले आहे की, श्रीमती हेमवंती देवी यांनी शुक्रवारी बिहारमधील गोपालगंज जिल्ह्यातील बेलसंड येथील त्यांच्या राहत्या घरी, कुटुंबाच्या उपस्थितीत, आपल्या खाटेवरच शांतपणे अखेरचा श्वास घेतला. त्या काही काळापासून आजारी होत्या.
आईसोबत होते पंकज त्रिपाठी
या कठीण क्षणी अभिनेता पंकज त्रिपाठी स्वतः त्यांच्या आईसोबत उपस्थित होते. त्यांच्या आईचे अंत्यसंस्कार शनिवारी बेलसंड येथे कुटुंबीय, नातेवाईक आणि काही जवळच्या मित्रांच्या उपस्थितीत पार पडले.
त्रिपाठी कुटुंब सध्या या शोकात बुडाले असून, त्यांनी चाहत्यांना विनंती केली आहे की, "कृपया श्रीमती हेमवंती देवी यांच्या आत्म्याच्या शांतीसाठी प्रार्थना करा आणि या शोककाळात कुटुंबाच्या खासगी जीवनाचा आदर करा." पंकज त्रिपाठी यांचे आपल्या आईशी अतिशय जिव्हाळ्याचे नाते होते. त्यांनी अनेकदा मुलाखतींमध्ये सांगितले आहे की, त्यांच्या आयुष्यातील संस्कार, संयम आणि साधेपणा हा त्यांना आईकडूनच मिळाला. त्यांच्या निधनामुळे संपूर्ण चाहतावर्ग आणि चित्रपटसृष्टीत हळहळ व्यक्त होत आहे.
हेही वाचा - Actor Dharmendra Hospitalised : ज्येष्ठ अभिनेते धर्मेंद्र रुग्णालयात दाखल; श्वास घेण्यासाठी त्रास होत असल्याने ICU मध्ये उपचार सुरू
दोन वर्षांपूर्वीच वडिलांचे निधन
विशेष म्हणजे, या घटनेच्या केवळ दोन वर्षांपूर्वी, 21 ऑगस्ट 2023 रोजी पंकज त्रिपाठी यांचे वडील पंडित बनारस त्रिपाठी यांचेही त्यांच्या मूळ गावी निधन झाले होते. त्यावेळी पंकज त्रिपाठी मुंबईत 'ओएमजी 2' चित्रपटाच्या प्रमोशनमध्ये व्यस्त होते, पण बातमी मिळताच ते अंत्यसंस्कारासाठी तातडीने बिहारला परतले होते.
संघर्षातून मिळालेले यश
पंकज त्रिपाठी यांनी आपल्या वडिलांकडूनच साधेपणा आणि कष्टाची शिस्त शिकली होती. त्यांचे वडील पुजारी आणि शेतकरी होते. पंकजही लहानपणी शेतीकामात त्यांना मदत करत असत. पुढे पाटणा येथील नाट्यमहाविद्यालयात शिक्षण घेत असताना त्यांना अभिनयाची आवड निर्माण झाली. त्यांनी नॅशनल स्कूल ऑफ ड्रामा (NSD) मधून पदवी घेऊन आपल्या अभिनयाच्या आवडीला करिअरमध्ये रूपांतरित करण्यासाठी मुंबई गाठली.
मुंबईत सुरुवातीला संघर्षाचा काळ होता, पण अनुराग कश्यप दिग्दर्शित 'गँग्स ऑफ वासेपूर' या चित्रपटातून त्यांना मोठी ओळख मिळाली. त्यांच्या प्रामाणिक अभिनय, सहज संवादशैली आणि जमिनीशी जोडलेल्या व्यक्तिरेखांमुळे पंकज त्रिपाठी हे नाव आज बॉलिवूडमध्ये विश्वासार्ह ठरले आहे.
महत्वाचे चित्रपट आणि सन्मान
पंकज त्रिपाठी यांनी '83', 'मसान', 'न्यूटन', 'स्त्री', 'मिर्झापूर', 'मिमी' आणि 'ओएमजी 2' अशा अनेक लोकप्रिय चित्रपट आणि वेब सिरीजमध्ये काम केले आहे. त्यांच्या अप्रतिम अभिनयासाठी, 2023 मध्ये त्यांना 'मिमी' चित्रपटासाठी सर्वोत्कृष्ट सहाय्यक अभिनेत्याचा राष्ट्रीय पुरस्कार मिळाला, जो त्यांच्या कारकिर्दीतील एक महत्त्वाचा टप्पा आहे.
हेही वाचा - Raj Thackeray on Punha Shivaji raje Bhosale: राज ठाकरेंची 'पुन्हा शिवाजीराजे भोसले' चित्रपटावर केलेली पोस्ट चर्चेत