Influencer Pooja Gawas: सोशल मीडियावर ‘रेड सॉईल स्टोरीज’ या लोकप्रिय चॅनेलमुळे घराघरात पोहोचलेली पूजा गवस सध्या आयुष्यातील अत्यंत कठीण काळातून जात आहे. काही महिन्यांपूर्वी पतीच्या निधनाचा मोठा धक्का सहन केलेल्या पूजावर आता आणखी एक आघात झाला आहे. तिच्या वडिलांचे नुकतेच निधन झाले असून या दुहेरी दुःखामुळे तिच्या आयुष्यात वेदनेची छाया पसरली आहे.
गेल्या वर्षी ऑगस्ट महिन्यात पूजाने तिच्या पती शिरीषला गमावले. मेंदूशी संबंधित गंभीर आजाराशी झुंज देत असताना त्यांची प्रकृती खालावत गेली आणि अखेर त्यांनी जगाचा निरोप घेतला. पतीच्या निधनानंतर पूजा खचली नाही. दोघांनी मिळून पाहिलेली स्वप्ने आणि उभी केलेली कामाची दुनिया पुढे नेण्याचा निर्धार तिने केला. चाहत्यांनीही तिला मोठा आधार दिला.
हेही वाचा: Best Debut Director: 'किंग खान'च्या लेकाची कमाल; आर्यन खानला 'सर्वोत्कृष्ट पदार्पण दिग्दर्शक' पुरस्कार, मुख्यमंत्र्यांनीही केलं कौतुक
मात्र नियतीने पुन्हा एकदा तिची कठोर परीक्षा घेतली. दीर्घकाळ कॅन्सरसारख्या आजाराशी सामना करणाऱ्या तिच्या वडिलांचे निधन झाले. तब्बल ११ वर्षे त्यांनी धैर्याने आजाराशी झुंज दिली. या काळात त्यांनी कधीही हार मानली नाही. पूजासाठी ते केवळ वडील नव्हते, तर प्रेरणेचा स्रोत होते. कठीण प्रसंगात खंबीर राहण्याची शिकवण तिला त्यांच्याकडूनच मिळाली.
वडिलांच्या निधनानंतर पूजाने सोशल मीडियावर एक भावनिक पोस्ट शेअर केली. आयुष्यातील सलग दोन मोठ्या धक्क्यांमुळे मन सुन्न झाल्याची भावना तिने व्यक्त केली. “एका वादळातून सावरत असताना दुसरे वादळ समोर उभे राहिले,” अशा आशयाचे शब्द तिने लिहिले. पती आणि वडील या दोघांच्या आठवणींनी मन भरून येत असल्याचेही तिने नमूद केले.
हेही वाचा: Bigg Boss Marathi 6 :'बिग बॉस'च्या घरात त्याची एन्ट्री होणार? नवीन Wild Card एन्ट्रीचा प्रोमो पाहून चाहत्यांमध्ये उत्सुकतेची लाट
तिच्या पोस्टमध्ये तिने वडिलांच्या जिद्दीचे विशेष कौतुक केले. कठीण आजार असतानाही त्यांनी दाखवलेली चिकाटी आणि जगण्याची उमेद ही तिच्यासाठी कायम प्रेरणादायी राहील, असे ती म्हणाली. तसेच आईने वडिलांना दिलेल्या साथीतून तिलाही बळ मिळत असल्याचे तिने सांगितले. “हार मानायची नाही, शेवटच्या श्वासापर्यंत लढत राहायचे,” हा धडा आयुष्यभर लक्षात ठेवणार असल्याचेही तिने लिहिले.
पूजाची ही पोस्ट पाहून तिचे चाहते भावूक झाले आहेत. अनेकांनी तिला धीर देत, “तू खंबीर राहा,” “आम्ही तुझ्यासोबत आहोत,” अशा प्रतिक्रिया दिल्या आहेत. सोशल मीडियावर तिच्या पोस्टला मोठ्या प्रमाणात प्रतिसाद मिळत आहे.
सलग दोन मोठे आघात सहन करत असतानाही पूजा गवस स्वतःला सावरत आहे. वैयक्तिक आयुष्यातील या कठीण प्रसंगातही ती कामात सक्रिय राहण्याचा प्रयत्न करत आहे. आयुष्याने दिलेल्या प्रत्येक संकटाला सामोरे जात पुढे चालत राहण्याचा तिचा निर्धार तिच्या चाहत्यांसाठीही प्रेरणादायी ठरत आहे.