Mon. May 23rd, 2022

पुणेकरांसाठी गुडन्यूज! यंदा पुण्यात साजरी होणार ‘दिवाळी पहाट’

पुणे : पुण्यात सलग दुसऱ्या दिवशीही एकाही कोरोनाबाधित रुग्णाचा मृत्यू झालेला नाही. याच पार्श्वभूमीवर उपमुख्यमंत्री तथा पुण्याचे पालकमंत्री अजित पवार यांनी पुणेकरांसाठी दिवाळी भेट दिली आहे. पुण्यात कोरोना संसर्ग कमी झाल्यामुळे निर्बंध शिथील करून जिल्ह्यात आठवडे बाजार सुरू करण्याचे निर्देश अजित पवारांनी पुणेवासियांना दिले आहेत. तसेच दिवाळी पहाटचे कार्यक्रम साजरे करण्याची परवानगीही देण्यात आली आहे.

अजित पवार यांनी विभागीय आयुक्त कार्यालयात झालेल्या बैठकीत जिल्ह्यातील कोविड परिस्थितीचा आढावा घेतला. ‘सर्वांच्या प्रयत्नांमुळे जिल्ह्याने १ कोटी १७ लाख लसीकरणाचा टप्पा गाठला आहे. लसीकरण न झालेल्या भागात विशेष शिबिराच्या माध्यमातून नागरिकांचे लसीकरण करण्यात यावे असे पवार म्हणाले. तसेच कोरोना संसर्ग अधिक असलेल्या भागांत लक्ष देण्याच्या सूचनाही पवारांनी दिल्या आहेत.

मागील तीन आठवड्यांत पुणे पालिका क्षेत्रात तसेच पुणे ग्रामीण भागांत शून्य मृत्यूची नोंद झाली. ग्रामीण भागात १० ठिकाणी विकेंड कोविड लसीकरण सुरू करण्यात आले आहे. ‘मिशन युवा स्वास्थ’ मोहिमेअंतर्गत महाविद्यालयीन विद्यार्थ्यांना लसीकरणाचे नियोजन करण्यात आले आहे. तसेच या मोहिमेअंतर्गत ८ ते २० ऑक्टोबर दरम्यान ४ लाख २७ हजार लसीकरण करण्यात आली असल्याची माहिती अजित पवार यांनी दिली आहे.

जिल्ह्यात लसीकरण चांगल्या पद्धतीने झाल्यामुळे अजित पवारांनी सर्व लोकप्रतिनिधी, जिल्हा प्रशासन अधिकारी, जिल्हा परिषद अधिकारी तसेच महापालिकेचे अधिकारी, आरोग्य कर्मचारी, स्वयंसेवी संस्था, सिरम इन्स्टिट्यूट यांचे आभार मानले आहेत.

Leave a Reply

Your email address will not be published.

Copyright © 2021 All rights reserved. | jaimaharashtranews.com.