वाशिंग्टन: पंजाब नॅशनल बँक घोटाळ्याशी संबंधित मोठी अपडेट समोर येत आहे. फरार हिरे व्यापारी नीरव मोदीचा भाऊ नेहल मोदी याला अमेरिकेत अटक करण्यात आली आहे. अंमलबजावणी संचालनालय (ED) आणि केंद्रीय अन्वेषण विभाग यांनी संयुक्तपणे दिलेल्या प्रत्यार्पणाच्या विनंतीच्या आधारे ही अटक करण्यात आली आहे. या प्रकरणात, अमेरिकन अधिकाऱ्यांनी भारताला याबाबत माहिती दिली आहे.
नेहल मोदीविरुद्ध मनी लाँड्रिंग प्रतिबंधक कायद्याच्या (पीएमएलए) कलम 3 अंतर्गत मनी लाँड्रिंगचा गुन्हा दाखल करण्यात आला आहे. यासोबतच, भारतीय दंड संहितेच्या कलम 120-बी (गुन्हेगारी कट) आणि कलम 201 (पुरावे नष्ट करण्याचा किंवा लपवण्याचा कट) अंतर्गतही गुन्हा दाखल करण्यात आला आहे. या आरोपांच्या आधारे, भारताने अमेरिकेकडून त्याचे प्रत्यार्पण मागितले होते.
हेही वाचा - भारतात 'रॉयटर्स'चे अकाउंट ब्लॉक; सरकारने 'एक्स' कडून मागितले स्पष्टीकरण
नेहल मोदीवर कोणते आरोप आहेत?
दरम्यान, नेहल मोदीवर नीरव मोदीला पळून जाण्यास मदत करण्याचा तसेच पुरावे नष्ट करण्यात महत्त्वाची भूमिका बजावल्याचा आरोप आहे. तपास यंत्रणांचा असा विश्वास आहे की तो घोटाळ्याशी संबंधित अनेक महत्त्वाच्या माहितीचा मुख्य स्रोत असू शकतो. अमेरिकेत बराच काळ राहणारा नेहल मोदी आता थेट भारतीय एजन्सींच्या निशाण्यावर आहे. या प्रकरणातील पुढील सुनावणी 17 जुलै रोजी होणार आहे, ज्यामध्ये नेहल मोदी जामिनाची मागणी करू शकते.
हेही वाचा - सरकारी बंगला रिकामा करा...! सर्वोच्च न्यायालयाचा माजी सरन्यायाधीश चंद्रचूड यांना आदेश
नेहल मोदीचे भारतात प्रत्यार्पण करण्यात येणार -
तथापि, अमेरिकन वकिलांनी नेहल मोदीच्या जामिनाला विरोध करण्याचे संकेत दिले आहेत. जर न्यायालयाने जामीन नाकारला तर प्रत्यार्पणाची प्रक्रिया वेगाने पुढे जाण्याची शक्यता आहे. सध्या नीरव मोदी आधीच ब्रिटनमध्ये तुरुंगात आहे. त्याच्या प्रत्यार्पणाची प्रक्रिया अंतिम टप्प्यात आहे. अशा परिस्थितीत, नेहल मोदीची अटक ही भारतातील एजन्सींसाठी राजनैतिक आणि कायदेशीरदृष्ट्या एक मोठे यश मानले जात आहे.