नाशिक: 'पाणी म्हणजे जीवन' आणि याच पाण्याचा प्रवाह सुरळीत ठेवण्यासाठी नाशिक महानगरपालिकेने आता पावले उचलली आहेत. सिडको विभागातील प्रभाग क्रमांक 29 मधील पवननगर जलकुंभाच्या दुरुस्तीचे आणि स्ट्रक्चरल मजबुतीकरणाचे अत्यंत महत्त्वाचे काम सोमवार,16 फेब्रुवारीपासून सुरू करण्यात येणार आहे. त्यामुळे पुढील आठवडाभर सिडकोवासीयांना पाणी जपून आणि काटकसरीने वापरावे लागणार आहे.
का घ्यावा लागला हा निर्णय?
पवननगर येथील जलकुंभ हा या भागातील पाणीपुरवठ्याचा मुख्य आधार आहे. मात्र, या जलकुंभाच्या आतील भागाची दुरुस्ती आणि स्ट्रक्चरल ऑडिटनुसार त्याचे मजबुतीकरण करणे तांत्रिकदृष्ट्या अनिवार्य झाले आहे. हे काम सुरू असताना जलकुंभात पाणी साठवणे शक्य नसल्याने, महापालिकेला पर्यायी व्यवस्थेचा अवलंब करावा लागत आहे.
थेट जलवाहिनीवरून पुरवठा; दाबावर होणार परिणाम
जलकुंभ वापरात नसल्यामुळे, संबंधित भागांना थेट मुख्य जलवाहिनीद्वारे (Direct Pipeline) पाणीपुरवठा केला जाणार आहे. तांत्रिक मर्यादेमुळे पाइपलाइनमधून थेट पाणी सोडताना त्याचा नैसर्गिक दाब कमी होतो. परिणामी, 16 ते 23 फेब्रुवारी या कालावधीत प्रभाग 24, 25, 28 आणि 29 मधील अनेक सोसायट्या आणि वस्त्यांमध्ये पाणीपुरवठा कमी दाबाने होणार असल्याचे प्रशासनाकडून स्पष्ट करण्यात आले आहे.
हेही वाचा: Farmer Security Bill: शेतकऱ्यांसाठी सरकारचे मोठे पाऊल; अपघाती मृत्यू झाल्यास कुटुंबाला 25 लाखांची मदत; संसदेत ऐतिहासिक विधेयक सादर
या दुरुस्ती कामाचा थेट परिणाम सिडको परिसरातील अनेक भागांवर होणार आहे. प्रभाग 24 मधील तिडके नगर, प्रियांका नगर पार्क, सिद्धेश्वर मंदिर परिसर आणि जगतापनगर या भागांना पाणीपुरवठ्यात अडथळा जाणवू शकतो. तसेच प्रभाग 25 मधील पवननगर, उंटवाडी, रायगड चौक, शनि मंदिर परिसर, उदय कॉलनी, श्रीराम नगर आणि भाजी मार्केट परिसरही प्रभावित राहणार आहेत.
याशिवाय प्रभाग 28 मधील उमा पार्क, शुभम पार्क, रामेश्वर नगर, इप्को कॉलनी आणि कमल नगर येथेही परिणाम दिसून येईल. प्रभाग 29 मधील लोकमान्य नगर, राजरत्ननगर, महाकाली चौक, आनंद नगर आणि तोरणा नगर या भागांनाही या कामाचा फटका बसणार आहे. नागरिकांनी पर्यायी व्यवस्था करून प्रशासनाला सहकार्य करावे, असे आवाहन करण्यात आले आहे.
पाणी कपातीचे संकट नसले तरी कमी दाबाचा त्रास नाशिकरांना होऊ शकतो. त्यामुळे नागरिकांनी पाण्याचा अपव्यय टाळावा, पिण्याच्या पाण्याचा साठा करून ठेवावा आणि महानगरपालिकेच्या या विकासकामात सहकार्य करावे, असे आवाहन पाणीपुरवठा विभागातर्फे करण्यात आले आहे. आठ दिवसांच्या या नियोजित कामामुळे भविष्यातील पाणीपुरवठा अधिक सुरक्षित आणि सक्षम होणार आहे.
हेही वाचा: India China Relations: चीनचं 'टेन्शन' वाढलं; खनिजांसाठी भारताने आखला मास्टर प्लॅन; 'या' देशांसोबत करणार ऐतिहासिक करार