पुणे: पुणेरी माणसं आणि सायकल यांचं नातं तसं जुनं, पण उद्या हे नातं 'इंटरनॅशनल' अवतारात पुणेकरांच्या भेटीला येत आहे. 'पुणे ग्रँड चॅलेंज टूर' या जागतिक सायकल शर्यतीचा शंखनाद उद्या (19 जानेवारी) होत असून, त्यासाठी आपल्या पुण्यातील राजमार्गांनी उद्या 'मौन' पाळायचं ठरवलं आहे. फर्ग्युसन रस्ता, जंगली महाराज रस्ता आणि गणेशखिंड रस्ता उद्या सकाळी नऊ ते सायंकाळी सहा वाजेपर्यंत, म्हणजेच तब्बल नऊ तास, सर्वसामान्य 'हॉर्न'बहाद्दरांसाठी बंद राहतील. सायकलस्वारांचा वेग वाऱ्याशी स्पर्धा करणार असल्याने, पुणेकरांनी उद्या आपल्या गाड्यांना विश्रांती देऊन सहकार्य करणं अपेक्षित आहे.
शर्यतीचा मार्ग म्हणजे पुण्याचा 'मुख्य भाग' आहे. खंडुजीबाबा चौक ते संचेती आणि तिथून थेट बालगंधर्वपर्यंत केवळ सायकलींचेच राज्य असेल. आता अशा वेळी "मला महत्त्वाचं काम आहे" किंवा "मी गुडलकचा चहा प्यायला जातोय" असे पुणेरी बहाणे पोलिसांसमोर चालणार नाहीत. अत्यावश्यक सेवा वगळता कोणालाही या मार्गावर 'एन्ट्री' नसेल. विशेष म्हणजे, या मार्गावर गाडी लावून 'पुणेरी कसब' दाखवणाऱ्यांना 'नो पार्किंग'चा दणका बसणार आहे. त्यामुळे उद्या गाडी कुठेही लावून "अहो, दोनच मिनिटात येतो" म्हणणाऱ्यांची गाडी थेट पोलीस चौकीतच पाहायला मिळेल.
वाहतुकीचे मुख्य बदल आणि पर्यायी मार्ग
पुणे शहराच्या मध्यवर्ती भागातून जाणाऱ्या या सायकल स्पर्धेमुळे प्रमुख रस्ते बंद राहणार असून, वाहनचालकांसाठी प्रशासनाने विशेष 'ट्रॅफिक प्लॅन' आखला आहे. खंडुजीबाबा चौक ते गुडलक चौक हा रस्ता बंद असल्याने, स्वारगेटहून विद्यापीठाकडे जाणाऱ्यांनी अण्णा भाऊ साठे चौक आणि म्हात्रे पुलाचा वापर करावा. तसेच, खडकी किंवा जुन्या पुणे - मुंबई महामार्गाकडे जाणाऱ्यांनी बाजीराव रस्त्यावरून आरटीओ चौकामार्गे जाणे सोयीचे ठरेल. फर्ग्युसन रस्त्यावरील (गुडलक ते चापेकर चौक) प्रवासासाठी प्रभात रस्ता, लॉ कॉलेज रोड, सेनापती बापट रस्ता किंवा भांडारकर रस्ता हे पर्याय खुले राहतील.
हेही वाचा: Indian Cricket Team: विराट आणि रोहित आता क्रिकेट खेळणार नाहीत? नेमकं काय घडलंय...
गणेशखिंड आणि संचेती चौक परिसरातून प्रवास करणाऱ्यांसाठीही महत्त्वाचे बदल आहेत. चापेकर चौक ते रेंजहिल्स दरम्यानची वाहतूक सेनापती बापट रस्ता किंवा भोसलेनगरमार्गे वळवण्यात आली आहे. तसेच, रेंजहिल्स ते संचेती चौकाकडे जाणाऱ्यांनी नळस्टॉप किंवा वाकडेवाडी भुयारी मार्गाचा अवलंब करावा. संचेती चौक ते डेक्कन जिमखाना या दरम्यान प्रवास करणाऱ्या वाहनांनी आरटीओ चौक, शाहीर अमर शेख चौक किंवा पाटील इस्टेटमार्गे आपला मार्ग निश्चित करावा. शनिवारवाडा आणि कुंभारवाडा मार्ग वाहतुकीसाठी खुला असल्याने नागरिकांना त्या बाजूनेही इच्छित स्थळी पोहोचता येईल.
केवळ 19 तारीखच नव्हे, तर 23 जानेवारीलाही पुण्याची खरी 'कसोटी' लागणार आहे. त्या दिवशी 99 किलोमीटरचा महासंग्राम रंगणार असून, बालेवाडी ते झाशीची राणी लक्ष्मीबाई चौक असा 58 किलोमीटरचा प्रवास पुण्यातूनच होणार आहे. जागतिक नकाशावर पुण्याची प्रतिमा 'सायकलची राजधानी' म्हणून पुन्हा एकदा झळकणार असल्याने, थोडा त्रास सहन करून स्पर्धा यशस्वी करणं हे प्रत्येक पुणेकराचं कर्तव्य आहे. "पुणे तिथे काय उणे" ही म्हण सार्थ ठरवत, जागतिक खेळाडूंचे स्वागत शिस्तप्रिय पद्धतीने करणे गरजेचे आहे.
थोडक्यात सांगायचे तर, उद्या पुण्याच्या रस्त्यांवर धूर नसेल, तर केवळ खेळाडूंचा घाम आणि जिद्द असेल. पोलीस सहआयुक्त रंजनकुमार शर्मा आणि त्यांच्या टीमने आखलेला हा 'ट्रॅफिक प्लॅन' म्हणजे पुणेकरांसाठी महत्वाचा आहे. तेव्हा, विनाकारण पायपीट टाळायची असेल आणि पोलिस साहेबांचा ओरडा खायचा नसेल, तर हे बदल नीट समजून घ्या.
हेही वाचा: Mumbai Water Cut: मुंबईकरांनो पाणी जपून वापरा! मेट्रोच्या कामामुळे सलग 44 तास पाणीबाणी; 'या' भागात पुरवठा खंडित