Railway Pensioners Alert: देशातील लाखो रेल्वे पेन्शनधारकांसाठी केंद्र सरकारने एक महत्त्वाची आणि तातडीची अपडेट जारी केली आहे. अलिकडच्या काळात रेल्वे पेन्शनधारकांना लक्ष्य करून केल्या जाणाऱ्या सायबर फसवणुकीच्या घटनांमध्ये मोठी वाढ झाली आहे. या पार्श्वभूमीवर रेल्वे मंत्रालयाने अधिकृत सल्लागार (Advisory) जारी करून सर्व पेन्शनधारकांना सतर्क राहण्याचे आवाहन केले आहे. फसवणूक करणारे स्वतःला रेल्वे अधिकारी भासवून पेन्शनधारकांना जाळ्यात ओढत असल्याचे समोर आले आहे.
फसवणुकीची नवीन 'मोडस ऑपरेंडी' काय?
सायबर चोरटे वरिष्ठ रेल्वे अधिकारी असल्याचे सांगून पेन्शनधारकांना फोन कॉल, एसएमएस किंवा व्हॉट्सअॅप मेसेज करत आहेत. प्रामुख्याने खालील तीन कारणांचा बहाणा करून माहिती विचारली जाते:
PPO अपडेट: पेन्शन पेमेंट ऑर्डर (PPO) अपडेट करायचे आहे असे सांगून गोपनीय माहिती मागवणे.
केवायसी (KYC) पडताळणी: पेन्शन खाते बंद होईल अशी भीती घालून केवायसी पुन्हा करण्याच्या नावाखाली ओटीपी (OTP) मागणे.
अतिरिक्त फायदे: पेन्शनमध्ये वाढ झाली आहे किंवा थकबाकी (Arrears) जमा करायची आहे, असे आमिष दाखवून बँक तपशील मिळवणे.
हेही वाचा - Crime News : धक्कादायक! 5 वर्षांच्या मुलाचं एक 'खोटं बोलणं' अन् पित्याला 23 वर्षांचा तुरुंगवास! पत्नी आणि 3 मुलांच्या हत्येचा आरोप; आता निर्दोष मुक्तता
रेल्वे मंत्रालयाचा स्पष्ट खुलासा आणि सूचना
रेल्वे मंत्रालयाने पेन्शनधारकांना स्पष्ट शब्दांत बजावले आहे की, पीपीओ (PPO) किंवा सेवा रेकॉर्ड अपडेट करण्यासाठी रेल्वे प्रशासन कधीही कोणतीही लिंक पाठवत नाही. कोणताही अधिकृत रेल्वे अधिकारी फोनवर तुमचा बँक खाते क्रमांक, पासवर्ड, ओटीपी किंवा कोणतीही वैयक्तिक आर्थिक माहिती विचारत नाही. त्यामुळे पेन्शन अपडेट्सच्या नावाखाली येणाऱ्या कोणत्याही संशयास्पद लिंकवर क्लिक करू नका, असे निर्देश देण्यात आले आहेत.
सुरक्षिततेसाठी काय करावे?
पेन्शनधारकांनी आणि त्यांच्या कुटुंबियांनी सुरक्षित राहण्यासाठी खालील गोष्टींचे पालन करावे:
माहिती शेअर करू नका: अज्ञात व्यक्तीसोबत बँक तपशील किंवा वैयक्तिक माहिती कधीही शेअर करू नका.
घाबरू नका: पेन्शन थांबेल अशी भीती घातली तरी प्रलोभनाला किंवा दडपणाला बळी पडू नका.
तक्रार नोंदवा: कोणताही संशयास्पद कॉल आल्यास ताबडतोब स्थानिक पोलिस सायबर सेलशी संपर्क साधा किंवा नॅशनल सायबर क्राईम हेल्पलाइन नंबर १९३० वर कॉल करा.
अधिकृत स्रोत: पेन्शन किंवा वेतन आयोगाशी संबंधित कोणत्याही माहितीसाठी केवळ रेल्वेच्या अधिकृत वेबसाइटलाच भेट द्या किंवा संबंधित प्रशासकीय कार्यालयाशी संपर्क साधा.