Mountain Climbing In Uttarakhand: साहसी पर्यटनाला जागतिक स्तरावर नेण्यासाठी उत्तराखंड सरकारने एक ऐतिहासिक निर्णय घेतला आहे. मुख्यमंत्री पुष्कर सिंह धामी यांच्या सूचनेनुसार, उत्तराखंड पर्यटन विकास मंडळाने (UTDB) गढवाल आणि कुमाऊं हिमालयीन क्षेत्रातील 83 प्रमुख पर्वत शिखरे गिर्यारोहकांसाठी खुली केली आहेत. यामध्ये 5700 मीटरपासून 7756 मीटर उंचीपर्यंतच्या शिखरांचा समावेश असून, यामुळे उत्तराखंड आता जागतिक गिर्यारोहण नकाशावर अधिक ठळकपणे चमकणार आहे.
कामेत, नंदा देवी आणि त्रिशूलवर चढाईची संधी
खुली करण्यात आलेल्या शिखरांमध्ये कामेत नंदा देवी पूर्व, चौखंबा, त्रिशूल, शिवलिंग, सतोपंथ आणि नीलकंठ यांसारख्या जगप्रसिद्ध आणि आव्हानात्मक शिखरांचा समावेश आहे. भारतीय गिर्यारोहकांसाठी ही मोठी संधी असून, आता त्यांना या शिखरांवर चढाई करण्यासाठी कोणतेही शिखर शुल्क, कॅम्पिंग शुल्क किंवा पर्यावरण शुल्क द्यावे लागणार नाही. हे सर्व शुल्क आता राज्य सरकार स्वतः सोसणार आहे, ज्यामुळे आर्थिक टंचाई असलेल्या तरुण गिर्यारोहकांना मोठा आधार मिळणार आहे.
हेही वाचा - Udhampur Encounter: उधमपूरच्या जंगलात जैशच्या दोन दहशतवाद्यांचा खात्मा; लष्कराने स्फोटाने उडवली गुहा
परदेशी गिर्यारोहकांसाठी सवलत आणि ऑनलाइन प्रक्रिया
परदेशी गिर्यारोहकांसाठीही राज्य सरकारने अतिरिक्त शुल्क रद्द केले असून, त्यांना आता केवळ IMF (Indian Mountaineering Foundation) चे शुल्क भरावे लागेल. मोहिमेच्या परवानग्या सुलभ करण्यासाठी 'उत्तराखंड गिर्यारोहण परवानगी प्रणाली' (UKMPS) हे ऑनलाइन पोर्टल सुरू करण्यात आले आहे. यामुळे परवानग्या मिळवताना होणारा विलंब टाळला जाईल आणि संपूर्ण प्रक्रिया पारदर्शक होईल.
स्थानिक रोजगार आणि अर्थव्यवस्थेला बळ
'हिमालय ही आपली ओळख असून, येथील दुर्गम भागातील अर्थव्यवस्था मजबूत करणे हा आमचा उद्देश आहे,' असे मुख्यमंत्री धामी यांनी म्हटले आहे. या निर्णयामुळे सीमावर्ती गावांतील स्थानिकांना मार्गदर्शक, पोर्टर आणि होमस्टेच्या माध्यमातून रोजगाराच्या नवीन संधी उपलब्ध होतील. तसेच, केंद्रीय अर्थसंकल्प 2026-27 मध्ये जाहीर केल्याप्रमाणे पर्यावरणपूरक पर्वतीय मार्गांच्या विकासामुळे उत्तराखंड हे जागतिक दर्जाचे ट्रेकिंग डेस्टिनेशन बनण्याच्या दिशेने वाटचाल करत आहे.