Rishi Gupta Arrested : वस्तू आणि सेवा कर (GST) कायद्यांचे उल्लंघन केल्याच्या गंभीर आरोपाखाली फिनो पेमेंट्स बँकेचे व्यवस्थापकीय संचालक (MD) आणि मुख्य कार्यकारी अधिकारी (CEO) ऋषी गुप्ता यांना कर अधिकाऱ्यांनी अटक केली आहे. बँकेने शुक्रवारी अधिकृतपणे या घटनेची घोषणा केली. ऋषी गुप्ता यांच्या अटकेनंतर बँकेने तातडीने एक विशेष बोर्ड बैठक बोलावली. या बैठकीत बँकेचे मुख्य वित्तीय अधिकारी (CFO) केतन मर्चंट यांची दैनंदिन कामकाजाचे व्यवस्थापन आणि देखरेख करण्यासाठी कंपनीचे प्रमुख म्हणून नियुक्ती करण्यात आली आहे, अशी माहिती बँकेने नियामक फाइलिंगमध्ये दिली आहे.
अटकेचे कारण आणि कायदेशीर तरतुदी
बँकेने स्पष्ट केले आहे की, ऋषी गुप्ता यांना CGST आणि SGST कायदा, 2017 च्या कलम 132(1)(a) आणि 132(1)(i) च्या तरतुदींनुसार अटक करण्यात आली आहे. या कारवाईमुळे बँकिंग क्षेत्रात आणि व्यावसायिक वर्तुळात मोठी खळबळ उडाली आहे. लॉ फर्म SNG अँड पार्टनर्सचे अध्यक्ष राजेश नारायण गुप्ता यांनी या घटनेवर आश्चर्य व्यक्त केले असून, सरकारने अशा कठोर कायदेशीर तरतुदींची पुनर्तपासणी करण्याची गरज असल्याचे मत व्यक्त केले आहे.
बँकेचे स्पष्टीकरण आणि तपासाचे स्वरूप
फिनो पेमेंट्स बँकेने एका प्रसिद्धीपत्रकात म्हटले आहे की, "बँक सर्व आवश्यक माहिती प्रदान करण्यासाठी GST अधिकाऱ्यांना पूर्ण सहकार्य करत आहे. सध्याच्या घडीला बँकेच्या कामकाजावर कोणताही परिणाम झालेला नाही." विशेष म्हणजे, या प्रकरणात बँकेचा कोणताही थेट अधिकारी सहभागी नसून संपूर्ण तपास बँकेच्या एका 'व्यावसायिक भागीदाराशी' संबंधित आहे, असे स्पष्टीकरण बँकेने दिले आहे. तरीही, सर्वोच्च पदावरील व्यक्तीला अटक झाल्यामुळे गुंतवणूकदारांमध्ये चिंतेचे वातावरण आहे.
हेही वाचा - Crime News: भयानक! खुर्चीवर मृतदेह, कानात इअरबड्स आणि रक्ताने माखलेली खोली; ITI विद्यार्थ्याचा संशयास्पद मृत्यू
शेअर बाजारात मोठी घसरण आणि आर्थिक स्थिती
या बातमीचा थेट परिणाम शुक्रवारी शेअर बाजारातील व्यवहारांवर दिसून आला. 2021 मध्ये नोंदणी झालेल्या फिनो पेमेंट्स बँकेचे शेअर्स शुक्रवारी 7.50 टक्क्यांनी (15.60) घसरून BSE वर 192.45 वर बंद झाले. ट्रेडिंग दरम्यान शेअर्सनी 182.90 चा नीचांकी स्तर गाठला होता. बँकेच्या शेअर्सचा 52 आठवड्यांचा उच्चांक 339.00 आहे, तर नीचांकी स्तर 180.50 आहे. सध्या कंपनीचे एकूण बाजार भांडवल 1,601.54 कोटी इतके आहे.