WhatsApp Web Call : व्हॉट्सअॅप आपला वापरकर्ता अनुभव अधिक सुलभ करण्यासाठी सतत नवीन फीचर्स लाँच करत असते. आता कंपनीने डेस्कटॉप वापरकर्त्यांसाठी एक अत्यंत बहुप्रतिक्षित अपडेट आणले आहे. लवकरच, वापरकर्त्यांना लॅपटॉप किंवा संगणकावर कोणतेही स्वतंत्र अॅप डाउनलोड न करता थेट WhatsApp Web ब्राउझरवरून व्हॉइस आणि व्हिडिओ कॉल करता येणार आहेत. हा बदल विशेषतः ऑफिसमध्ये काम करणाऱ्या किंवा शेअर्ड संगणक वापरणाऱ्या लोकांसाठी एक महत्त्वपूर्ण सोय ठरणार आहे.
कसे काम करेल हे नवीन फीचर?
सध्या हे नवीन फीचर व्हॉट्सअॅप वेब बीटा प्रोग्राममधील निवडक वापरकर्त्यांसाठी उपलब्ध करून देण्यात आले आहे. ज्या वापरकर्त्यांना हे अपडेट मिळाले आहे, त्यांना चॅट विंडोच्या वरच्या उजव्या बाजूला कॉलचा आयकॉन दिसेल. त्यावर क्लिक करताच थेट व्हिडिओ किंवा व्हॉइस कॉल सुरू करता येईल. ही प्रक्रिया मोबाईल किंवा डेस्कटॉप अॅपसारखीच सोपी आहे. सध्या हे फिचर केवळ एकास-एक (One-on-One) कॉलसाठी उपलब्ध असून, ग्रुप कॉल्सबाबत कंपनीने अद्याप कोणतीही अधिकृत माहिती दिलेली नाही.
गोपनीयता आणि स्क्रीन शेअरिंगची सुविधा
व्हॉट्सअॅपच्या मते, वेब कॉलिंग पूर्णपणे सुरक्षित असेल. मोबाईल अॅपप्रमाणेच येथेही 'एंड-टू-एंड एन्क्रिप्शन' आणि सिग्नल प्रोटोकॉलचा वापर करण्यात आला आहे, ज्यामुळे तुमचे संभाषण सुरक्षित राहील. याव्यतिरिक्त, वेब कॉलिंगमध्ये 'स्क्रीन शेअरिंग'चा पर्यायही देण्यात आला आहे. यामुळे ऑनलाइन मीटिंग्ज, सादरीकरणे किंवा अभ्यासादरम्यान सहकाऱ्यांसोबत स्क्रीन शेअर करणे अधिक सोयीचे होणार आहे.
हेही वाचा - Online Gaming Protest : दिल्लीत ऑनलाइन गेम्सविरोधात जनआक्रोश; मुलांचे भविष्य वाचवण्यासाठी नागरिक रस्त्यावर, काय आहे मागणी?
स्वतंत्र अॅप डाउनलोड करण्याची कटकट मिटली
आतापर्यंत व्हॉट्सअॅप वेब केवळ चॅटिंग आणि फाईल शेअरिंगपुरते मर्यादित होते. कॉलिंगसाठी वापरकर्त्यांना विंडोज किंवा मॅकचे स्वतंत्र अॅप डाउनलोड करावे लागत असे. मात्र, या नवीन अपडेटमुळे ब्राउझरमध्येच सर्व सुविधा मिळणार असल्याने ही अडचण दूर झाली आहे. हा बदल विशेषतः लिनक्स (Linux) वापरकर्त्यांसाठी आणि सार्वजनिक संगणकावर काम करणाऱ्यांसाठी अत्यंत उपयुक्त ठरेल. मेटा कंपनी आपल्या प्लॅटफॉर्मला अधिक कार्यक्षम बनवण्याच्या धोरणाचा हा एक भाग आहे.
भविष्यात येणार 'क्लोज फ्रेंड्स' आणि प्रीमियम प्लॅन
व्हॉट्सअॅप केवळ वेब कॉलिंगवरच थांबलेले नाही, तर भविष्यात अनेक नवीन फीचर्सची भर पडणार आहे. यामध्ये स्टेटससाठी "क्लोज फ्रेंड्स" फिचरचा समावेश आहे, ज्याद्वारे वापरकर्ते त्यांचे अपडेट्स केवळ निवडक लोकांशी शेअर करू शकतील. तसेच, भविष्यात व्यावसायिक आणि वैयक्तिक वापरासाठी काही विशेष साधनांसह 'प्रीमियम सबस्क्रिप्शन' प्लॅन देखील लाँच होण्याची शक्यता आहे.