Share Market Crash : भारतीय शेअर बाजारात शुक्रवारी कमालीची अस्थिरता पाहायला मिळाली. सकाळी बाजाराची सुरुवात तेजीसह झाली असली तरी, दुपारच्या सत्रात विक्रीचा प्रचंड दबाव आल्याने बाजार जोरात गडगडला. बीएसई (BSE) सेन्सेक्स 800 पेक्षा जास्त अंकांनी घसरून 81,506.85 वर आला, तर निफ्टी 240 अंकांनी कोसळून 25,049.80 च्या पातळीवर पोहोचला. या एकाच दिवसाच्या घसरणीमुळे बीएसईवर सूचिबद्ध असलेल्या कंपन्यांचे बाजार भांडवल 5.7 लाख कोटी रुपयांनी (सुमारे 6 लाख कोटी) घटले असून ते 452.69 लाख कोटी रुपयांवर आले आहे. जागतिक बाजारातून सकारात्मक संकेत असतानाही भारतीय बाजारात झालेल्या या पडझडीने गुंतवणूकदारांचे मोठे नुकसान झाले आहे.
परदेशी गुंतवणूकदारांची सततची विक्री
बाजारातील या मोठ्या घसरणीचे मुख्य कारण परदेशी संस्थात्मक गुंतवणूकदारांकडून (FII) होणारी सततची विक्री हे आहे. जानेवारी महिन्यात सलग 13 व्या दिवशी परदेशी गुंतवणूकदारांनी शेअर विक्रीचा सपाटा लावला. गुरुवारीच परदेशी गुंतवणूकदारांनी 2,550 कोटी रुपयांचे शेअर्स विकले होते. 2025 प्रमाणेच 2026 वर्षाच्या सुरुवातीलाही परदेशी विक्रेते आणि देशांतर्गत खरेदीदारांमधील संघर्ष कायम असल्याचे दिसत आहे. नफा वसुलीच्या (Profit Booking) सत्रामुळे सकाळी वाढलेला बाजार टिकू शकला नाही आणि विक्रीचा दबाव वाढल्याने तांत्रिक पातळीवरही निर्देशांकांची घसरण झाली.
हेही वाचा - Gold Silver Rate Today: सोनं झालं स्वस्त; विक्रमी उसळीनंतर सोन्याच्या दरात मोठी घसरण, खरेदीसाठी हीच ती योग्य वेळ?
रुपयाचा विक्रमी नीचांकी स्तर
शेअर बाजाराला मिळालेल्या धक्क्यासोबतच भारतीय रुपयानेही अमेरिकन डॉलरच्या तुलनेत आतापर्यंतचा सर्वात नीचांकी स्तर गाठला आहे. शुक्रवारी रुपया 0.2 टक्क्यांनी घसरून 91.77 वर पोहोचला. कॉर्पोरेट कंपन्या आणि आयातदारांकडून डॉलरची मागणी वाढल्याने रुपयावर हा दबाव निर्माण झाला आहे. रुपयाच्या या घसरणीमुळे देशांतर्गत मालमत्तेच्या मूल्यात घट झाली असून, परदेशी गुंतवणूकदारांचा स्थानिक शेअर्सवरील विश्वास कमी झाला आहे. भांडवल बाहेर जाण्याच्या भीतीने गुंतवणूकदारांनी सावध पवित्रा घेतल्याने बाजारात जोखीम टाळण्याचे प्रमाण वाढले आहे.
सुरुवातीची तेजी ठरली क्षणभंगुर
दिवसाच्या सुरुवातीला सेन्सेक्स 82,335.94 वर उघडला होता आणि त्याने 82,516.27 पर्यंत झेप घेतली होती. आशियाई बाजारातील वाढ आणि भू-राजकीय तणाव काहीसा कमी झाल्याने बाजारात उत्साहाचे वातावरण होते. मात्र, उच्च पातळीवर नफा वसुली सुरू झाल्याने ही तेजी फार काळ टिकली नाही. एका दिवसापूर्वीच बाजार सावरला असताना शुक्रवारी पुन्हा झालेल्या या मोठ्या घसरणीमुळे बाजारातील अनिश्चितता अधिक गडद झाली आहे.