नवी दिल्ली: येत्या 2026 मध्ये अमेरिका स्वातंत्र्याचा 250 वा वर्धापन दिन साजरा करणार असून, याच पार्श्वभूमीवर ट्रम्प यांनी वॉशिंग्टन डीसीमध्ये एक भव्य 'ट्रायम्फल आर्च' (Triumphal Arch) उभारण्याची संकल्पना मांडली आहे. या ऐतिहासिक स्मारकाची प्रेरणा त्यांनी चक्क भारताच्या 'इंडिया गेट'कडून घेतल्याचे दिसून येत आहे. ट्रम्प यांनी सोशल मीडिया प्लॅटफॉर्मवर इंडिया गेटचा फोटो शेअर करत, याला भारताची 'भव्य विजयी कमान' असे संबोधले आहे. "भारताचे इंडिया गेट अप्रतिम आहे, पण आमची कमान जगातील सर्वात मोठी आणि भव्य असेल," अशा शब्दांत त्यांनी आपला 'अमेरिका फर्स्ट'चा बाणा पुन्हा एकदा सिद्ध केला आहे.
ट्रम्प-मोदी मैत्रीचा नवा अध्याय: टॅरिफमध्ये मोठी कपात
भारत आणि अमेरिका यांच्यातील व्यापारात गेल्या काही काळापासून टॅरिफ (शुल्काचा) मुद्दा कळीचा ठरला होता. विशेषतः रशियाकडून तेल खरेदी करण्याच्या भारताच्या निर्णयामुळे अमेरिकेने भारतावर अतिरिक्त 25 टक्के टॅरिफ लादला होता, ज्यामुळे एकूण शुल्क 50 टक्क्यांच्या घरात पोहोचले होते. मात्र, पंतप्रधान नरेंद्र मोदींसोबतच्या 'ट्रेड डील'नंतर ट्रम्प यांनी हे शुल्क 50 टक्क्यांवरून थेट 18 टक्क्यांपर्यंत खाली आणण्याची मोठी घोषणा केली आहे. "नरेंद्र मोदी हे माझे अत्यंत जवळचे मित्र आहेत आणि त्यांच्या आग्रहाखातर हा ऐतिहासिक निर्णय घेतला आहे," असे ट्रम्प यांनी स्पष्ट केले.
हेही वाचा: Jay Ajit Pawar : दादांच्या आठवणीत जय पवार भावूक; सोशल मीडियावर शेअर केला अजित पवारांसोबतचा 'तो' फोटो अन् लिहिलं...
रशियन तेलाचा अडसर दूर; 500 अब्ज डॉलरचा ऐतिहासिक करार
या व्यापार करारामागे एक मोठी अटही असल्याचे समोर आले आहे. अमेरिकेच्या म्हणण्यानुसार, भारत आता रशियाकडून तेल खरेदी करणे बंद करून अमेरिका आणि व्हेनेझुएलासारख्या देशांकडून ऊर्जा पुरवठा घेण्यास तयार झाला आहे. यामुळे युक्रेन युद्ध थांबवण्यास मदत होईल, असा विश्वास ट्रम्प यांनी व्यक्त केला. या बदल्यात भारताने अमेरिकेकडून 500 अब्ज डॉलरची ऊर्जा, कोळसा आणि कृषी उत्पादने खरेदी करण्याचे आश्वासन दिले आहे. या निर्णयामुळे 'मेड इन इंडिया' उत्पादनांना अमेरिकन बाजारपेठेत आता मोठी संधी मिळणार आहे.
वॉशिंग्टनमध्ये उभारणार 'आर्क ऑफ ट्रम्प'?
इंडिया गेटच्या प्रेरणेतून ट्रम्प यांना वॉशिंग्टन डीसीमध्ये एक अवाढव्य स्मारक उभारायचे आहे. प्रस्तावित 'इंडिपेंडन्स आर्च'ची उंची साधारण 250 फूट असू शकते, जी अमेरिकेच्या 250 व्या स्वातंत्र्यदिनाचे प्रतीक असेल. हे स्मारक लिंकन मेमोरियल आणि आर्लिंग्टन ब्रिजच्या जवळ उभारले जाण्याची शक्यता आहे. विशेष म्हणजे, पॅरिसमधील 'आर्क डी ट्रायम्फ'पेक्षाही हे स्मारक मोठे असावे, अशी ट्रम्प यांची जिद्द आहे. भारताच्या ऐतिहासिक वारशाचे कौतुक करतानाच, अमेरिकेला जगात श्रेष्ठ दाखवण्याची एकही संधी ट्रम्प सोडताना दिसत नाहीत.
"मैत्रीचा हात आणि व्यापाराची साथ" असेच काहीसे स्वरूप सध्या भारत-अमेरिका संबंधांना प्राप्त झाले आहे. ट्रम्प यांनी इंडिया गेटचा फोटो शेअर करणे, हे केवळ वास्तूचे कौतुक नसून भारताच्या वाढत्या जागतिक प्रभावाची दिलेली ही एक प्रकारे पावतीच आहे.
टॅरिफच्या या 'कमी-जास्त' खेळात शेवटी भारत आणि अमेरिका या दोन महालोकशाही देशांची मैत्री पुन्हा एकदा सुवर्णमध्य साधताना दिसत आहे. यामुळे आगामी काळात जागतिक बाजारपेठेतील समीकरणे मोठ्या प्रमाणात बदलण्याची चिन्हे आहेत.
हेही वाचा: Mayor Election: महापौर' ठरला! अखेरच्या क्षणी 'या' नेत्याने टाकली गुगली; पाहा कोणाची लागली वर्णी