नवी दिल्ली: पश्चिम आशियातील वाढत्या युद्धजन्य तणावाच्या पार्श्वभूमीवर भारत सरकारने परदेशात असलेल्या भारतीय नागरिकांच्या सुरक्षेसाठी महत्त्वाचे पाऊल उचलले आहे. मध्यपूर्वेतील बदलत्या परिस्थितीवर बारकाईने लक्ष ठेवत भारताच्या परराष्ट्र मंत्रालयाने (Ministry of External Affairs, MEA) नवी दिल्ली येथे विशेष नियंत्रण कक्ष (Control Room) स्थापन केला आहे. या माध्यमातून त्या भागात राहणाऱ्या किंवा अडकलेल्या भारतीयांना तातडीची मदत, माहिती आणि मार्गदर्शन उपलब्ध करून देण्याचा प्रयत्न केला जाणार आहे.
परराष्ट्र मंत्रालयाचे प्रवक्ते रणधीर जायसवाल यांनी सांगितले की, पश्चिम आशिया आणि खाडी (Gulf) प्रदेशातील परिस्थिती लक्षात घेऊन हा निर्णय घेण्यात आला आहे. हा नियंत्रण कक्ष दररोज सकाळी नऊ ते रात्री नऊ या वेळेत कार्यरत राहणार आहे. भारतीय नागरिकांकडून येणाऱ्या चौकशींना उत्तर देणे, आपत्कालीन मदत पुरवणे आणि परिस्थितीबाबत अद्ययावत माहिती देणे हा या केंद्राचा मुख्य उद्देश आहे.
नियंत्रण कक्षाशी संपर्क साधण्यासाठी सरकारने काही महत्त्वाचे हेल्पलाइन क्रमांकही जाहीर केले आहेत. नागरिक 1800118797, +91 11 2301 2113, +91 11 2301 4104 आणि +91 11 2301 7905 या क्रमांकांवर संपर्क साधून मदत मिळवू शकतात. या क्रमांकांवरून भारतीय नागरिकांना आवश्यक माहिती, सल्ला आणि आपत्कालीन परिस्थितीत मार्गदर्शन दिले जाणार आहे.
हेही वाचा: Virat Kohli viral video: लंडनच्या रस्त्यावर ‘किंग’ कोहलीचा खास अंदाज; लेकासोबत विराटचा क्यूट व्हिडिओ व्हायरल
याशिवाय पश्चिम आशियातील विविध देशांमध्ये असलेल्या भारतीय दूतावासांनीही आपत्कालीन संपर्क क्रमांक जाहीर केले आहेत. बहरीन: +973 39418071, इराण: +98 9128109115, +98 912810910, +98 912810910, +98 932179359, इराक: +964 771 651 1185, +964 770444 4899, इस्रायल: +972 54 7520711, +972 54 2428378, जॉर्डन: +962 770 422 276, कुवैत: +965 65501946, लेबनान: +961 76860128, ओमान: +968 98282270 (WhatsApp), 80071234, कतार: +974 55647502, रामल्ला (पॅलेस्टाईन): +970 592916418, सौदी अरेबिया (Riyadh): +966 11 4884697, 800 247 1234, सौदी अरेबिया (Jeddah): +966 126648660, +966 12 2614093, संयुक्त अरब अमिरात (UAE): +971 543090571 (WhatsApp), 800 46342.
दरम्यान, मध्यपूर्वेत सुरू असलेला संघर्ष अधिक तीव्र होत असल्याचे चित्र आहे. अमेरिका आणि इस्रायल यांनी इराण मधील काही ठिकाणांवर केलेल्या हल्ल्यांनंतर परिस्थिती अधिक चिघळली आहे. या कारवाईत इराणचे सर्वोच्च नेते आणि इतर वरिष्ठ अधिकाऱ्यांचा मृत्यू झाल्याचे वृत्त समोर आले. त्यानंतर इराणकडून इस्रायली मालमत्ता, अमेरिकन लष्करी तळ तसेच खाडी प्रदेशातील काही रणनीतिक ठिकाणांवर प्रत्युत्तरात्मक हल्ले करण्यात आल्याची माहिती समोर आली आहे.
हा संघर्ष 28 फेब्रुवारीपासून अधिक तीव्र झाला असून त्यानंतर संपूर्ण पश्चिम आशिया प्रदेशात हल्ले आणि प्रतिहल्ल्यांची मालिका सुरू असल्याचे दिसून येत आहे. या पार्श्वभूमीवर भारत सरकारने त्या भागातील भारतीय नागरिकांना सावध राहण्याचे आणि कोणतीही अडचण निर्माण झाल्यास त्वरित नियंत्रण कक्ष किंवा संबंधित दूतावासाशी संपर्क साधण्याचे आवाहन केले आहे. बदलत्या परिस्थितीत भारतीयांच्या सुरक्षेला सर्वोच्च प्राधान्य दिले जाईल, असे परराष्ट्र मंत्रालयाने स्पष्ट केले आहे.
हेही वाचा: Uddhav And Raj Thackeray: ठाकरे बंधूंमध्ये पुन्हा दुरावा? राज ठाकरेंच्या तटस्थ भूमिकेने उद्धव ठाकरेंचे वाढले टेन्शन