नवी दिल्ली: पश्चिम आशियातील वाढत्या युद्धजन्य परिस्थितीचे पडसाद आता भारतातही उमटण्याची शक्यता लक्षात घेऊन केंद्रीय गृहमंत्रालयाने (Ministry of Home Affairs , MHA) सर्व राज्यांना सतर्कतेचा इशारा दिला आहे. इराण, अमेरिका आणि इस्त्रायल यांच्यात सुरू असलेल्या संघर्षाच्या पार्श्वभूमीवर देशातील कायदा व सुव्यवस्था अबाधित ठेवण्यासाठी प्रतिबंधात्मक उपाययोजना तातडीने राबवण्याच्या सूचना देण्यात आल्या आहेत. परदेशातील घडामोडींचा वापर करून देशांतर्गत तणाव निर्माण करण्याचा प्रयत्न होऊ शकतो, अशी शक्यता गृहमंत्रालयाने व्यक्त केली आहे.
28 फेब्रुवारी रोजी जारी करण्यात आलेल्या पत्रात पश्चिम आशियातील लष्करी कारवायांचे भारतात “Ripple Effects” म्हणजेच अप्रत्यक्ष परिणाम दिसू शकतात, असा इशारा देण्यात आला आहे. विशेषतः धार्मिक सभा, सार्वजनिक कार्यक्रम किंवा भाषणांदरम्यान आंतरराष्ट्रीय घटनांचा उल्लेख करून समाजात तेढ निर्माण करण्याचा प्रयत्न होऊ शकतो, असे नमूद करण्यात आले आहे. त्यामुळे संभाव्य भडकाऊ वक्तव्ये करणाऱ्या व्यक्ती आणि संघटनांवर बारकाईने लक्ष ठेवण्याचे निर्देश राज्य प्रशासनांना देण्यात आले आहेत.
गृहमंत्रालयाने विशेषतः प्रो-इराण कट्टर प्रवचन (Pro-Iran Radical Sermons) देणाऱ्या काही घटकांवर देखरेख वाढवण्याची गरज अधोरेखित केली आहे. अशा भाषणांमुळे धार्मिक भावना भडकण्याची शक्यता असल्याने गुप्तचर यंत्रणांमध्ये (Intelligence Coordination) अधिक समन्वय ठेवून वेळेवर हस्तक्षेप करण्यावर भर देण्यात आला आहे. कोणतीही परिस्थिती बिघडण्यापूर्वीच प्रतिबंधात्मक कारवाई करण्याचे स्पष्ट निर्देश देण्यात आले आहेत.
हेही वाचा: Iran Israel Conflict: चार दशकांच्या सत्तेला पूर्णविराम? सर्वोच्च नेते अली खामेनी ठार; वारसदार मोज्तबाचाही मृत्यू, इराणमध्ये सत्तासंकट गडद
दरम्यान, जम्मू-काश्मीरमध्ये आधीच खबरदारीची पावले उचलण्यात आली आहेत. इराणचे सर्वोच्च नेते अयातुल्ला अली खामेनेई (Ayatollah Ali Khamenei) यांच्या मृत्यूच्या वृत्तानंतर काही भागांत निदर्शने झाल्याने खोऱ्यात मोबाईल इंटरनेटचा वेग तात्पुरता कमी करण्यात आला.
श्रीनगरमधील लाल चौक परिसरात सुरक्षा वाढवण्यात आली असून घड्याळ मनोरा परिसर बॅरिकेड्स लावून बंद करण्यात आला आहे. मोठ्या जमावांना प्रतिबंध करण्यासाठी अतिरिक्त पोलीस आणि केंद्रीय राखीव पोलीस दल (Central Reserve Police Force, CRPF) तैनात करण्यात आले आहेत.
अधिकाऱ्यांच्या माहितीनुसार लाल चौक, बडगाम, बांदीपोरा, अनंतनाग आणि पुलवामा या भागांत निदर्शने नोंदवण्यात आली. काश्मीरमध्ये सुमारे 15 लाख शिया मुस्लिम लोकसंख्या असल्याने काही ठिकाणी मोठ्या प्रमाणावर शोकसभा आणि जमाव दिसून आले. प्रशासनाने परिस्थिती नियंत्रणात असल्याचे सांगितले असले तरी सतर्कता कायम ठेवण्यात आली आहे.
दरम्यान, पश्चिम आशियातील संघर्ष अधिक तीव्र होत असून अमेरिका आणि इस्त्रायलने इराणच्या क्षेपणास्त्र तळांवर आणि नौदल सुविधांवर सातत्याने हल्ले सुरू ठेवले आहेत. इराणकडून ड्रोन आणि क्षेपणास्त्र हल्ल्यांद्वारे प्रत्युत्तर दिले जात असून आखाती प्रदेशातील रियाध, दुबईसारख्या शहरांवरही त्याचे परिणाम जाणवत आहेत. या संघर्षाचा परिणाम नागरी विमान वाहतुकीवरही झाला असून अनेक विमान कंपन्यांनी उड्डाणे रद्द किंवा मर्यादित केली आहेत.
एकूणच, आंतरराष्ट्रीय संघर्षाचे देशांतर्गत परिणाम टाळण्यासाठी केंद्र सरकार परिस्थितीवर बारकाईने लक्ष ठेवून आहे. जागतिक घडामोडींचा वापर करून सामाजिक तणाव निर्माण होऊ नये, यासाठी प्रशासन सतर्क मोडमध्ये असून नागरिकांनी अफवांपासून दूर राहून अधिकृत माहितीलाच प्राधान्य द्यावे, असे आवाहन करण्यात आले आहे.
हेही वाचा: Mobile Feature While Driving: कंटाळा करू नका..., याने तुमचा जीव वाचेल; ड्रायव्हिंग सुरू करण्यापूर्वी हे 'एक' फोन फिचर ऑन करणे ठरू शकते देवदूत