Data Breach 2026: डिजिटल युगात डेटा सुरक्षिततेबाबत एक अत्यंत चिंताजनक माहिती समोर आली आहे. जगभरातील सुमारे 14 कोटींहून अधिक वापरकर्त्यांची युजरनेम आणि पासवर्ड ऑनलाइन लीक झाले आहेत. यामध्ये Gmail, Facebook, Instagram आणि Netflix सारख्या दिग्गज प्लॅटफॉर्मच्या युजर्सचा समावेश असून, ही माहिती कोणत्याही सुरक्षा किंवा एन्क्रिप्शनशिवाय ऑनलाइन उपलब्ध होती. सायबर सुरक्षा संशोधक जेरेमियाह फाउलर यांनी हा धक्कादायक खुलासा केला आहे.
96 GB डेटा असुरक्षित; मालवेअरचा मोठा हात
संशोधनानुसार, हा डेटा कोणत्याही हॅकरने चोरलेला नसून 'इन्फोस्टीलर' (Infostealer) नावाच्या धोकादायक मालवेअरमुळे लीक झाला आहे. हा मालवेअर गुपचूप वापरकर्त्यांच्या उपकरणांमधून युजरनेम आणि पासवर्ड चोरतो. जेरेमियाह फाउलर यांना सुमारे 96 GB चा असा डेटाबेस आढळला, जो कोणालाही सहजपणे ॲक्सेस करता येत होता. हा डेटाबेस बंद होण्यासाठी जवळपास एक महिन्याचा कालावधी लागला, तोपर्यंत अनेक अज्ञात लोकांनी हा डेटा पाहिला असण्याची शक्यता नाकारता येत नाही.
कोणत्या प्लॅटफॉर्मला किती फटका बसला?
अहवालानुसार, अंदाजे 48 दशलक्ष जीमेल अकाउंट्स, 4 दशलक्ष याहू अकाउंट्स आणि 1.5 दशलक्ष आउटलुक अकाउंट्समधील लॉगिन तपशील लीक झाले आहेत. 17 दशलक्ष फेसबुक अकाउंट्स, 6.5 दशलक्ष इंस्टाग्राम अकाउंट्स आणि अंदाजे 800,000 टिकटॉक अकाउंट्समधील डेटा लीक झाला आहे. 4.2 दशलक्ष नेटफ्लिक्स अकाउंट्समधील माहिती लीक झाली आहे. अनेक देशांमधील सरकारी लॉगिन डेटा देखील लीक झाला आहे. नेटफ्लिक्स अकाउंट्ससह Disney Plus, HBO Max, Roblox आणि OnlyFans सारख्या प्लॅटफॉर्मलाही याचा फटका बसला आहे. विशेष म्हणजे, अनेक देशांमधील सरकारी कर्मचाऱ्यांचा लॉगिन डेटाही यामध्ये समाविष्ट आहे.
हेही वाचा - Sony Clip Linkbuds: इअरफोन्समुळे कान दुखतात? सोनीने आणले हटके 'क्लिप' डिझाइन बड्स; आता दिवसभर गाणी ऐका तेही विनात्रास
स्वतःला सुरक्षित ठेवण्यासाठी 'या' 3 स्टेप्स त्वरित फॉलो करा
सायबर तज्ज्ञांनी वापरकर्त्यांना स्वतःचा डेटा वाचवण्यासाठी काही उपाययोजना करण्याचे आवाहन केले आहे. तुमचा फोन, लॅपटॉप किंवा ईमेल साठवणारी इतर उपकरणे अँटी-मालवेअर सॉफ्टवेअरने त्वरित स्कॅन करा, जेणेकरून 'इन्फोस्टीलर' सारखे मालवेअर काढून टाकता येतील. तुमच्या सर्व महत्त्वाच्या अकाउंट्सवर (Gmail, FB, Instagram) 2FA म्हणजेच दुहेरी सुरक्षा स्तर सक्षम करा. यामुळे केवळ पासवर्ड माहीत असूनही कोणाला तुमचे अकाउंट उघडता येणार नाही. तसेच तुमचे सर्व पासवर्ड त्वरित बदला. प्रत्येक ॲपसाठी वेगळा आणि कठीण पासवर्ड वापरा आणि तो वेळोवेळी बदलण्याची सवय लावा.