नवीन कार खरेदी करताना बहुतांश लोकांचे लक्ष मायलेज, सेफ्टी फीचर्स, ब्रँड आणि किंमतीकडे असते. पण कारचा रंग हा मुद्दा अनेकदा शेवटी किंवा अगदी सहज निवडला जातो. प्रत्यक्षात, हाच रंग भविष्यात तुमच्या गाडीची रिसेल व्हॅल्यू ठरवण्यात महत्त्वाची भूमिका बजावत असतो. ऑटोमोबाईल तज्ज्ञ आणि वापरलेल्या गाड्यांच्या बाजारातील ट्रेंड पाहता, पांढऱ्या रंगाच्या कारना सर्वाधिक मागणी असल्याचे स्पष्ट होते.
कार शोरूममधून बाहेर पडताच गाडीची किंमत घटू लागते, हे सर्वांनाच माहिती आहे. मात्र काही रंग असे आहेत जे ही घसरण तुलनेने कमी करतात. त्यात सर्वात पुढे आहे पांढरा रंग. पांढऱ्या रंगाची कार ‘युनिव्हर्सल अपील’ असलेली मानली जाते. वय, जेंडर, वापर किंवा व्यवसाय यापैकी कोणताही घटक असो, पांढरा रंग बहुतांश खरेदीदारांना पसंत पडतो. त्यामुळे जुनी कार विकताना पांढऱ्या रंगाच्या गाडीला खरेदीदार पटकन मिळतो आणि भाव पाडण्यासाठी फारशी चर्चा करावी लागत नाही.
मेंटेनन्सच्या बाबतीतही पांढरा रंग फायदेशीर ठरतो. धूळ, माती किंवा लहान स्क्रॅच गडद रंगांच्या तुलनेत पांढऱ्या रंगावर कमी उठून दिसतात. काळ्या किंवा गडद निळ्या रंगाच्या कारवर लहानसा ओरखडाही लांबून दिसतो, ज्यामुळे गाडीची कंडीशन खराब असल्याचा भास होतो. परिणामी, खरेदीदार किंमत कमी करण्याचा आग्रह धरतो.
भारतीय हवामानाचाही यात मोठा वाटा आहे. भारतासारख्या उष्ण देशात पांढरा रंग सूर्यप्रकाश परावर्तित करतो. त्यामुळे कारचे केबिन तुलनेने थंड राहते. एसीवर कमी ताण येतो आणि प्रवास अधिक आरामदायी होतो. दीर्घकाळ पाहता, याचा इंजिन आणि एसी सिस्टिमच्या आरोग्यावरही सकारात्मक परिणाम होतो, असा तज्ज्ञांचा दावा आहे.
अपघातानंतर रिपेअरिंगचा विचार केला तर पांढऱ्या रंगाची आणखी एक जमेची बाजू समोर येते. पांढऱ्या रंगाचे पेंट मॅच करणे सोपे आणि स्वस्त असते. याउलट, मॅटेलिक, पर्ल किंवा कस्टम शेड्स मॅच करणे कठीण असून त्यासाठी जास्त खर्च येतो. त्यामुळे रिपेअर हिस्ट्री असलेल्या कारची किंमतही रंगानुसार बदलते.
रिसेल मार्केटमध्ये सिल्व्हर आणि हलक्या ग्रे रंगालाही चांगला प्रतिसाद मिळतो. ब्लॅक रंग प्रीमियम सेगमेंटमध्ये लोकप्रिय असला, तरी त्याचे मेंटेनन्स खर्चिक असल्याने सामान्य बाजारात त्याची मागणी मर्यादित असते. लाल, निळे किंवा कस्टम रंग दिसायला आकर्षक असले तरी, त्यांना विशिष्ट खरेदीदारच मिळतात, त्यामुळे रिसेल व्हॅल्यू सर्वात कमी असते.
म्हणूनच, पुढच्या वेळी कार खरेदी करताना फक्त आवड नाही तर भविष्यातील रिसेल व्हॅल्यू लक्षात घेऊन रंग निवडणे शहाणपणाचे ठरेल. कारण योग्य रंगाची निवड हीच तुमच्या गाडीची खरी गुंतवणूक ठरू शकते.