Apple Pay : भारतीय बाजारपेठेत Apple Inc. आपली पेमेंट सेवा 'ॲपल पे' (Apple Pay) लाँच करण्यासाठी मोठ्या हालचाली करत आहे. यासाठी कंपनी भारतातील आघाडीच्या बँका आणि ग्लोबल कार्ड नेटवर्क्सशी चर्चा करत असून, 2026 च्या मध्यापर्यंत ही सेवा भारतात सुरू करण्याचे कंपनीचे उद्दिष्ट आहे. सध्या ही चर्चा प्राथमिक टप्प्यात असली तरी, तांत्रिक जुळवाजुळव पूर्ण झाल्यानंतर 2026 च्या दुसऱ्या सहामाहीत ही सेवा सामान्य वापरकर्त्यांसाठी उपलब्ध होण्याची दाट शक्यता आहे. स्वस्त मोबाईल डेटा आणि सरकारी पाठिंब्यामुळे भारत सध्या जगातील सर्वात वेगाने वाढणारी डिजिटल पेमेंट मार्केट बनली आहे, ज्याचा फायदा आता ॲपल घेणार आहे.
बँका आणि UPI सोबत भागीदारी
ब्लूमबर्गच्या अहवालानुसार, ॲपल सध्या ICICI Bank, HDFC Bank आणि Axis Bank यांसारख्या प्रमुख बँकांशी संवाद साधत आहे. याशिवाय, पेमेंट नेटवर्क मास्टरकार्ड इंक (Mastercard) आणि व्हिसा इंक (Visa) सोबतही चर्चा सुरू आहे. विशेष म्हणजे, 'ॲपल पे' भारतात केवळ कार्ड आधारित पेमेंटपुरते मर्यादित न राहता, सरकारी युनिफाईड पेमेंट्स इंटरफेस म्हणजेच UPI ला देखील सपोर्ट करेल अशी अपेक्षा आहे. यामुळे भारतीय ग्राहकांना टॅप-टू-पे सोबतच स्कॅन करून त्वरित पैसे ट्रान्सफर करणे सोपे होईल. ॲपल प्रत्येक ट्रान्झॅक्शनमध्ये आपला हिस्सा ठेवते, ज्यामुळे कंपनीच्या महसुलातही मोठी भर पडेल.
हेही वाचा - Internet Browser Upgraded: आता स्क्रीनला टच करण्याची गरज नाही! फक्त आवाजावर होईल वेब ब्राउझिंग, 'हा' ब्राउझर देणार गुगलला टक्कर
बायोमेट्रिक ऑथेंटिकेशन आणि सुरक्षा
भारतात ॲपल पे आल्यास त्याला 'गुगल पे', 'फोन पे' आणि 'पेटीएम' यांसारख्या प्रस्थापित कंपन्यांशी स्पर्धा करावी लागेल. ॲपल पे पेमेंट अधिकृत करण्यासाठी फेस आयडी (Face ID) किंवा टच आयडी (Touch ID) यांसारख्या प्रगत बायोमेट्रिक तंत्रज्ञानाचा वापर करते. भारतीय रिझर्व्ह बँकेने (RBI) गेल्या वर्षाच्या अखेरीस डिजिटल पेमेंटसाठी बायोमेट्रिक ऑथेंटिकेशनला परवानगी देणारे नवीन नियम लागू केले आहेत. यापूर्वी भारतीय प्रणाली प्रामुख्याने OTP वर अवलंबून होती; मात्र, आता ॲपलच्या सुरक्षित प्रणालीमुळे पेमेंट प्रक्रिया अधिक वेगवान होईल. ॲपल पे च्या प्रवेशामुळे भारतातील डिजिटल पेमेंट क्षेत्रात मोठी क्रांती अपेक्षित आहे.
वाढता मार्केट शेअर आणि रिटेल विस्तार
भारतात सध्या 75 कोटींहून अधिक स्मार्टफोन युजर्स आहेत आणि ॲपलने आपला मार्केट शेअर सातत्याने वाढवून सुमारे 10 टक्क्यांपर्यंत नेला आहे. ॲपल पे लाँच झाल्यामुळे कंपनीच्या आयफोन (iPhone) आणि इतर हार्डवेअरची मागणी आणखी वाढू शकते. कंपनी भारतात आपली रिटेल उपस्थितीही वेगाने वाढवत असून, याच आठवड्यात मुंबईत ॲपलने आपले 6 वे अधिकृत स्टोअर उघडले आहे. यावरून ॲपलसाठी भारतीय बाजारपेठ किती महत्त्वाची आहे, हे स्पष्ट होते. नॅशनल पेमेंट्स कॉर्पोरेशन ऑफ इंडिया (NPCI) कडून मॅनेज केल्या जाणाऱ्या UPI इकोसिस्टममध्ये ॲपलचा सहभाग हा गेमचेंजर ठरू शकतो.
हेही वाचा - Instagram Safety Survey : तुमची मुलं इन्स्टाग्रामवर किती सुरक्षित? मेटाच्या अंतर्गत सर्व्हेतून धक्कादायक वास्तव समोर