Data Tracking : तुम्ही कधी विचार केला आहे का, की तुम्ही एखाद्या शॉपिंग साईटवर एखादी वस्तू शोधता आणि लगेच त्याचीच जाहिरात तुमच्या फेसबुक किंवा इन्स्टाग्रामवर दिसू लागते? हे केवळ योगायोग नाही, तर तुमचा 'डेटा ट्रॅकिंग'चा परिणाम आहे. मेटा (Meta) कशा प्रकारे तुमच्या ऑनलाईन हालचालींवर लक्ष ठेवते आणि तुमची प्रायव्हसी सुरक्षित करण्यासाठी कोणती सेटिंग बदलावी, याची सविस्तर माहिती खालीलप्रमाणे आहे.
नेमकं प्रकरण काय?
फेसबुक आणि इन्स्टाग्रामने 'Your Activity Off Meta Technologies' नावाचे एक विशेष फीचर दिले आहे. जेव्हा तुम्ही अॅमेझॉन, फ्लिपकार्ट किंवा इतर कोणत्याही थर्ड-पार्टी अॅपवर काही सर्च करता, तेव्हा ते अॅप्स तुमचा डेटा मेटासोबत शेअर करतात. यामुळे मेटाला तुमच्या आवडी-निवडी कळतात आणि त्यानुसार तुम्हाला जाहिराती दाखवल्या जातात. यालाच 'पर्सनलाइज्ड जाहिराती' म्हणतात, पण यामुळे तुमची गोपनीय माहिती धोक्यात येऊ शकते.
तुमचा डेटा कोण शेअर करतंय? असे तपासा:
तुमची माहिती कोणत्या वेबसाईट्स मेटाला पाठवत आहेत, हे पाहण्यासाठी खालील स्टेप्स फॉलो करा:
फेसबुक/इन्स्टाग्राम सेटिंग: अॅप उघडून 'Settings & Privacy' मध्ये जा.
अकाउंट सेंटर: येथे 'Your Information and Permissions' हा विभाग निवडा.
युवर अॅक्टिव्हिटी: यामध्ये 'Your Activity Off Meta Technologies' या पर्यायावर क्लिक करा.
येथे तुम्हाला त्या सर्व अॅप्स आणि वेबसाईट्सची यादी दिसेल, ज्यांनी तुमचा डेटा मेटाला विकला किंवा शेअर केला आहे.
डेटा ट्रॅकिंग कसे थांबवायचे?
तुमची प्रायव्हसी जपण्यासाठी मेटाने दोन महत्त्वाचे पर्याय दिले आहेत:
हिस्ट्री क्लिअर करा (Clear History): या पर्यायामुळे आतापर्यंत साठवलेला जुना सर्व डेटा मेटाच्या सिस्टममधून हटवला जातो.
डिस्कनेक्ट अॅक्टिव्हिटी (Disconnect Future Activity): हे सेटिंग सुरू केल्यास, भविष्यात कोणतीही बाह्य वेबसाईट तुमचा डेटा फेसबुक किंवा इन्स्टाग्रामशी शेअर करू शकणार नाही. जरी यामुळे जाहिराती दिसणे बंद होणार नाही, तरी त्या तुमच्या वैयक्तिक माहितीवर आधारित नसतील.
हेही वाचा - Cyber Scam : सावधान! LinkedIn आणि Instagram वर पार्ट टाइम जॉब शोधताय? तुमचं बँक खातं होऊ शकतं रिकामं
डेटा डाऊनलोड करण्याची सुविधा
मेटा युजर्सना आपला डेटा 'एक्सपोर्ट' करण्याची सुविधाही देते. तुम्ही तुमचा ऑनलाईन डेटा फाईलच्या स्वरूपात डाऊनलोड करून गुगल ड्राईव्ह किंवा ड्रॉपबॉक्सवर जतन करू शकता. यामुळे तुम्हाला हे कळेल की नेमकी कोणती माहिती आजवर शेअर केली गेली आहे. ऑनलाईन सुरक्षिततेसाठी वेळोवेळी आपले प्रायव्हसी सेटिंग्ज तपासणे आणि नको असलेले अॅक्सेस काढून टाकणे नेहमीच फायदेशीर ठरते.