Bhaubij 2025: भाऊ-बहिणींचं अतूट नातं साजरं करणारा भाऊबीज सण दिवाळीतील एक महत्त्वाचा आणि भावनिक सण मानला जातो. रक्षाबंधनानंतर हे दुसरं मोठं पर्व असून, या दिवशी बहिण भावाच्या दीर्घायुष्याची आणि सुख-समृद्धीची प्रार्थना करते. यावर्षी भाऊबीज 23 ऑक्टोबर 2025 रोजी साजरी केली जाणार आहे. मात्र, यंदाच्या भाऊबीजेला राहु काळाचं सावट असल्याने शुभ कार्य करताना काळजी घेणं आवश्यक आहे.
भाऊबीज साजरी करण्याचा शुभ दिवस
कार्तिक महिन्यातील शुक्ल पक्षाच्या द्वितीयेला भाऊबीज साजरी केली जाते. या दिवशी सकाळपासून घराघरांत पूजा, औक्षण आणि टिळा सोहळा सुरू होतो. बहिणी भावाला औक्षण करून तिळक लावतात आणि आरती करताना त्यांच्या आयुष्यात आनंद, आरोग्य आणि यश लाभावं अशी प्रार्थना करतात. बदल्यात भाऊ बहिणीला भेटवस्तू देतो आणि तिचं रक्षण करण्याचं वचन देतो.
राहु काळाचा प्रभाव
द्रिक पंचांगानुसार, यावर्षी भाऊबीजेला राहु काळ दुपारी 1:30 ते 2:54 या वेळेत असेल. या काळात कोणतेही शुभ कार्य टाळणं योग्य मानलं जातं. त्यामुळे भावाला ओवाळणी, तिळक किंवा औक्षण या काळात करणं टाळावं.
भाऊबीजेचे शुभ मुहूर्त
-
पहिला शुभ मुहूर्त: दुपारी 1:13 ते 3:28
-
अभिजीत मुहूर्त: सकाळी 11:43 ते दुपारी 12:28
-
विजय मुहूर्त: दुपारी 1:58 ते 2:43
-
गोधुली मुहूर्त: संध्याकाळी 5:43 ते 6:09
या मुहूर्तांपैकी कोणत्याही वेळी औक्षण, तिळक आणि पूजा केल्यास ते अत्यंत शुभ मानले जाते.
ओवाळणी करण्याची पद्धत
सकाळी स्नान करून भावाने नवीन किंवा स्वच्छ कपडे परिधान करावे आणि बहिणीच्या घरी जावे. बहिणीने प्रथम भावाला भोजन करवावे, त्यानंतर तिळक लावून औक्षण करावे. भावाने आपल्या क्षमतेनुसार भेटवस्तू देऊन बहिणीबद्दल कृतज्ञता व्यक्त करावी.
भाऊबीजेला काय करावं आणि काय टाळावं
या दिवशी बहिणीने भावाच्या कपाळावर चंदन किंवा केशराचा टिळा लावावा, ज्यामुळे त्याच्या आयुष्यात सकारात्मक ऊर्जा राहते. तसेच यमराजासाठी दिवा लावल्याने अकाली मृत्यूची भीती टळते, असा धार्मिक विश्वास आहे. राहु काळात पूजा टाळावी आणि कोणत्याही वाद-विवादापासून दूर राहावं.
भाऊबीज हा फक्त सण नाही, तर प्रेम, आपुलकी आणि नात्याचं बंधन मजबूत करणारा दिवस आहे. राहु काळात शुभ कार्य टाळून, योग्य मुहूर्तात पूजा केल्यास या पवित्र नात्याचं सौख्य आयुष्यभर टिकून राहतं.
(Disclaimer : येथे दिलेली माहिती धार्मिक श्रद्धेवर आधारित आहे. याला कोणताही शास्त्रीय पुरावा नाही. जय महाराष्ट्र त्याची हमी देत नाही.)