Prakash Ambedkar : छत्रपती संभाजीनगर महानगरपालिका निवडणुकीच्या रणधुमाळीत वंचित बहुजन आघाडीचे नेते प्रकाश आंबेडकर यांनी भारतीय जनता पक्षावर आणि पंतप्रधान नरेंद्र मोदींवर अत्यंत आक्रमक शब्दांत हल्ला चढवला आहे. "देशात विश्वगुरू जन्माला आलाय, चायवाला; अशा शब्दांत आंबेडकरांनी मोदींच्या धोरणांवर सडकून टीका केली. त्यांच्या मते, तथाकथित 'विश्वगुरू' संकल्पनेमुळे भारत आंतरराष्ट्रीय पातळीवर एकटा पडत चालला असून, अमेरिकेसारख्या देशांनी भारतीय मालावर 500 टक्के टॅक्स लावल्याने देशात मोठी महागाई वाढणार आहे. ही परिस्थिती केवळ एका व्यक्तीच्या 'इगो'मुळे ओढवली असल्याचा दावा त्यांनी केला.
आंतरराष्ट्रीय संकट आणि महागाईचा इशारा
प्रकाश आंबेडकर यांनी जागतिक राजकारणातील बदलांचा संदर्भ देत भाजप सरकारमुळे या आपत्ती ओढवल्याचा दावा केला. अमेरिकेने भारतावर लादलेल्या व्यापार निर्बंधांमुळे रुपयाची किंमत घसरून महागाई गगनाला भिडणार असल्याचा दावाही त्यांनी केला.
चायवाला आणि महागाई: "चायवाल्याच्या धोरणांमुळे सर्वसामान्यांचे जगणे कठीण झाले असून मजुरी न वाढता वस्तूंचे भाव मात्र शंभर पटीने वाढत आहेत," असे ते म्हणाले.
युद्धाची भीती: लष्करप्रमुखांच्या विधानाचा दाखला देत त्यांनी नजीकच्या काळात युद्धाची शक्यता वर्तवली. छत्रपती संभाजीनगर हे एक लष्करी केंद्र (Military Center) असल्याने युद्धाच्या परिस्थितीत या शहराला मोठा धोका निर्माण होऊ शकतो, अशी भीती त्यांनी व्यक्त केली.
भ्रष्ट राजकारण आणि सत्तेचा गैरवापर
निवडणुकीच्या काळात पैशांचा व दहशतीचा होणारा वापर थांबवण्याचे आवाहन प्रकाश आंबेडकरांनी कार्यकर्त्यांना केले. छत्रपती संभाजीनगरमध्ये नवा इतिहास घडवण्यासाठी प्रत्येकाने आपल्यासोबत दोन अतिरिक्त मते घेऊन येणे गरजेचे असल्याचे त्यांनी नमूद केले. भाजपचे सरकार भ्रष्टाचारी आणि लैंगिक अत्याचार करणाऱ्या गुन्हेगारांना स्वीकृत नगरसेवक पदावर बसवत असल्याचा गंभीर आरोप त्यांनी केला. बदलापूर प्रकरणातील मुख्य आरोपीला भाजपने संरक्षण दिल्याचे उदाहरण देत त्यांनी महिलांच्या सुरक्षेचा प्रश्न ऐरणीवर आणला.
हेही वाचा - Solapur Election 2026: सोलापुरात अजित पवारांना मोठा धक्का! मतदानाला 72 तास उरले असताना राष्ट्रवादीचा उमेदवार भाजपच्या गोटात
धर्मनिरपेक्ष शक्तींच्या एकजुटीचे आवाहन
आंबेडकर यांनी मुस्लिम समाज आणि 'सनातन हिंदुत्ववादी' कार्यकर्त्यांनाही साद घातली. "जर धर्मनिरपेक्ष (Secular) शक्ती कमकुवत झाल्या, तर पहिला निशाणा तुम्ही असाल," असा इशारा त्यांनी मुस्लिम समाजाला दिला. तसेच भाजपच्या कार्यकर्त्यांनीही आपल्या कुटुंबाच्या सुरक्षेसाठी यावेळी भाजपला मतदान करू नये, असे आवाहन त्यांनी केले. छत्रपती संभाजीनगरचे लष्करी महत्त्व लक्षात घेता, शहराच्या शांततेसाठी मोदींचा राजकीय पराभव करणे आवश्यक असल्याचे त्यांनी आग्रही प्रतिपादन केले.
येत्या 15 जानेवारी 2026 रोजी होणाऱ्या छत्रपती संभाजीनगर महानगरपालिका निवडणुकीत वंचित बहुजन आघाडीच्या उमेदवारांना भरघोस मतांनी निवडून देण्याचे आवाहन करत त्यांनी भाषणाचा समारोप केला. ही निवडणूक केवळ शहराच्या नागरी सुविधांसाठी नसून ती देशाच्या लोकशाहीचे आणि संविधानाचे भवितव्य ठरवणारी लढाई असल्याचे त्यांनी ठामपणे सांगितले.
हेही वाचा - Navi Mumbai: निवडणुकीत पैसे वाटप? नवी मुंबईत मनसेने शिवसेनेला धरलं धारेवर; Video Viral