Mahashivratri 2026 : महाशिवरात्री हा भगवान शंकराच्या भक्तांसाठी अत्यंत पवित्र आणि आध्यात्मिक उर्जेचा सण आहे. या विशेष रात्री शिवशक्तीचे मिलन झाले होते, अशी धार्मिक मान्यता आहे. रविवारी, 15 फेब्रुवारी 2026 रोजी साजरी होणारी यंदाची महाशिवरात्री अनेक अर्थांनी खास आहे, कारण या दिवशी 'सर्वार्थ सिद्धी' आणि 'अमृत सिद्धी' असे दुर्मिळ योग जुळून येत आहेत. या दिवशी राशीनुसार महादेवाची कशी उपासना करावी, याबद्दल जाणून घेऊ. अशा प्रकारे राशीनुसार अभिषेक केल्यास संबंधित ग्रहाचे दोष दूर होऊन महादेवाचा विशेष आशीर्वाद प्राप्त होतो.
महाशिवरात्री पूजेचे महत्त्व आणि शुभ मुहूर्त
यंदा महाशिवरात्रीला चतुर्दशी तिथी सायंकाळी 5:04 वाजता सुरू होत आहे. पूजेसाठी सर्वात महत्त्वाचा मानला जाणारा 'निशीत काळ' रात्री 12:09 ते पहाटे 1:01 या दरम्यान असेल. ज्योतिष तज्ज्ञांच्या मते, या दिवशी उपवास आणि राशीनुसार जलाभिषेक केल्याने आरोग्याच्या समस्या दूर होतात आणि अडकलेली कामे मार्गी लागतात.
महाशिवरात्रीच्या दिवशी शिवलिंगावर अभिषेक करताना तांब्याच्या पात्रातून दूध अर्पण करू नये (पाण्यासाठी तांब्याचे पात्र चालेल). शक्य असल्यास पांढऱ्या किंवा हलक्या रंगाचे कपडे परिधान करून पूजा करावी. बेलपत्र अर्पण करताना शक्यतो ते फाटलेले नसावे आणि त्याची गुळगुळीत बाजू शिवलिंगावर ठेवावी. मनोभावे पूजा-अर्चना केल्यामुळे भगवान शिव लवकर प्रसन्न होतात.
मेष (Aries): या राशीचा स्वामी मंगळ आहे. आपण शिवलिंगावर मध आणि गुळाचे पाणी मिसळून अभिषेक करावा. पूजेत लाल रंगाची फुले, विशेषतः कणेर किंवा जास्वंद अर्पण करा आणि 'ॐ नमः शिवाय' या मंत्राचा जप करा.
वृषभ (Taurus): शुक्र स्वामी असलेल्या या राशीच्या व्यक्तींनी गायीचे दूध आणि दही अर्पण करावे. पांढरे चंदन आणि पांढरी फुले वाहिल्याने जीवनात सुख-समृद्धी येते. 'ॐ नागेश्वराय नमः' हा आपला मंत्र असेल.
मिथुन (Gemini): बुध स्वामी असलेल्या जातकांनी उसाचा रस किंवा हिरव्या फळांचा रस अर्पण करावा. शिवलिंगावर बेलपत्र आणि दूर्वा वाहणे तुमच्यासाठी अत्यंत लाभदायक ठरेल. 'ॐ विश्वेश्वराय नमः' मंत्राचा जप करावा.
कर्क (Cancer): चंद्राचे प्रभुत्व असलेल्या या राशीने कच्चे दूध आणि गंगाजल अर्पण करावे. मानसिक शांतीसाठी पांढरे कमळ वाहणे शुभ राहील. 'ॐ सोमेश्वराय नमः' जप करावा.
सिंह (Leo): सूर्य स्वामी असलेल्या या राशीने पाण्यात गूळ किंवा केशर मिसळून अभिषेक करावा. महादेवाला गहू आणि लाल फुले अर्पण करून 'ॐ त्र्यंबकाय नमः' मंत्राचा उच्चार करावा.
कन्या (Virgo): बुध स्वामी असलेल्या या जातकांनी गंगाजलात हिरवे मूग आणि दूर्वा टाकून अभिषेक करावा. बेलपत्र वाहून 'ॐ त्रिपुरान्तकाय नमः' मंत्राचा जप करणे फळदायी ठरेल.
हेही वाचा - Mahashivratri 2026 : 15 फेब्रुवारीला महादेवांची विशेष कृपा! ध्यानावस्थेतून बाहेर येणार भोलेनाथ; मनोकामनापूर्तीसाठी करा 'हा' सोपा उपाय
तूळ (Libra): शुक्र स्वामी असल्याने साखरमिश्रित दूध किंवा सुगंधी अत्तर मिसळून अभिषेक करावा. यामुळे वैवाहिक सुखात वाढ होते. 'ॐ महाकालेश्वर नमः' जप करावा.
वृश्चिक (Scorpio): मंगळाचा प्रभाव असलेल्या या राशीने पंचामृताने अभिषेक करावा. मधाचा वापर आणि लाल फुले अर्पण करणे शुभ आहे. 'ॐ अंगारेश्वराय नमः' हा मंत्र जपावा.
धनु (Sagittarius): गुरू स्वामी असलेल्या या राशीने दुधात हळद किंवा केशर मिसळून अभिषेक करावा. पिवळी फुले आणि पिवळे चंदन अर्पण करून 'ॐ रामेश्वराय नमः' जप करावा.
मकर (Capricorn): शनी स्वामी असलेल्या मकर राशीने नारळ पाणी किंवा गंगाजलात काळे तीळ टाकून अभिषेक करावा. शमी पत्र वाहिल्याने शनी दोष दूर होतात. 'ॐ भीमेश्वराय नमः' जप करावा.
कुंभ (Aquarius): शनीचा प्रभाव असल्याने तीळ किंवा मोहरीच्या तेलाने अभिषेक करणे विशेष फलदायी आहे. काळे तीळ आणि शमी पत्र अर्पण करून 'ॐ नीलकंठाय नमः' जप करावा.
मीन (Pisces): गुरू स्वामी असलेल्या या राशीने दुधात केशर मिसळून अभिषेक करावा. पिवळी फुले आणि बदाम अर्पण करून 'ॐ घृष्णेश्वराय नमः' या मंत्राचा उच्चार करावा.
हेही वाचा - Mahashivratri 2026: महाशिवरात्रीला शिवकृपा हवी? 'या' वेळेत करा जलाभिषेक, जाणून घ्या शुभ मुहूर्त
(Disclaimer : येथे दिलेली माहिती धार्मिक श्रद्धेवर आधारित आहे. याला कोणताही शास्त्रीय पुरावा नाही. जय महाराष्ट्र त्याची हमी देत नाही.)