Electric Scooter : ओला इलेक्ट्रिकने (Ola Electric) भारतीय ईव्ही मार्केटमध्ये पुन्हा आपले वर्चस्व निर्माण करण्यासाठी एक मोठी खेळी खेळली आहे. कंपनीचे सीईओ भाविश अग्रवाल यांनी जुन्या ग्राहकांसाठी 'जेन-3 अपग्रेड प्रोग्राम' (Gen-3 Upgrade Program) जाहीर केला आहे. या अंतर्गत, ज्यांच्याकडे ओलाची जुनी जेन-1 किंवा जेन-2 मॉडेल्स आहेत, त्यांना आता अत्याधुनिक जेन-3 प्लॅटफॉर्मवर शिफ्ट होण्याची सुवर्णसंधी मिळणार आहे.
काय आहे 'जेन-3' अपग्रेड ऑफर?
ओला इलेक्ट्रिकचा हा अपग्रेड प्रोग्राम या वीकेंडपासून बंगळुरूमध्ये सुरू होत असून लवकरच इतर शहरांमध्ये विस्तारला जाणार आहे. यामध्ये S1 Pro, S1 Pro+ आणि S1X यांसारख्या जेन-3 स्कूटर्स तसेच रोडस्टर, रोडस्टर X आणि रोडस्टर X+ यांसारख्या इलेक्ट्रिक बाईक्सचा पर्याय उपलब्ध आहे. या जेन-3 प्लॅटफॉर्मची सर्वात मोठी खासियत म्हणजे यात ओलाची स्वदेशी 4680 'Bharat Cell' बॅटरी टेक्नॉलॉजी वापरली आहे. यामुळे काही प्रीमियम मॉडेल्समध्ये रायडिंग रेंज तब्बल 320 किलोमीटरपर्यंत मिळणार आहे, जे ग्राहकांसाठी मोठे आकर्षण ठरेल.
बदललेले हार्डवेअर आणि सॉफ्टवेअर
जेन-3 मॉडेल्समध्ये केवळ रेंजच नाही, तर अनेक महत्त्वपूर्ण हार्डवेअर सुधारणा करण्यात आल्या आहेत. यात मिड-ड्राइव्ह मोटर आणि चेन-ड्राइव्ह सिस्टमचा समावेश आहे, यामुळे गाडीची कार्यक्षमता आणि टिकाऊपणा (Durability) वाढणार आहे. याव्यतिरिक्त, MoveOS च्या नवीन अपडेट्समुळे रायडिंगचा अनुभव अधिक स्मार्ट आणि सुलभ झाला आहे. तांत्रिक बिघाड आणि विश्वासाच्या मुद्द्यावरून ओलावर होत असलेल्या टीकेला उत्तर देण्यासाठी कंपनीने हे प्रगत तंत्रज्ञान बाजारात आणले आहे.
हेही वाचा - Top 5 Electric Scooters : इलेक्ट्रिक स्कूटरवर 'लाईफटाईम' वॉरंटी! बॅटरीच्या टेन्शनमधून ग्राहकांची कायमची सुटका; 'या' 5 कंपन्यांच्या जबरदस्त ऑफर्स
ओलाचा 'स्ट्रक्चरल रीसेट' आणि रिकव्हरी
एकेकाळी 36% मार्केट शेअर असलेल्या ओलाची घसरण आता 4-6% पर्यंत झाली आहे, तर टीव्हीएस आणि बजाज ऑटो यांनी 60% हून अधिक मार्केट काबीज केले आहे. या संकटातून बाहेर पडण्यासाठी ओलाने 'स्ट्रक्चरल रीसेट' सुरू केला आहे. कंपनी आपल्या फिजिकल स्टोर्सची संख्या मार्च 2026 पर्यंत 700 वरून कमी करून 550 करत आहे. सोबतच 'हायपरसर्व्हिस' सेंटर्सद्वारे 80% सर्व्हिस रिक्वेस्ट त्याच दिवशी पूर्ण करण्याचे लक्ष ठेवण्यात आले आहे. मागील तिमाहीत महसूल निम्म्यावर आल्याने झालेल्या 490 कोटी रुपयांच्या नुकसानीची भरपाई करण्यासाठी हा अपग्रेड प्रोग्राम महत्त्वाचा ठरेल.
मार्केट लीडर बनण्याचे स्वप्न
तज्ज्ञांच्या मते, हा प्रोग्राम जुन्या ग्राहकांची निष्ठा वाढवण्यास मदत करेल. जरी अद्याप एक्सचेंज व्हॅल्यू आणि डिस्काउंटचे पूर्ण तपशील समोर आले नसले तरी, प्रगत बॅटरी तंत्रज्ञान आणि PLI प्रमाणपत्राच्या जोरावर ओला पुन्हा एकदा मार्केट लीडर बनण्याची तयारी करत आहे. सर्व्हिस बॅकलॉग 50% ने कमी झाल्याचा दावा कंपनीने केला असून, ग्राहकांना चांगला परफॉर्मन्स देऊन पुन्हा ओलाकडे वळवण्याचा हा एक मोठा प्रयत्न आहे.
हेही वाचा - What is Range of Router: राउटर असूनही घरात इंटरनेट चालत नाही? जाणून घ्या रेंज वाढवण्याचे 'हे' गुपित