Vasai-Virar Election Results 2026 : वसई-विरार महानगरपालिका निवडणुकीच्या (VVMC Election 2026) निकालांनी आज, शुक्रवारी (16 जानेवारी 2026) पुन्हा एकदा हितेंद्र ठाकूर यांच्या बहुजन विकास आघाडीचे (बविआ) वर्चस्व सिद्ध केले आहे. विधानसभेच्या पराभवानंतर ही निवडणूक ठाकूर यांच्यासाठी अस्तित्वाची लढाई मानली जात होती. ताज्या आकडेवारीनुसार, एकूण 115 जागांपैकी बहुजन विकास आघाडीने 71 जागांवर दणदणीत विजय मिळवत स्पष्ट बहुमत प्राप्त केले आहे. या निकालामुळे वसई-विरारमध्ये ठाकूर यांचा 'किंगमेकर' म्हणून असलेला दबदबा कायम असल्याचे स्पष्ट झाले असून कार्यकर्त्यांनी मोठा जल्लोष केला आहे.
भाजपची ऐतिहासिक मुसंडी; 'बविआ'ला कडवी झुंज
या निवडणुकीत भारतीय जनता पक्षाने वसई-विरारमध्ये आपली ताकद मोठ्या प्रमाणावर वाढवली आहे. भाजपने 115 पैकी 44 जागांवर विजय मिळवत मुख्य विरोधी पक्षाची जागा घेतली आहे. प्रभाग क्रमांक 16 मधून भाजपचे निलेश चौधरी विजयी झाले असून, त्यांनी या विजयाचे श्रेय मुख्यमंत्री देवेंद्र फडणवीस (देवाभाऊ) आणि कार्यकर्त्यांच्या मेहनतीला दिले आहे. "देवाला सर्वांची काळजी असते आणि आता इथल्या विकासाकडे आमचे नेतृत्व जातीने लक्ष देणार आहे," अशी प्रतिक्रिया चौधरी यांनी दिली. भाजपच्या या वाढलेल्या जागांमुळे येत्या काळात महापालिकेत हितेंद्र ठाकूर यांच्यासमोर मोठे आव्हान उभे ठाकणार आहे.
श्रीमंत उमेदवारांचा गुलाल
मतमोजणीच्या सुरुवातीलाच बहुजन विकास आघाडीच्या तीन अत्यंत श्रीमंत उमेदवारांनी विजय मिळवत भाजपला पहिला मोठा धक्का दिला. प्रभाग क्रमांक 4 मधून 'बविआ'चे चारही उमेदवार विजयी झाले असून, त्यात अजीव पाटील (291.65 कोटी संपत्ती), प्रफुल्ल साने (30 कोटी संपत्ती) आणि प्रशांत राऊत (1 कोटी संपत्ती) यांचा समावेश आहे. यासोबतच अमृता चोरघे आणि सुमन ममता दुर्गेश यांनीही विजयाची मोहोर उमटवली आहे. ठाकूर यांच्या या धनदांडग्या शिलेदारांनी सुरुवातीलाच आघाडी घेतल्याने महापालिकेत 'बविआ'चे खाते अत्यंत दिमाखात उघडले गेले.
हेही वाचा - BJP Municipal Victory: फडणवीस फॅक्टर पुन्हा कामी आला! महाराष्ट्रातील 13 महापालिकांवर भाजपची एकहाती सत्ता, विरोधकांचा सुपडा साफ
ठाकरे आणि शरद पवार गटाचा 'सुपडा साफ'
वसई-विरारमधील निकालांची सर्वात धक्कादायक बाब म्हणजे महाविकास आघाडीची झालेली वाताहत. शिवसेना (UBT) म्हणजेच ठाकरे गट आणि राष्ट्रवादी काँग्रेस (शरद पवार गट) यांना या निवडणुकीत खातेही उघडता आलेले नाही. सुषमा अंधारे आणि इतर नेत्यांनी केलेल्या सभांना मतदारांनी प्रतिसाद दिला नसल्याचे या निकालावरून स्पष्ट झाले आहे. वसई-विरारच्या स्थानिक राजकारणात केवळ हितेंद्र ठाकूर आणि भाजप या दोनच शक्तींमध्ये थेट लढत असल्याचे आता सिद्ध झाले असून, प्रादेशिक पक्षांच्या प्रभावाला मतदारांनी नाकारले आहे. यंदाच्या निवडणुकीत एकूण 547 उमेदवार रिंगणात होते, ज्यात 'बविआ'ने 113, भाजपने 95, तर ठाकरे गटाने 89 जागा लढवल्या होत्या. मात्र, वसई-विरारच्या स्थानिक राजकारणात केवळ हितेंद्र ठाकूर आणि भाजप या दोनच शक्तींमध्ये थेट लढत असल्याचे आता सिद्ध झाले आहे.
सत्तास्थापनेनंतरच्या 'विकासा'कडे सर्वांचे लक्ष
बहुजन विकास आघाडीने बहुमताचा आकडा पार केल्यामुळे आता महापालिकेत पुन्हा एकदा बविआचाच महापौर विराजमान होईल. पिण्याच्या पाण्याचा प्रश्न, रस्ते आणि वाढते नागरीकरण या समस्या सोडवण्याचे मोठे आव्हान आता नवनिर्वाचित नगरसेवकांसमोर असेल. भाजपचे 44 नगरसेवक महापालिकेत आक्रमक विरोधी पक्षाची भूमिका बजावतील, अशी चिन्हे आहेत. आजच्या या निकालाने वसई-विरारचे राजकीय समीकरण पूर्णपणे बदलून टाकले आहे.
हेही वाचा - AIMIM: राज्यात MIMचा ‘पतंग’ उंचावला! मुंबई-ठाण्यात एमआयएमची एंट्री, 58 उमेदवार आघाडीवर; महाविकास आघाडी-महायुतीसमोर नवं आव्हान