IRCTC Special Tour: महाशिवरात्रीचा पवित्र सण जवळ येत असताना शिवभक्तांसाठी एक आनंदाची बातमी समोर आली आहे. भारतीय रेल्वेची पर्यटन शाखा IRCTC कडून भाविकांसाठी खास ‘सप्त ज्योतिर्लिंग दर्शन यात्रा’ आयोजित करण्यात आली आहे. या यात्रेमुळे भक्तांना एका नियोजित आणि सुलभ प्रवासात देशातील सात प्रमुख ज्योतिर्लिंगांचे दर्शन घेण्याची संधी मिळणार आहे. विशेष म्हणजे या यात्रेत महाराष्ट्रातील तीन महत्त्वाच्या ज्योतिर्लिंगांचा समावेश करण्यात आला आहे.
दरवर्षी महाशिवरात्रीनिमित्त देशभरातून लाखो भाविक भगवान शंकराच्या दर्शनासाठी विविध तीर्थक्षेत्रांकडे जातात. मात्र वेगवेगळ्या ठिकाणांची तिकिटे, निवास आणि प्रवासाची आखणी करणे अनेकदा अवघड ठरते. हीच अडचण लक्षात घेऊन IRCTC ने भारत गौरव टुरिस्ट ट्रेनच्या माध्यमातून ही विशेष यात्रा आखली आहे. या योजनेमुळे भाविकांना एका ट्रेनमधून आरामदायी आणि सुव्यवस्थित प्रवास करता येणार आहे.
हेही वाचा: Oppo A6 Pro: पाण्यात पडला तरी बिघडणार नाही; बॅटरी चार्जिंग सुद्धा काही मिनिटात, Oppo चा हा नवीन फोन विक्रीसाठी उपलब्ध
ही सप्त ज्योतिर्लिंग दर्शन यात्रा एकूण 10 रात्री आणि 11 दिवसांची असणार आहे. प्रवासाची सुरुवात 6 फेब्रुवारी 2026 रोजी होणार असून, या ट्रेनमध्ये स्लीपर, 3AC आणि 2AC असे विविध प्रवासवर्ग उपलब्ध असतील. एकूण 705 प्रवाशांची क्षमता असलेल्या या ट्रेनमध्ये मोठ्या संख्येने भाविक सहभागी होऊ शकणार आहेत.
या यात्रेत समाविष्ट असलेल्या ज्योतिर्लिंगांची यादी शिवभक्तांसाठी विशेष आकर्षण ठरणार आहे. मध्य प्रदेशातील उज्जैन येथे महाकालेश्वर आणि ओंकारेश्वर ज्योतिर्लिंगांचे दर्शन घेतल्यानंतर ट्रेन गुजरातकडे मार्गक्रमण करेल. तेथे द्वारका येथील नागेश्वर आणि सोमनाथ येथील सोमनाथ ज्योतिर्लिंगाचे दर्शन घडणार आहे. त्यानंतर यात्रेचा पुढील टप्पा महाराष्ट्रात असणार असून, पुणे जिल्ह्यातील भीमाशंकर, नाशिकमधील त्र्यंबकेश्वर आणि छत्रपती संभाजीनगर येथील घृष्णेश्वर ज्योतिर्लिंगांचे दर्शन भाविकांना घेता येणार आहे.
ही सर्व ज्योतिर्लिंगे हिंदू धर्मातील 12 पवित्र ज्योतिर्लिंगांपैकी असून, धार्मिकदृष्ट्या त्यांना अनन्यसाधारण महत्त्व आहे. त्यामुळे एकाच यात्रेत सात ज्योतिर्लिंगांचे दर्शन घेण्याची ही संधी भक्तांसाठी अत्यंत खास मानली जात आहे.
हेही वाचा: Maharashtra Airports: हवाई दळणवळणाला गती! यवतमाळसह 'या' चार विमानतळांबाबत सरकारचा मोठा निर्णय
या ट्रेनमध्ये सिकंदराबाद, कामारेड्डी, निजामाबाद जंक्शन, धर्माबाद, मुदखेड जंक्शन, हुजूर साहिब नांदेड आणि पूर्णा जंक्शन या स्थानकांवरून भाविकांना चढण्याची आणि उतरायची सुविधा उपलब्ध असणार आहे. यात्रेची संपूर्ण माहिती आणि तिकीट बुकिंगसाठी भाविक IRCTCच्या अधिकृत वेबसाइटला भेट देऊ शकतात.
महाशिवरात्रीच्या पार्श्वभूमीवर आयोजित करण्यात आलेली ही विशेष यात्रा शिवभक्तांसाठी केवळ प्रवास नव्हे, तर एक अविस्मरणीय आध्यात्मिक अनुभव ठरणार असल्याची भावना व्यक्त केली जात आहे.