Chana Poha with Nitin Gadkari : नागपूर महानगरपालिका निवडणुकीच्या (NMC Election 2026) रणधुमाळीत केंद्रीय मंत्री नितीन गडकरी यांनी आपल्या खास शैलीत जुन्या आठवणींना उजाळा दिला आहे. 'चना पोहा विथ नितीनजी' या विशेष कार्यक्रमात अभिनेत्री गिरीजा ओक-गोडबोले यांनी त्यांची मुलाखत घेतली. यावेळी गडकरींनी सांगितले की, एकेकाळी राजकारणात भाजपला कोणी गांभीर्याने घेत नव्हते आणि उमेदवार उभे करायलाही लोक मिळत नसत. मात्र, विचारांशी असलेली निष्ठा आणि संघर्षातून पक्ष कसा उभा राहिला, याचे चित्रण त्यांनी आपल्या खुसखुशीत संवादातून मांडले.
पाणी टंचाई आणि राजांच्या वाड्यातील 'तो' कुत्रा
गडकरींनी नागपूरमधील पाणी प्रश्नाचा एक रंजक किस्सा सांगितला. त्या काळात नागपूरमध्ये पाण्यासाठी लोकांचे प्रचंड हाल व्हायचे. राजे तेजसिंगराव भोसले हे तेव्हा नगरसेवक होते आणि त्यांच्या वाड्यात त्यांनी काही कुत्रे पाळले होते. ते रात्रीच्या वेळी वाड्यात मोकळे असत. भाजपच्या कार्यकर्त्यांनी पाणी टंचाईविरोधात आंदोलन छेडले होते आणि काही लोक भोसलेंच्या वाड्यावर निषेध व्यक्त करण्यासाठी गेले होते. याच वेळी वाड्यातील एका कुत्र्याने भाजपच्या एका कार्यकर्त्याचा चावा घेतला. या घटनेनंतर शहरात वेगळेच वळण लागले आणि या निवडणुकीचे चित्र पूर्णपणे पालटून गेले.
'पाणी मागायला गेले की कुत्रा चावतो'; प्रचाराचा मुख्य मुद्दा
कुत्रा चावल्याच्या या घटनेचा भाजपने कल्पकतेने वापर केला. निवडणुकीच्या प्रचारात "पाणी मागायला जा आणि कुत्र्याचा चावा घ्या" हा मुद्दा काँग्रेसविरोधी वातावरणासाठी कळीचा ठरला. जनतेमध्ये या घटनेचा एवढा संताप होता की, त्याचा परिणाम थेट निकालावर झाला. गडकरींच्या मते, याच एका कुत्र्यामुळे नागपूरमध्ये भाजपला पहिल्यांदा महापालिका जिंकता आली. हा किस्सा ऐकताच कार्यक्रमात उपस्थित असलेल्या श्रोत्यांमध्ये एकच हशा पिकला.
हेही वाचा - Voter ID Photo Mismatch : नाव रवींद्र अन् फोटो महिलेचा... पुण्यात मतदाराची झाली मोठी पंचाईत, पाहा व्हिडीओ
राजकारणातील संस्कार आणि मूल्यांची घसरण
आजच्या राजकारणावर टिप्पणी करताना गडकरींनी काहीशी खंतही व्यक्त केली. ते म्हणाले की, "आम्ही काही साधू संत नव्हतो, पण संस्कारांमुळे घडलो." आणीबाणीच्या काळात अनेक कार्यकर्त्यांनी स्वतःचे आयुष्य समाजासाठी समर्पित केले, ज्यांना कधीच त्यांनी केलेल्या सेवेसाठी सत्तेचे फळ मिळाले नाही. मात्र, आजच्या काळात 'माझे काय होणार?' हाच प्रश्न राजकारण्यांना अधिक महत्त्वाचा वाटतो, ज्यामुळे समाजाचे आणि गरीबांचे प्रश्न मागे पडले आहेत. निष्ठेची जागा आता स्वार्थाने घेतल्याचे त्यांनी यावेळी प्रकर्षाने नमूद केले.
नागपूरच्या विकासावर बोलताना गडकरींनी स्पष्ट केले की, जनतेने नेहमीच त्यांच्यावर प्रेम केले आहे. 15 जानेवारी 2026 रोजी होणाऱ्या मतदानासाठी त्यांनी मतदारांना सुज्ञपणे मतदान करण्याचे आवाहन केले. विकासाचा फुगा नव्हे तर प्रत्यक्ष कामाच्या आधारावर मत मागावे, अशी भूमिका त्यांनी मांडली. नागपूरची संस्कृती, येथील खाद्यप्रेम आणि राजकारण यावर आधारित हा 'चना पोहा' कार्यक्रम सध्या सोशल मीडियावर चांगलाच चर्चेत आहे.
हेही वाचा - BMC Election 2026 : निवडणूक मतदान प्रक्रियेवर राज ठाकरेंचा संताप, म्हणाले, 'संपूर्ण प्रकार फ्रॉड...'