सिंधुदुर्ग: कलाकृतीच्या माध्यमातून भावना व्यक्त करणं ही कलाकाराची खरी ताकद असते. अशीच एक आगळीवेगळी अभिव्यक्ती सिंधुदुर्ग जिल्ह्यातील देवगड तालुक्यामधील गवाणे गावचे चित्रकार अक्षय मेस्त्री यांनी दाखवली आहे. जय महाराष्ट्र मराठी वृत्तवाहिनीच्या वर्धापन दिनानिमित्त त्यांनी आपल्या शैलीत एक खास शुभेच्छा दिली. तीही थेट नदीतील दगडावर साकारलेल्या चित्राच्या रूपाने.
कलेची साधना
अक्षय मेस्त्री हे मूळचे सिंधुदुर्गातील असून, स्टोन आर्ट या अनोख्या माध्यमातून आपली कला साकारतात. या वर्धापन दिनासाठी त्यांनी नदीतून एक छोटा गुळगुळीत दगड निवडून त्यावर जय महाराष्ट्र चॅनलसाठी खास चित्र तयार केलं. हे चित्र अवघ्या 15 ते 20 मिनिटांच्या अल्प वेळेत पूर्ण करण्यात आलं, हे विशेष.
या कलाकृतीचे मोजमाप अगदी सूक्ष्म आहे. फक्त 4 सेंटीमीटर उंच आणि 5 सेंटीमीटर रुंद. एवढ्या छोट्या पृष्ठभागावर त्यांनी अतिशय बारकाईने आणि कुशलतेने चित्र साकारलं आहे. एक्रिलिक रंगांच्या साहाय्याने साकारलेली ही कलाकृती आकर्षक आणि लक्षवेधी ठरते.
'जय महाराष्ट्र' वृत्तवाहिनीचे आज 13 व्या वर्षात पदार्पण, महाराष्ट्रातील तमाम प्रेक्षकांचे आभार
कलाकार आणि वृत्तवाहिनी यांच्यातील नातं
अक्षय मेस्त्री यांनी ही कलाकृती साकारत म्हटलं की, 'जय महाराष्ट्र वृत्तवाहिनी ही नेहमी कलाकारांना व्यासपीठ देण्याचं काम करत आली आहे. ग्रामीण भागातले कलाकार असोत किंवा नवोदित या चॅनलने त्यांच्या कलेला प्रोत्साहन दिलं आहे. म्हणूनच वर्धापन दिनानिमित्त काहीतरी वेगळं करावं, असं मनापासून वाटलं.'
दगडावर चित्र काढणं हे एक सामान्य गोष्ट नाही. यासाठी पाहिजे ती काटेकोर नियोजन, चिकाटी आणि कलात्मक दृष्टिकोन. नदीतील गुळगुळीत दगडाचा वापर करून स्टोन आर्ट साकारणं म्हणजे निसर्ग व कलेचं सुंदर मिश्रणच म्हणता येईल.
प्रेरणादायी आणि नवोदितांसाठी मार्गदर्शक
अक्षय मेस्त्री यांची ही कलाकृती सध्या सोशल मीडियावरही चांगलीच चर्चेत आहे. त्यांचे हे कार्य नवोदित कलाकारांसाठी एक प्रेरणा ठरत आहे. कलेला वय, जागा किंवा माध्यम याची अडचण नसते. ती केवळ भावनेची अभिव्यक्ती असते, हेच त्यांनी आपल्या कृतीतून दाखवून दिलं आहे.
ही कलाकृती त्यांच्या कला-प्रेमाचं आणि वृत्तवाहिनीबद्दलच्या कृतज्ञतेचं सुंदर उदाहरण ठरत आहे.