चंद्रपूर: चंद्रपुरात खासदार राजीव प्रताप रुडी यांच्या उपस्थितीत मोरवा फ्लाइंग क्लबचा भव्य उदघाटन सोहळा मोठ्या उत्साहात पार पडला. या कार्यक्रमाला अनेक मान्यवरांची उपस्थिती होती. या सोहळ्याला भाजपचे ज्येष्ठ नेते आणि माजी मंत्री सुधीर मुनगंटीवार यांनी देखील हजेरी लावली. मात्र, या उद्घाटन सोहळ्यात मुनगंटीवार यांनी केलेल्या एका वक्तव्यामुळे राजकीय वर्तुळात खळबळ उडाली आहे. कार्यक्रमादरम्यान भाषण करताना सुधीर मुनगंटीवार यांनी आपल्या मंत्रिपदाबाबत मोठा गौप्यस्फोट केला. "माझी मंत्रिपदाची खुर्ची खेचून घेण्यात आली आहे," असे स्पष्ट शब्दांत त्यांनी सांगितले. त्यांच्या या वक्तव्याने अनेक तर्कवितर्कांना चालना मिळाली असून, मुनगंटीवारांचं मंत्रिपद नेमकं कुणी खेचलं? हा प्रश्न आता राजकीय वर्तुळात चर्चेचा विषय ठरला आहे.
हेही वाचा: Sharad Pawar : शरद पवारांचा सर्वात मोठा गौप्यस्फोट
मुनगंटीवारांच्या वक्तव्याचा राजकीय अर्थ?
भाजपचे एक वजनदार नेते म्हणून ओळखले जाणारे सुधीर मुनगंटीवार हे राज्याच्या भाजप सरकारमध्ये अर्थमंत्री राहिले आहेत. मात्र, शिंदे-फडणवीस सरकारमध्ये त्यांना मंत्रिपद न मिळाल्याने त्यांच्या समर्थकांमध्ये नाराजी होती. आता त्यांच्या या वक्तव्यामुळे भाजपमधील अंतर्गत गटबाजी आणि त्यांच्यावर झालेल्या राजकीय निर्णयांविषयी चर्चा सुरू झाली आहे.
भाजपमध्ये अंतर्गत संघर्षाचे संकेत?
भाजपमध्ये मोठ्या नेत्यांना बाजूला सारले जात असल्याच्या चर्चा सुरू असतानाच मुनगंटीवार यांच्या या वक्तव्याने भाजपमधील अंतर्गत धुसफूस अधिकच उघड झाली आहे. फडणवीस आणि शिंदे गटाच्या मंत्रिमंडळ विस्तारावेळी काही ज्येष्ठ नेत्यांना संधी न मिळाल्याने नाराजीचा सूर उमटला होता. त्यामुळे मुनगंटीवारांचे हे वक्तव्य याच पार्श्वभूमीवर महत्त्वाचे मानले जात आहे.
हेही वाचा: Mahashivratri 2025 Upay : शिवलिंगासमोर ३ वेळा टाळी, महाशिवरात्रीला करा उपाय
दरम्यान सुधीर मुनगंटीवार हे भाजपचे ज्येष्ठ आणि प्रभावी नेते आहेत. त्यामुळे त्यांच्या वक्तव्याचा पक्षश्रेष्ठींकडून कोणता प्रतिसाद येतो, याकडे सर्वांचे लक्ष लागले आहे. आगामी लोकसभा निवडणुकीच्या पार्श्वभूमीवर भाजपमधील नेत्यांची नाराजी आणि अंतर्गत समीकरणे कशी बदलतात, हे पाहणे महत्त्वाचे ठरणार आहे.