किशोरी पेडणेकर यांची प्रतिक्रिया – "सालियान कुटुंबाला सव्वातीन वर्षांनी जाग कशी आली?"
दिवंगत दिशा सालियान हिच्या कुटुंबाने पुन्हा एकदा तिच्या मृत्यूबाबत न्यायालयात धाव घेतली असून, तिच्या हत्येची नव्याने चौकशी करण्याची मागणी केली आहे. दिशाच्या वडिलांनी केलेल्या आरोपांमध्ये त्यांनी अधिक स्पष्टपणे म्हटले आहे की, त्यांच्या मुलीवर सामूहिक बलात्कार करून तिची हत्या करण्यात आली. तसेच, या प्रकरणात माजी महापौर किशोरी पेडणेकर यांनी दिशाभूल केल्याचा आरोप देखील त्यांनी लावला आहे.
सालियन कुटुंबाच्या याचिकेत आदित्य ठाकरे, सूरज पांचोली, दिनो मोर्या आणि मुंबई पोलिसांवर गंभीर आरोप लावण्यात आले आहेत. "आदित्यच्या आड चित्रपटातील शक्ती कपूर लपलाय," असा गंभीर आरोप मंत्री नितेश राणे यांनी केला आहे. तसेच, "मविआ सरकार आदित्यला वाचवत होतं. त्यामुळे आता आदित्य ठाकरे यांनी राजीनामा द्यावा," अशीही मागणी नितेश राणेंनी केली आहे.
नितेश राणेंचे आरोप
"मी सुरुवातीपासूनच हे सांगत होतो की दिशाच्या मृत्यूप्रकरणात काहीतरी मोठं षड्यंत्र आहे," असे वक्तव्य नितेश राणे यांनी केले. "या प्रकरणात आदित्य ठाकरे आणि त्यांच्या पाठिशी असलेले काही फिल्म इंडस्ट्रीतील लोक लपले आहेत. त्यामुळेच या प्रकरणाची चौकशी योग्य पद्धतीने करण्यात आली नाही," असा आरोपही त्यांनी केला.
पोलीस हालचाली आणि सुरक्षा प्रश्न
दिशाच्या कुटुंबाने नव्याने आरोप केल्यानंतर पोलीस तातडीने त्यांच्या घरी पोहोचले. या प्रकरणामुळे सालियन कुटुंबाला पोलीस संरक्षण दिले जाणार का? याकडे सर्वांचे लक्ष लागले आहे.
राणे पिता-पुत्रांचे षड्यंत्र - किशोरी पेडणेकर यांची प्रतिक्रिया
या आरोपांवर किशोरी पेडणेकर यांनी जोरदार प्रत्युत्तर दिले आहे. "माझी सालियन कुटुंबाशी काही विशेष ओळख नाही. तीन वर्षांपूर्वी मी एकदाच त्यांच्या घरी गेले होते आणि तेव्हाही माझ्यासोबत मीडिया आणि पक्षाचे लोक होते," असे त्यांनी स्पष्ट केले. "सव्वातीन वर्षांनंतरच या कुटुंबाच्या मनात वेगळ्या गोष्टी येत असतील, तर त्यामागे कुणाचा हात आहे?" असा सवालही त्यांनी उपस्थित केला.
त्याचप्रमाणे, "दिशाच्या मृत्यूनंतर तिचे वडील अनेकदा महापौर कार्यालयात येत. मी त्यांना नेहमीच माध्यमांसमोर भेटलेय. आता अचानक एवढ्या वर्षांनी हा मुद्दा उपस्थित केला जातोय, यामागे राणे पिता-पुत्रांचे षड्यंत्र आहे," असा आरोप त्यांनी केला.
दिशा सालियान प्रकरण पुन्हा एकदा चर्चेत आले असून, या प्रकरणाची नव्याने चौकशी होणार का, याकडे सर्वांचे लक्ष लागले आहे. नितेश राणे यांनी आदित्य ठाकरे यांना थेट टार्गेट करत मोठे आरोप केले आहेत, तर किशोरी पेडणेकर यांनी या आरोपांना जोरदार प्रत्युत्तर दिले आहे. आता न्यायालय आणि प्रशासन या प्रकरणी पुढे काय निर्णय घेते, हे पाहणे महत्त्वाचे ठरणार आहे.