Ladki Bahin Yojana: राज्यातील लाडक्या बहिणींसाठी दिलासादायक आणि आनंदाची बातमी समोर येत आहे. लाडकी बहीण योजनेअंतर्गत लाभार्थी महिलांना लवकरच तीन महिन्यांचा हप्ता एकत्र मिळण्याची शक्यता असून, त्यामुळे थेट 4500 रुपये त्यांच्या खात्यात जमा होणार आहेत. गेल्या काही महिन्यांपासून हप्ता न मिळाल्याने नाराजी व्यक्त करणाऱ्या महिलांसाठी ही बातमी मोठा दिलासा देणारी ठरणार आहे.
राज्य सरकारने विधानसभा निवडणुकीच्या पार्श्वभूमीवर सुरू केलेली लाडकी बहीण योजना अल्पावधीतच लोकप्रिय ठरली. या योजनेअंतर्गत पात्र महिलांना दरमहा आर्थिक मदत दिली जाते. मात्र, योजनेच्या अंमलबजावणीदरम्यान काही तांत्रिक अडचणी, केवायसी संदर्भातील त्रुटी तसेच अर्जांची पडताळणी यामुळे अनेक महिलांचा हप्ता वेळेवर जमा झाला नाही. काही ठिकाणी महिलांनी थेट रस्त्यावर उतरून आपली नाराजीही व्यक्त केली होती.
महिला व बालकल्याण विभागाकडून या तक्रारींची गंभीर दखल घेण्यात आली. केवायसी पूर्ण असूनही पैसे न मिळालेल्या लाभार्थींची माहिती गोळा करण्यासाठी घरोघरी तपासणीचे आदेश देण्यात आले. तसेच नियमांबाहेर गेलेले अर्ज आणि अपात्र लाभार्थ्यांची छाननीही सुरू करण्यात आली. या प्रक्रियेमुळे काही काळासाठी हप्ते थांबले होते.
आता मात्र सरकारकडून सकारात्मक संकेत मिळत आहेत. नोव्हेंबर, डिसेंबर आणि जानेवारी या तीन महिन्यांचा थकित हप्ता एकत्र देण्याचा निर्णय घेतला जाऊ शकतो. त्यामुळे पात्र महिलांना एकदम ४५०० रुपये मिळणार असल्याची चर्चा आहे. काही महिलांच्या खात्यात आधीच एक-दोन महिन्यांचे पैसे जमा झाले असून, उर्वरित लाभार्थ्यांना थकीत रक्कम एकत्र दिली जाण्याची शक्यता वर्तवली जात आहे.
दरम्यान, लाडकी बहीण योजनेच्या रकमेबाबत भविष्यात वाढ होण्याचे संकेतही देण्यात आले आहेत. नुकतेच मंत्री हसन मुश्रीफ यांनी योजनेबाबत वक्तव्य करताना, योग्य वेळी निधीची व्यवस्था करून महिलांना अधिक रक्कम देण्याचा सरकारचा मानस असल्याचे सूचित केले. सध्या १५०० रुपये मिळत असलेला मासिक हप्ता पुढील काळात २१०० रुपयांपर्यंत वाढवला जाऊ शकतो, अशी शक्यता व्यक्त केली जात आहे.
लाडकी बहीण योजना केवळ आर्थिक मदत देणारी योजना नसून, महिलांच्या सक्षमीकरणाच्या दिशेने उचललेले महत्त्वाचे पाऊल मानले जाते. त्यामुळे हप्ता वेळेवर आणि पारदर्शक पद्धतीने मिळावा, अशी अपेक्षा महिलांकडून व्यक्त केली जात आहे. आता तीन महिन्यांचा हप्ता एकत्र मिळाल्यास अनेक कुटुंबांना आर्थिक आधार मिळणार असून, महिलांमधील नाराजी कमी होण्यास मदत होणार आहे.
पुढील काही दिवसांत यासंदर्भातील अधिकृत घोषणा होण्याची शक्यता असून, राज्यातील लाखो लाडक्या बहिणी या निर्णयाकडे उत्सुकतेने पाहत आहेत.