Pooja Khedkar: बडतर्फ प्रोबेशनरी IAS अधिकारी पूजा खेडकर यांच्या कुटुंबाविरुद्ध नवी मुंबई पोलिसांनी लूकआउट सर्क्युलर जारी केले आहे. पोलिसांचा शोध आता पूजा खेडकर वडील दिलीप खेडकर आणि आई मनोरमा खेडकर यांच्यावर केंद्रीत आहे, जे गेल्या नऊ दिवसांपासून फरार आहेत. या प्रकरणाशी संबंधित एका अज्ञात व्यक्तीचा शोध पोलिस घेत आहेत. दरम्यान, खेडकर कुटुंबाचा ड्रायव्हर-कम-बॉडीगार्ड प्रफुल्ल साळुंखे पोलिस कोठडीत आहे.
कुटुंबीयांचा पळून जाण्याचा प्रकार
पोलिसांच्या माहितीप्रमाणे, नवी मुंबई पोलिस आणि पुणे पोलिसांनी मनोरमा खेडकर यांच्या पुणे येथील घराला चौकशीसाठी भेट दिली त्या दिवशीच दिलीप खेडकर, मनोरमा खेडकर आणि त्यांचे अंगरक्षक पळून गेले. प्रारंभी दिलीप आणि त्यांचा अंगरक्षक लँड क्रूझर गाडीतून पळून गेले, तर मनोरमा खेडकर यांनी सुमारे 30 मिनिटांनी घटनास्थळ सोडले. अंदाजे दुपारी 12 ते 3 वाजेच्या दरम्यान तिघेही आरोपी फरार झाले.
हेही वाचा - Sudha Murthy Threatened: दूरसंचार अधिकारी असल्याचे भासवून स्कॅमरकडून सुधा मूर्तींना धमकी; आरोपीविरुद्ध गुन्हा दाखल
पोलिसांच्या अंदाजानुसार, दिलीप खेडकर आणि त्यांचा अंगरक्षक पुण्याहून अहमदनगरकडे गाडीने निघाले. दिलीप खेडकर यांनी अंगरक्षकाला गाडीतून उतरवले आणि ते स्वतः लँड क्रूझरने फरार झाले. त्यानंतर अंगरक्षक थेट धुळे येथे पोहोचला. पोलिसांना संशय आहे की, दिलीप खेडकर गाडी कुठेतरी लपवून फरार झाले आहेत. अद्याप लँड क्रूझर पोलिसांच्या ताब्यात आलेली नाही.
गुन्ह्याची नोंद आणि चौकशी
पोलिसांनी दिलीप खेडकर यांच्याविरुद्ध ट्रक क्लीनर अपहरणाचा गुन्हा नोंदवला आहे, तर मनोरमा खेडकर यांच्याविरुद्ध सरकारी कामात अडथळा आणणे आणि पुरावे नष्ट केल्याचा गुन्हा दाखल केला आहे. पोलिसांनी खेडकर कुटुंबाच्या पुण्यातील घराला चौकशीसाठी भेट दिली असता, त्यांना अपहरणात वापरलेली गाडी सापडली.
हेही वाचा - Latur Crime News: उदगीर महाविद्यालयात मोठा घोटाळा! 70 बनावट प्रमाणपत्रांमुळे लाखोंची फसवणूक, संस्थाचालक फरार
दरम्यान, पूजाची आई मनोरमा खेडकर पोलिसांशी उद्धटपणे वागली. त्यांनी चौकशीसाठी गेट उघडण्यास नकार दिला आणि पोलिसांवर कुत्रे सोडण्याचा प्रयत्न केला, असा आरोप करण्यात आला आहे. सध्या पोलीस खेडकर कुटुंबीयांचा शोध घेण्यासाठी प्रयत्न करत आहेत. तसेच लूकआउट सर्क्युलर जारी करून त्यांचा आंतरराज्यीय शोध घेत आहेत.