Ajit Pawar: दिवंगत राष्ट्रवादी काँग्रेस पक्षाचे अध्यक्ष अजित पवार यांच्या स्मृतींना राष्ट्रीय स्तरावर आदरांजली वाहण्यासाठी राष्ट्रवादी युवा काँग्रेसकडून चार दिवसीय देशव्यापी कलश यात्रेचे आयोजन करण्यात आले आहे. ४ ते ७ फेब्रुवारीदरम्यान ही यात्रा पार पडणार असून, देशातील प्रमुख पवित्र नद्या आणि तीर्थक्षेत्रांमध्ये अजित पवार यांच्या अस्थींचे विसर्जन केले जाणार आहे.
या कलश यात्रेचा मुख्य उद्देश अजित पवार यांच्या सामाजिक, राजकीय आणि सार्वजनिक जीवनातील योगदानाची आठवण करून देणे हा आहे. हरिद्वार, प्रयागराज, वाराणसी यांसारख्या धार्मिकदृष्ट्या महत्त्वाच्या स्थळांवर विधीपूर्वक अस्थी विसर्जन करण्यात येणार आहे. याशिवाय, ही यात्रा १४ हून अधिक राज्यांमधून प्रवास करणार असून, विविध भागांतील पक्ष कार्यकर्ते, पदाधिकारी आणि समर्थक मोठ्या संख्येने सहभागी होणार आहेत.
हेही वाचा: Sharad Pawar: 'सुनेत्रा पवारांना संधी मिळाली याचा...'; उपमुख्यमंत्री सुनेत्रा पवार यांच्या शपथविधीवर शरद पवारांची पहिली प्रतिक्रिया
मंगळवारी या यात्रेच्या प्रारंभावेळी अनेक अस्थी कलशांचे दृश्य समोर आले. वेगवेगळ्या पवित्र नद्यांमध्ये विसर्जनासाठी हे कलश नेण्यात येणार असून, प्रत्येक ठिकाणी श्रद्धांजली सभांचे आयोजन केले जाणार आहे. या सभांमधून अजित पवार यांच्या विचारधारेचा, कार्यशैलीचा आणि पक्ष बांधणीतील भूमिकेचा आढावा घेतला जाणार आहे.
एनसीपीच्या नेत्यांच्या मते, ही यात्रा केवळ श्रद्धांजलीपुरती मर्यादित नसून, पक्षातील एकजुटीचे आणि भावनिक बांधिलकीचे प्रतीक आहे. अजित पवार यांनी पक्षासाठी आणि समाजासाठी दिलेले योगदान अविस्मरणीय असून, त्यांचे विचार पुढील पिढीपर्यंत पोहोचवणे हीच या यात्रेमागची भूमिका असल्याचे पक्ष प्रवक्त्यांनी स्पष्ट केले.
या यात्रेच्या तयारीसाठी युवा काँग्रेसचे कार्यकर्ते सक्रियपणे काम करत आहेत. विविध राज्यांत समन्वय समित्या स्थापन करण्यात आल्या असून, स्थानिक पातळीवर कार्यक्रमांचे नियोजन केले जात आहे. यात्रेदरम्यान पक्षाचे नेते स्थानिक नागरिकांशी संवाद साधणार असून, राष्ट्रवादी काँग्रेसच्या भूमिका, योजना आणि सामाजिक दृष्टिकोनाबाबत माहिती देण्यात येणार आहे.
हेही वाचा:Rohit Pawar Tweet: ‘मा. अजितदादांचा अवमान करणारी…’ रोहित पवार संतापले; नेमकं प्रकरण काय?
यात्रेचा समारोप भव्य कार्यक्रमाने होणार असून, त्यात पक्षाचे वरिष्ठ नेते, युवा कार्यकर्ते आणि समर्थक सहभागी होतील. अजित पवार यांच्या जीवनातील महत्त्वाच्या क्षणांना उजाळा देणारे विशेष कार्यक्रम यावेळी आयोजित केले जातील. काशी येथे होणाऱ्या कार्यक्रमासाठी पक्ष पातळीवर तयारी सुरू असून, लवकरच त्याबाबत सविस्तर माहिती जाहीर करण्यात येणार आहे.
ही कलश यात्रा अजित पवार यांच्या स्मृती जिवंत ठेवण्याबरोबरच, राष्ट्रवादी काँग्रेसच्या कार्यकर्त्यांमध्ये नवचैतन्य निर्माण करणारी ठरेल, असा विश्वास पक्ष नेतृत्वाकडून व्यक्त करण्यात येत आहे.