अकोला: शहरातील जठारपेठ भागात घडलेल्या एका धक्कादायक घटनेने नागरिकांमध्ये अस्वस्थता निर्माण झाली आहे. शिक्षणासाठी ग्रामीण भागातून अकोल्यात आलेल्या एका अल्पवयीन मुलीचा विनयभंग करत, तिला जबरदस्तीने फ्लॅटमध्ये कोंडून ठेवण्यात आल्याची घटना समोर आली आहे. या घटनेमुळे पालकांनी आपल्या मुलींच्या सुरक्षिततेबाबत अधिक सतर्क राहण्याची गरज अधोरेखित झाली आहे.
अभ्यासाच्या बहाण्याने फ्लॅटवर बोलावलं
सदर मुलगी ही अकोल्यात शिक्षणासाठी राहत असून, तिच्या ओळखीच्या मित्राच्या घरी अभ्यासासाठी गेली होती. या मित्राच्या फ्लॅटवर पोहोचल्यानंतर, दुसऱ्या एका तरुणाने तिच्याशी अश्लील वर्तन करत विनयभंग केला. पीडित मुलीला धमकावत, ही बाब कोणालाही सांगितल्यास गंभीर परिणाम भोगावं लागेल अशी धमकी देण्यात आली. यानंतर आरोपीने तिच्या सुटकेचा मार्ग रोखण्यासाठी तिला फ्लॅटमध्ये एकटीला कोंडून ठेवले आणि दरवाज्याला बाहेरून लॉक लावला.
विश्व हिंदू परिषदेच्या कार्यकर्त्यांची तत्परता
या संपूर्ण प्रकाराची माहिती विश्व हिंदू परिषदेच्या स्थानिक कार्यकर्त्यांना मिळाल्यानंतर त्यांनी तातडीने पोलिसांना माहिती दिली. पोलिसांबरोबर कार्यकर्ते घटनास्थळी पोहोचले आणि फ्लॅट उघडून पीडित मुलीची सुटका केली. या दरम्यान आरोपीला पकडून त्याच्यावर कारवाई करण्यात आली आहे.
हेही वाचा:यवतमाळमध्ये 14 पाकिस्तानी आणि 1 बांगलादेशी नागरिक आढळले; पोलिस यंत्रणा सतर्क
आरोपीविरुद्ध गुन्हा दाखल
या प्रकरणात सिव्हिल लाईन पोलीस ठाण्यात आरोपीविरोधात भारतीय दंड विधानाच्या संबंधित कलमान्वये विनयभंग, धमकी आणि जबरदस्तीने डांबून ठेवण्याचे गुन्हे दाखल करण्यात आले आहेत. आरोपीचं नाव नोवेल खान नवाब अली असं असून, तो यापूर्वीही काही लहान मोठ्या गुन्ह्यांत गुंतलेला असल्याची माहिती मिळत आहे.
नागरिकांमध्ये संताप, पोलिसांकडून गस्त वाढवली
या घटनेनंतर परिसरातील नागरिकांमध्ये संतापाचं वातावरण असून, सुरक्षा यंत्रणांनी अशा घटनांना आळा घालण्यासाठी अधिक सक्रिय व्हावं, अशी मागणी केली जात आहे. पोलिसांकडून जठारपेठ आणि परिसरात गस्त वाढवण्यात आली असून, विद्यार्थिनींच्या वसतिगृहांवर देखील नजर ठेवण्यात येणार असल्याची माहिती सूत्रांनी दिली आहे.
या घटनेमुळे पुन्हा एकदा मुलींच्या सुरक्षिततेचा प्रश्न ऐरणीवर आला आहे. अशा प्रकारांची पुनरावृत्ती टाळण्यासाठी समाज आणि प्रशासन दोघांनीही सजग राहणं गरजेचं आहे.