Ajit Pawar Last Rites in Baramati : उपमुख्यमंत्री अजित पवार यांचे पार्थिव आज, 28 जानेवारी 2026 रोजी सायंकाळी 4:00 वाजल्यापासून बारामती येथील विद्याप्रतिष्ठान, विद्यानगरी चौक येथील मैदानात नागरिकांच्या अंत्यदर्शनासाठी ठेवण्यात आले आहे. आज रात्री उशिरापर्यंत जनसमुदायाला 'अजितदादां'चे अंत्यदर्शन घेता येईल. उद्या, 29 जानेवारी रोजी सकाळी 9:00 वाजता गदिमा सभागृहापासून त्यांची अंत्ययात्रा निघेल. ही यात्रा गदिमा चौक आणि विद्यानगरी चौक मार्गे विद्याप्रतिष्ठानच्या मैदानावर पोहोचेल, जिथे त्यांना अखेरचा निरोप दिला जाईल.
शासकीय इतमामात अंत्यसंस्कार आणि मान्यवरांची उपस्थिती
अजित पवार यांच्या पार्थिवावर उद्या सकाळी 11:00 वाजता विद्याप्रतिष्ठानच्या मैदानावर पूर्ण शासकीय इतमामात (State Honours) अंत्यसंस्कार केले जाणार आहेत. या प्रसंगी त्यांना मानवंदना देण्यासाठी देशाचे पंतप्रधान नरेंद्र मोदी आणि केंद्रीय गृहमंत्री अमित शाह विशेष विमानाने पुण्यात दाखल होऊन बारामतीत उपस्थित राहणार आहेत. यासोबतच मुख्यमंत्री देवेंद्र फडणवीस, उपमुख्यमंत्री एकनाथ शिंदे यांच्यासह अनेक राष्ट्रीय आणि राज्यस्तरीय नेते अजित पवारांना आदरांजली वाहण्यासाठी येणार आहेत.
हेही वाचा - Ajit Pawar Plane Crash : 'विमान ढगात गेलं अन् भीतीने पोटात गोळा आला'; अजितदादांनी सांगितला होता अंगावर काटा आणणारा 'तो' अनुभव
राज्यात 3 दिवसांचा शासकीय दुखवटा
राज्य सरकारने उपमुख्यमंत्री अजित पवार यांच्या सन्मानार्थ 28 ते 30 जानेवारी 2026 या तीन दिवसांचा शासकीय दुखवटा जाहीर केला आहे. या काळात राज्यातील सर्व शासकीय इमारतींवरील राष्ट्रध्वज अर्ध्यावर उतरवण्यात येईल आणि कोणतेही शासकीय मनोरंजन कार्यक्रम आयोजित केले जाणार नाहीत. तसेच, त्यांच्या निधनामुळे बुधवार, 28 जानेवारी रोजी राज्यातील सर्व शासकीय कार्यालये आणि शाळांना सुट्टी जाहीर करण्यात आली असून संपूर्ण महाराष्ट्रात बाजारपेठा बंद ठेवून श्रद्धांजली वाहिली जात आहे.
प्रचारादरम्यान झाला भीषण अपघात
बारामतीमध्ये जिल्हा परिषद आणि पंचायत समितीच्या निवडणूक प्रचारासाठी अजित पवार आज सकाळी मुंबईहून निघाले होते. त्यांच्या आज दिवसभरात 4 महत्त्वाच्या सभा होणार होत्या. मात्र, सकाळी 8:40 च्या सुमारास बारामती विमानतळावर लँडिंग करताना त्यांच्या विमानाला भीषण अपघात झाला. हा अपघात इतका भयानक होता की विमान पूर्णपणे जळून खाक झाले आणि त्यात अजित पवारांसह अन्य 6 जणांचा दुर्दैवी मृत्यू झाला. एका धडाडीच्या लोकनेत्याचा अशा प्रकारे अंत होणे हे महाराष्ट्राच्या राजकारणासाठी अपार भरून न येणारे नुकसान आहे.
हेही वाचा - Ajit Pawar Plane Crash: अजित पवारांच्या जाण्याने कुटुंबीयांसाठी न भरून निघणारी पोकळी! कुटुंबात कोणाच्या होते सर्वात जवळ?