मुंबई: पहलगाम दहशतवादी हल्ल्याला प्रत्युत्तर म्हणून भारताने 'ऑपरेशन सिंदूर' अंतर्गत दहशतवाद्यांचे अड्डे उद्ध्वस्त केले. भारतीय सैन्याने पाकिस्तान आणि पीओजेकेमधील 9 दहशतवादी संघटनांच्या तळांवर क्षेपणास्त्रांनी हल्ला केला. सध्या संपूर्ण देशात 'ऑपरेशन सिंदूर' बद्दल चर्चा सुरू आहे. या यशाबद्दल संपूर्ण देश भारतीय सैन्याचे अभिनंदन करत आहे. दरम्यान, काँग्रेस नेते विजय वडेट्टीवार यांनी 'ऑपरेशन सिंदूर'च्या यशाबद्दल आपली भूमिका स्पष्ट केली आहे.
दरम्यान, पहलगाम दहशतवादी हल्ला आणि सर्वपक्षीय बैठकीबद्दल बोलताना विजय वडेट्टीवार यांनी स्पष्ट केलं की, 'सरकारची स्वतःची भूमिका आहे. दहशतवाद्यांनी पहलगामला भेट देण्यासाठी आलेल्या लोकांना ठार मारले. या दहशतवादी हल्ल्यात निष्पाप लोकांना आपले प्राण गमवावे लागले. हे खूप दुर्दैवी आहे. यानंतर, काँग्रेसनेच सरकारला स्पष्ट सांगितले होते की, दहशतवाद्यांवर कोणतीही ठोस पावले उचलली गेली आणि पाकिस्तानला धडा शिकवण्यासाठी कोणतीही कारवाई केली गेली तरी विरोधी पक्ष त्यात सरकारला पूर्ण पाठिंबा देईल. हा विषय सर्वपक्षीय बैठकीच्या मुख्य अजेंड्यात असू शकत नाही. पण जर सरकार खरोखरच पाकिस्तानला प्रत्युत्तर देऊ इच्छित असेल तर आमचा पाठिंबा त्याच्यासोबत असेल.'
हेही वाचा - कल्याणच्या रुक्मिणीबाई रुग्णालयावर केडीएमसी आयुक्तांचा सरप्राइज स्ट्राईक
'ऑपरेशन सिंदूर' बाबत राजकारणाच्या आरोपांवर विजय वडेट्टीवार म्हणाले की, 'मी पृथ्वीराज चव्हाण यांचे विधान वाचलेले नाही. परंतु सरकारच्या भूमिकेबाबत अनेक गोष्टी समोर येतात. जेव्हा दहशतवादी हल्ल्यांमध्ये निष्पाप लोकांचे प्राण जातात तेव्हा सरकारला त्यातून भावनिक किंवा राजकीय फायदा मिळू शकतो हे उघड आहे. पण अशा वेळी, देशाची एकता आणि सुरक्षा हा सर्वात मोठा मुद्दा असला पाहिजे.'
हेही वाचा - आमच्या भूमीवर जर कोणी दहशतवाद केला तर ते कदापी खपवून घेणार नाही; उज्ज्वल निकम आक्रमक
ऑपरेशन 'सिंदूर'च्या नावावर पृथ्वीराज चव्हाण यांनी उपस्थित केले प्रश्न -
भावनांच्या बळावर युद्ध जिंकता येत नाही, असं विधान काँग्रेसचे ज्येष्ठ नेते पृथ्वीराज चव्हाण यांनी बुधवारी केले. त्यांनी म्हटलं की, भावनिक फायद्यासाठी सरकारने 'ऑपरेशन सिंदूर' हे नाव निवडले का? युद्ध हे प्रतीकात्मकता किंवा भावनांनी नव्हे तर बंदुका, विमाने आणि बॉम्ब वापरून लढले जाते. तथापि, त्यांनी माध्यमांना सांगितले की, सोशल मीडियावर चुकीची माहिती आणि खोट्या अजेंडाचा प्रसार टाळण्यासाठी सरकारने नियमितपणे लोकांसोबत तपशील शेअर केले पाहिजेत, असं मतही यावेळी चव्हाण यांनी व्यक्त केलं.