T20 World Cup 2026: आयसीसी टी-20 विश्वचषक 2026 मध्ये सूर्यकुमार यादवच्या नेतृत्वाखाली भारतीय संघाने आपला विजयी धडाका कायम राखला आहे. सलग पहिले 3 सामने जिंकून आणि 6 गुण मिळवून भारताने दिमाखात सुपर 8 फेरीमध्ये प्रवेश निश्चित केला आहे. साखळी फेरीतील अजून एक सामना शिल्लक असला तरी, भारताचे पुढील फेरीतील स्थान आणि संभाव्य वेळापत्रक आता समोर आले आहे. भारतीय संघ आपल्या गटात अव्वल स्थानी राहून पुढील आव्हानांना सामोरे जाण्यासाठी सज्ज झाला आहे.
दक्षिण आफ्रिका आणि वेस्ट इंडिजशी पडणार गाठ
भारतीय क्रिकेट संघ सुपर 8 मध्ये पोहोचल्यानंतर आता त्यांचा सामना जगातील बलाढ्य संघांशी होणार आहे. या फेरीसाठी भारताच्या गटातील दोन प्रतिस्पर्धी संघ निश्चित झाले आहेत. भारताचा सामना दक्षिण आफ्रिका आणि वेस्ट इंडिज या शक्तिशाली संघांशी होईल. आयसीसीच्या वेळापत्रकानुसार, साखळी फेरी संपल्यानंतर टीम इंडिया 22 फेब्रुवारी रोजी मैदानात उतरेल. या दिवशी भारताचा सुपर 8 मधील पहिला सामना दक्षिण आफ्रिकेविरुद्ध होईल. हा हाय-व्होल्टेज सामना जगातील सर्वात मोठ्या क्रिकेट स्टेडियमवर, म्हणजेच अहमदाबाद येथील नरेंद्र मोदी स्टेडियमवर खेळवला जाईल.
चेन्नई आणि कोलकात्यात रंगणार पुढील सामने
22 फेब्रुवारीच्या सामन्यानंतर, भारतीय संघ 26 फेब्रुवारी रोजी आपला दुसरा सुपर 8 सामना खेळण्यासाठी चेन्नईमध्ये उतरेल. या दिवशी भारताचा प्रतिस्पर्धी संघ अद्याप निश्चित झालेला नाही; मात्र, तो ऑस्ट्रेलिया किंवा झिम्बाब्वे यांपैकी एक असेल, हे लवकरच स्पष्ट होईल. यानंतर, भारतीय संघ आपला शेवटचा सुपर 8 सामना 1 मार्च रोजी खेळेल. हा सामना वेस्ट इंडिजविरुद्ध असून ऐतिहासिक ईडन गार्डन्स, कोलकाता येथे पार पडणार आहे. वेस्ट इंडिजने आपल्या प्रभावी कामगिरीच्या जोरावर आधीच सुपर 8 मधील स्थान पक्के केले असल्याने या सामन्याकडे सर्वांचे लक्ष लागले आहे.
हेही वाचा - Vaibhav Suryavanshi : परिक्षेच्या आधीच वैभवचा निकाल! अंडर-19 विश्वविजेता दहावीच्या परीक्षेला बसणार नाही; स्वत: वडिलांनी सांगितलं कारण
सुपर 8 मधील सर्व संघांचे चित्र लवकरच स्पष्ट होणार
आतापर्यंत भारत, दक्षिण आफ्रिका, वेस्ट इंडिज, श्रीलंका आणि न्यूझीलंड या 5 संघांनी सुपर 8 मधील आपले स्थान निश्चित केले आहे. उर्वरित 3 संघांची नावे येत्या 2 दिवसांत अंतिम होतील. दुसऱ्या गटात श्रीलंका आणि न्यूझीलंड यांच्यासोबत पाकिस्तान किंवा अमेरिका आणि इंग्लंड किंवा इटली यांच्यापैकी प्रत्येकी एक संघ पुढे जाण्याची शक्यता आहे. या सर्व घडामोडींनंतर टी-20 विश्वचषकाचा थरार अधिकच वाढणार असून भारतीय चाहत्यांना मोठ्या सामन्यांची मेजवानी मिळणार आहे.