India vs Pakistan: आयसीसी टी20 विश्वचषक 2026 सध्या 'सुपर 8' च्या रोमांचक वळणावर आहे. क्रिकेट विश्वाचे लक्ष आता सेमीफायनलकडे लागले असून, चाहत्यांसाठी सर्वात मोठी आनंदाची बातमी म्हणजे अंतिम फेरीत भारत आणि पाकिस्तान पुन्हा एकदा आमनेसामने येण्याची शक्यता अद्याप कायम आहे. गट टप्प्यात कोलंबो येथे झालेल्या हाय-व्होल्टेज सामन्यात टीम इंडियाने पाकिस्तानचा 61 धावांनी पराभव केला होता. आता हे दोन्ही पारंपरिक प्रतिस्पर्धी थेट 8 मार्च रोजी होणाऱ्या अंतिम सामन्यात भिडू शकतात.
अंतिम सामन्याचे रंजक समीकरण
सुपर 8 मध्ये भारत आणि पाकिस्तान वेगवेगळ्या गटात (गट 1 आणि गट 2) असल्याने उपांत्य फेरीपूर्वी त्यांचा सामना होणार नाही. मात्र, अंतिम फेरीत एकत्र येण्यासाठी दोन्ही संघांना आपापल्या गटात 'समान स्थान' मिळवावे लागेल. जर भारत गट 1 मध्ये अव्वल (पहिल्या) स्थानावर राहिला, तर पाकिस्तानलाही गट 2 मध्ये पहिले स्थान मिळवावे लागेल. तसेच, जर भारत दुसऱ्या स्थानावर राहिला, तर पाकिस्तानलाही दुसऱ्या स्थानावर राहावे लागेल. अशा स्थितीत दोन्ही संघ वेगवेगळ्या उपांत्य सामन्यात खेळतील आणि ते जिंकल्यास अंतिम फेरीत एकमेकांशी भिडतील.
आयसीसीचे नियम आणि उपांत्य फेरीची गणिते
आयसीसीच्या नियमांनुसार, पहिल्या उपांत्य फेरीत गट 1 मधील अव्वल संघ गट 2 मधील दुसऱ्या क्रमांकाच्या संघाचा सामना करतो. जर भारत आणि पाकिस्तान आपापल्या गटात वेगवेगळ्या स्थानांवर राहिले (उदा. एक पहिल्या आणि दुसरा दुसऱ्या स्थानावर), तर त्यांची गाठ थेट उपांत्य फेरीत पडेल. मात्र, अंतिम फेरीत एकमेकांविरुद्ध खेळण्यासाठी त्यांना स्वतंत्र उपांत्य सामने जिंकणे अनिवार्य आहे.
पुढील वाटचाल आव्हानात्मक
दोन्ही संघांसाठी पुढचा मार्ग सोपा नाही. भारताने दक्षिण आफ्रिकेविरुद्धचा पहिला सुपर 8 सामना 76 धावांनी गमावला आहे, ज्यामुळे त्यांचा 'नेट रन रेट' खालावला आहे. भारताला आता झिम्बाब्वे आणि वेस्ट इंडिजविरुद्ध मोठ्या फरकाने विजय मिळवावा लागेल. दुसरीकडे, पाकिस्तानचा पहिला सामना पावसामुळे वाया गेला आहे. त्यांना उपांत्य फेरी गाठण्यासाठी इंग्लंड आणि श्रीलंका सारख्या बलाढ्य संघांना पराभूत करण्याचे मोठे आव्हान असेल.
हेही वाचा - Sunil Gavaskar: 'अहंकार सोडा आणि परिस्थितीनुसार खेळा...'; सुनील गावस्कर यांनी भारतीय फलंदाजांना फटकारलं
सुपर 8 चे गट विभागणी:
गट 1: भारत, दक्षिण आफ्रिका, वेस्ट इंडिज, झिम्बाब्वे
गट 2: पाकिस्तान, इंग्लंड, न्यूझीलंड, श्रीलंका
उपांत्य आणि अंतिम फेरीचे वेळापत्रक
पहिला उपांत्य सामना: 4 मार्च (स्थळ अद्याप निश्चित नाही)
दुसरा उपांत्य सामना: 5 मार्च, मुंबई (वानखेडे स्टेडियम)
अंतिम सामना: 8 मार्च (स्थळ अद्याप निश्चित नाही)