बिहारमध्ये दारूबंदीचा फज्जा; ट्रक उलटताच चक्क महिला अन् लहान मुलांनी पळवले दारूचे बॉक्स, पोलीस येण्यापूर्वीच गाडी रिकामी!
Bihar Illegal Alcohol Smuggling Truck Accident: बिहारमध्ये 2016 पासून पूर्ण दारूबंदी लागू असतानाही अररिया जिल्ह्यातून या कायद्याची पुरती पोलखोल करणारी धक्कादायक घटना समोर आली आहे. शुक्रवारी खरहट टोल प्लाझाजवळ आसाम पासिंगचा एक मिनी ट्रक भरधाव वेगात रस्त्याच्या दुभाजकाला (Divider) जोरदार धडक दिल्यामुळे पलटी झाला. चालक आणि क्लीनर घटनास्थळावरून पसार झाले. सुरुवातीला हा निव्वळ रस्ते अपघात वाटल्याने लोकांनी तिकडे लक्ष दिले नाही. मात्र, या अपघातग्रस्त वाहनात मोठ्या प्रमाणावर अवैध दारूचा साठा असल्याचे समजताच परिसरातील स्थानिक नागरिकांची तेथे एकच गर्दी झाली.
पोलिसांच्या येण्याआधीच महिला अन् लहान मुलांची दारू पळवण्यासाठी झुंबड
ट्रकमध्ये दारू असल्याचे स्पष्ट होताच घटनास्थळी उपस्थित लोकांनी पोलीस येण्याआधीच वाहनातील दारूच्या बाटल्या आणि संपूर्ण बॉक्स पळवण्यास सुरुवात केली. पाहता पाहता या ठिकाणी नागरिकांची प्रचंड झुंबड उडाली, ज्यामध्ये महिला आणि लहान मुलांचाही मोठ्या संख्येने सहभाग असल्याचे दिसून आले. काही जण हातात दारूच्या बाटल्या घेऊन पळताना तर काही थेट बॉक्सच्या बॉक्स उचलून नेताना दिसले. सोशल मीडियावर या संपूर्ण प्रकाराचे व्हिडिओ वेगाने व्हायरल झाले असून, अतिरिक्त पोलीस दल घटनास्थळी पोहोचेपर्यंत संपूर्ण ट्रक रिकामा करण्यात आला होता.
व्हायरल व्हिडिओंवरून पोलिसांकडून संशयितांची ओळख पटवण्याचे काम सुरू
सुरुवातीला या घटनेला सामान्य रस्ते अपघात समजणाऱ्या पोलिसांना सोशल मीडियावरील व्हिडिओंमुळे या लुटीची माहिती मिळाली. या प्रकरणी अररिया पोलिसांनी तात्काळ गंभीर दखल घेत गुन्हा दाखल केला आहे. परिसरात लावलेले सीसीटीव्ही (CCTV) फुटेज आणि व्हायरल व्हिडिओंच्या मदतीने ट्रकमधून दारूचे बॉक्स पळवणाऱ्या सर्व स्थानिक नागरिकांची ओळख पटवण्याचे काम वेगाने सुरू आहे. या बेकायदेशीर कृत्यात सहभागी असलेल्या प्रत्येकावर कडक कारवाई केली जाईल, असा स्पष्ट इशारा पोलीस प्रशासनाने दिला आहे.
VIDEO | Bihar: Liquor-laden truck crashes in Araria, locals loot bottles; police probe underway Bihar has been a dry state since April 2016, when the government imposed a complete ban on the manufacture, sale and consumption of alcohol under the Bihar Excise (Amendment) Act. (Full video available on PTI Videos – https://t.co/bIyFWTfmBd) — Press Trust of India (@PTI_News) October 2, 2026
आसाम किंवा पश्चिम बंगालमधून दारूची तस्करी झाल्याचा पोलिसांना संशय
दुसरीकडे, पोलिसांनी अपघातग्रस्त मिनी ट्रक जप्त केला असून वाहनाचा मालक आणि पसार झालेल्या चालकाचा शोध घेतला जात आहे. प्राथमिक तपासावरून ही दारूची मोठी खेप आसाम किंवा पश्चिम बंगाल या शेजारील राज्यांतून आणण्यात आल्याचा संशय पोलिसांनी व्यक्त केला आहे. सीमांचल भागाचा वापर करून बिहारमधील विविध जिल्ह्यांमध्ये या दारूची बेकायदेशीर विक्री केली जाणार होती. त्यामुळे या प्रकरणात केवळ दारू पळवणारे नागरिकच नव्हे, तर तस्करीच्या संपूर्ण नेटवर्कचा पर्दाफाश करण्यावर पोलीस भर देत आहेत.
दारूबंदी कायद्याच्या अंमलबजावणीवर पुन्हा एकदा मोठे प्रश्नचिन्ह
राज्यात दारूच्या खरेदी-विक्रीवर, वाहतुकीवर आणि साठवणुकीवर कडक कायदेशीर बंदी असतानाही थेट महामार्गावरून एवढ्या मोठ्या प्रमाणावर दारूची वाहतूक कशी होत होती, असा सवाल आता उपस्थित केला जात आहे. या घटनेमुळे बिहारमधील दारूबंदी कायद्याच्या अंमलबजावणीतील त्रुटी पुन्हा एकदा चव्हाट्यावर आल्या आहेत. पोलीस प्रशासन आता या संपूर्ण तस्करीच्या मूळ सूत्राधारांपर्यंत पोहोचण्यासाठी तपास चक्रे वेगाने फिरवत आहे.
हेही वाचा – भारताचा पाकिस्तानवर दणदणीत विजय; धुवाधार खेळीने ‘गोल्ड मेडलवर’ कोरलं नाव
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.