Mango Pulp Scam: आमरस-पुरीचा मनसोक्त आनंद घेणाऱ्या पुणेकरांसाठी एक अत्यंत धक्कादायक आणि चिंताजनक बातमी समोर आली आहे. पुणे जिल्ह्यातील खेड आणि मावळ परिसरात अन्न व औषध प्रशासनाने (FDA) मोठी कारवाई करत तब्बल 32,000 किलो भेसळयुक्त मँगो पल्प जप्त केला आहे. स्वस्त दरात मिळणाऱ्या या आमरसाच्या नावाखाली नागरिकांच्या आरोग्याशी जीवघेणा खेळ सुरू असल्याचे या धडक कारवाईतून उघड झाले आहे.
FDA ची धडक कारवाई: खेड आणि मावळ परिसरात खळबळ
मिळालेल्या गुप्त माहितीच्या आधारे एफडीएच्या पथकाने खेडमधील राक्षेवाडी आणि मावळमधील उरसे येथे एकाच वेळी छापे टाकले. या मोहिमेत अंदाजे 2.5 लाख रुपये किमतीचा मँगो पल्पचा साठा हस्तगत करण्यात आला आहे. लग्नसराई आणि उन्हाळ्याच्या हंगामात आमरसाला मोठी मागणी असते, याचाच फायदा घेत भेसळखोरांनी हा साठा विक्रीसाठी तयार ठेवला होता, जो प्रशासनाने वेळीच जप्त केला आहे.
तपासात धक्कादायक वास्तव
एफडीएच्या तपासात या आमरसाबाबत अत्यंत भीतीदायक माहिती समोर आली आहे. आमरसाला नैसर्गिक आणि गडद आकर्षक रंग देण्यासाठी त्यामध्ये आरोग्यास घातक असणाऱ्या केमिकलयुक्त केशरी रंगाचा सर्रास वापर केला जात होता. इतकेच नव्हे तर, उत्पादन खर्च वाचवण्यासाठी साखरेऐजी निकृष्ट दर्जाच्या गोड पदार्थांचा वापर केला जात होता. पल्पची घनता आणि चव वाढवण्यासाठी चक्क गाईचे दूध आणि इतर संशयास्पद घटक मिसळले जात असल्याचेही निष्पन्न झाले आहे.
हॉटेल आणि ग्रामीण भागात भेसळयुक्त रॅकेटचे जाळे
हा भेसळयुक्त साठा प्रामुख्याने हॉटेल व्यावसायिक आणि ग्रामीण भागातील किरकोळ विक्रेत्यांना स्वस्त दरात पुरवला जात होता. लग्नसराईच्या पंक्ती आणि उन्हाळ्यातील पार्ट्यांमध्ये हा विषारी आमरस वाढण्याचे मोठे नियोजन भेसळखोरांनी केले होते. कमी किमतीत माल मिळत असल्याने अनेक विक्रेते हा पल्प खरेदी करत असल्याचे समोर आले आहे.
आरोग्यावर होणारे गंभीर परिणाम आणि तज्ज्ञांचा इशारा
वैद्यकीय तज्ज्ञांच्या मते, असा केमिकलयुक्त आमरस खाणे जीवावर बेतू शकते. यातील घातक रंगांमुळे तात्काळ पोटदुखी, उलट्या, जुलाब आणि तीव्र अन्नातून विषबाधा (Food Poisoning) होऊ शकते. दीर्घकाळ अशा पदार्थांचे सेवन केल्यास यकृत (Liver) आणि किडनी निकामी होण्याचा धोका असून, कर्करोगासारख्या (Cancer) दुर्धर आजारांनाही निमंत्रण मिळू शकते.
प्रशासनाचा कडक इशारा: खरेदी करताना खबरदारी घ्या
अन्न व औषध प्रशासनाने संबंधित दोषींवर कठोर कायदेशीर कारवाईची प्रक्रिया सुरू केली असून हा सर्व साठा नष्ट केला आहे. "कमी किमतीत मिळणाऱ्या आकर्षक आणि चविष्ट वाटणाऱ्या खाद्यपदार्थांच्या मोहात पडू नका; कोणतीही वस्तू खरेदी करताना त्याच्या दर्जाची आणि ब्रँडची खात्री करा," असे आवाहन प्रशासनाकडून पुणेकरांना करण्यात आले आहे.
