झारखंडमधील बोकारो जिल्ह्यातून एक अत्यंत धक्कादायक, सुन्न करणारी आणि भयानक घटना समोर आली आहे. अवघ्या 3 वर्षांच्या लहान मुलाने आपल्या मामाकडे चॉकलेट मागितले असता, मामाने चॉकलेटऐवजी चक्क लोड केलेली पिस्तूल त्याच्या हातात सोपवली. या पिस्तूलशी खेळताना अचानक गोळी सुटली आणि ती थेट बालकाला लागली. गोळी लागल्याने गंभीर जखमी झालेल्या चिमुकल्याला तातडीने रुग्णालयात नेण्यात आले, परंतु उपचारापूर्वीच डॉक्टरांनी त्याला मृत घोषित केले. या दुर्दैवी घटनेनंतर आरोपी मामा घटनास्थळावरून फरार झाला असून पोलीस त्याचा कसून शोध घेत आहेत.
सकाळी 6:00 वाजता घडली हृदयद्रावक घटना
पोलिसांनी दिलेल्या माहितीनुसार, ही काळजाचा ठोका चुकवणारी घटना शनिवारी सकाळी सुमारे 6:00 वाजण्याच्या सुमारास बोकारो येथील ‘कर्नल मार्केट’ परिसरात घडली, जो भाग माराफारी पोलीस ठाण्याच्या हद्दीत येतो. 21 वर्षीय आरोपी मामा राजेश कुमार सकाळी आपल्या बहिणीच्या घरी आला होता. त्यावेळी त्याच्या तीन वर्षांच्या भाच्याने त्याच्याकडे खाण्यासाठी चॉकलेट मागितले. मात्र, बेजबाबदार मामाने चॉकलेट देण्याऐवजी स्वतःजवळील घातक पिस्तूल काढून मुलाच्या हातात खेळण्यासाठी दिली. निष्पाप बालकाला त्या शस्त्राची भीषणता माहित नसल्याने तो त्याच्याशी खेळू लागला आणि ट्रिगर दबल्यामुळे अचानक गोळी सुटली.
आईच्या तक्रारीवरून गुन्हा दाखल; आरोपी मामा फरार
गोळीचा आवाज होताच घरात एकच खळबळ उडाली. रक्ताच्या थारोळ्यात पडलेल्या बालकाला घेऊन कुटुंबीयांनी तातडीने रुग्णालयाकडे धाव घेतली, परंतु डॉक्टरांनी त्याला मृत घोषित केले. या घटनेनंतर आरोपी राजेश कुमार भीतीपोटी पिस्तूल घेऊन घटनास्थळावरून पसार झाला. माराफारी पोलीस ठाण्याचे प्रभारी अधिकारी संजय कुमार यांनी घटनेची पुष्टी केली आहे. मृत बालकाच्या आईने दिलेल्या तक्रारीवरून पोलिसांनी गुन्हा दाखल केला असून, फरार आरोपीच्या अटकेसाठी विविध ठिकाणी पोलीस पथके तैनात करून छापे मारले जात आहेत.
