जळगाव जामोद तालुक्यातील राजुरा धरण परिसरात घडलेल्या एका धक्कादायक घटनेने संपूर्ण विदर्भ हादरला आहे. एका व्यक्तीने आपल्या चार लहान मुलांना विहिरीत ढकलून स्वतःही आत्महत्या केल्याची घटना उघडकीस आली आहे. या प्रकरणामुळे परिसरात मोठी खळबळ उडाली असून ग्रामस्थांमध्ये हळहळ व्यक्त केली जात आहे. पोलिसांनी घटनास्थळी धाव घेत मृतदेह बाहेर काढले असून पुढील तपास सुरू आहे.
मिळालेल्या माहितीनुसार, मृत व्यक्ती विजय मुसा किराडिया हे जळगाव जामोद तालुक्यातील भाले अंजन गावातील रहिवासी होते. शुक्रवारी सकाळी त्यांनी आपल्या पत्नीला तिच्या माहेरी सोडले होते. त्यानंतर परतताना त्यांनी आपल्या चार मुलांसह राजुरा धरण परिसर गाठला. याच ठिकाणी त्यांनी टोकाचं पाऊल उचलल्याची माहिती समोर आली आहे.
या घटनेत मृत्यू झालेल्या मुलांमध्ये प्रित, प्राची, पूर्वी आणि पियुष या चार चिमुकल्यांचा समावेश आहे. प्राथमिक माहितीनुसार, विजय किराडिया यांनी आधी मुलांना विहिरीत ढकललं आणि त्यानंतर स्वतःही उडी घेत जीवन संपवलं. ही घटना समोर आल्यानंतर परिसरात शोककळा पसरली आहे.
स्थानिक नागरिकांनी विहिरीत मृतदेह तरंगताना पाहिल्यानंतर पोलिसांना माहिती दिली. त्यानंतर पोलीस आणि प्रशासनाच्या पथकाने घटनास्थळी धाव घेतली. मोठ्या प्रयत्नांनंतर पाचही जणांचे मृतदेह विहिरीतून बाहेर काढण्यात आले. त्यानंतर शवविच्छेदनासाठी मृतदेह ग्रामीण रुग्णालयात पाठवण्यात आले.
पोलिसांच्या प्राथमिक तपासात घरगुती वादातून ही घटना घडल्याचा अंदाज व्यक्त करण्यात येत आहे. सूत्रांनी दिलेल्या माहितीनुसार, मृत व्यक्तीची पत्नी काही कारणांमुळे माहेरी गेली होती. त्यावरून घरात तणाव निर्माण झाला होता. सकाळी कुटुंबीयांमध्ये झालेल्या चर्चेनंतर विजय किराडिया मानसिक तणावात असल्याचे सांगितले जात आहे.
दरम्यान, या घटनेमुळे संपूर्ण परिसरात हळहळ व्यक्त होत आहे. निष्पाप मुलांचा दुर्दैवी मृत्यू झाल्याने गावकऱ्यांनी तीव्र दुःख व्यक्त केले आहे. पोलिसांकडून या प्रकरणाचा अधिक तपास सुरू असून आत्महत्येमागील नेमकं कारण शोधण्याचा प्रयत्न केला जात आहे.
