मुंबई : अन्न साठवणूक आणि अन्न तयार करण्याच्या मानकांचे गंभीर उल्लंघन झाल्याचे निदर्शनास आल्यानंतर, मंगळवारी FSSAI (भारतीय अन्न सुरक्षा आणि मानके प्राधिकरण) ने ग्रेटर मुंबईतील पाच नामांकित क्लब कॅन्टीन्सचे ‘अन्न व्यवसाय परवाने’ (Food Business Operator Licences) निलंबित केले. एका अधिकृत माहितीनुसार, यामध्ये ‘क्रिकेट क्लब ऑफ इंडिया’, ‘आर.के. जुहू जिमखाना’, ‘अपर्णा जुहू जिमखाना’ आणि ‘विलिंग्डन कॅथोलिक जिमखाना’ यांसारख्या प्रमुख नावांचा समावेश आहे. अन्न नियमन संस्थेने कीटकांचा प्रादुर्भाव, वैयक्तिक स्वच्छतेचे निकष व सुविधांचा अभाव, तसेच कच्च्या मालाची अयोग्य साठवणूक या गोष्टींकडे सातत्याने लक्ष वेधले. महाराष्ट्र अन्न व औषध प्रशासनाच्या (FDA) आयुक्तपदाचा कार्यभार तुकाराम मुंडे यांनी स्वीकारल्यानंतर ही घडामोड समोर आली आहे. नियमांच्या अंमलबजावणीबाबत मुंडे यांनी आक्रमक पवित्रा स्वीकारला असून, अन्नसुरक्षा, स्वच्छता आणि नियमपालनातील त्रुटींमुळे त्यांनी मुंबईतील अनेक नामांकित हॉटेल्स आणि बेकरीजचे परवाने निलंबित करण्याचे आदेश दिले आहेत. दरम्यान, 24 ते 27 जुलैदरम्यान राज्यभर 81 हॉटेल, रेस्टॉरंट, क्लब व धाब्यांची तपासणी एफडीएने केली असून या कारवाईत 11 परवाने निलंबित, 12 आस्थापनांना सुधारणा नोटीस बजावण्यात आली आहे.
आयुक्त मुंडे यांच्या नेतृत्वाखालील FDA ने मुंबईतील ‘पारसी डेअरी फार्म’, ‘के. रुस्तम आईस्क्रीम’, ‘शालीमार रेस्टॉरंट’, ‘नूर मोहम्मदी हॉटेल’ आणि ‘रहमानिया रेस्टॉरंट’ यांसारख्या प्रसिद्ध खाद्य-प्रतिष्ठानांचे अन्न परवाने निलंबित केले. ‘क्रिकेट क्लब ऑफ इंडिया’ची तपासणी करणाऱ्या पथकाला असे आढळून आले की, अन्न हाताळणी आणि कचरा विल्हेवाट लावण्याच्या ठिकाणी झुरळे व माश्यांचा प्रादुर्भाव होता. तसेच कोल्ड स्टोरेजमधील साठवलेल्या अन्नावर वाफेचे पाणी थेट पडत होते, सांडपाण्याची निचरा व्यवस्था (ड्रेन्स) तुंबलेली होती. आणि खराब झालेल्या भाज्यांवर बुरशी वाढलेली होती. स्वयंपाकघरात अतिपक्व मशरूम आणि मुदत संपलेले (एक्सपायर्ड) खाद्यपदार्थ साठवून ठेवल्याचेही निरीक्षकांनी नमूद केले.
त्याचप्रमाणे, आरके जुहू जिमखान्याची तपासणी करणाऱ्या पथकाने अपुऱ्या वैयक्तिक स्वच्छतेच्या सुविधा, अन्न हाताळणाऱ्यांच्या स्वच्छतेशी तडजोड, कच्च्या मालाच्या योग्य स्वच्छतेचा अभाव, FIFO (फर्स्ट इन-फर्स्ट आउट) आणि FEFO (फर्स्ट एक्सपायर्ड-फर्स्ट आउट) पद्धतींचा अभाव, दुर्लक्षित नाले आणि इतर उल्लंघने निदर्शनास आणली. नियामक मंडळाच्या तपास अधिकाऱ्यांनी अपर्णा जुहू जिमखान्याचीही पाहणी केली आणि तिथे गंजलेली व स्वच्छ करण्यास कठीण असलेली स्वयंपाकाची उपकरणे, अपुऱ्या वैयक्तिक स्वच्छतेच्या सुविधा, शाकाहारी आणि मांसाहारी तसेच शिजवलेले आणि न शिजवलेले अन्न यांची योग्य विभागणी नसणे, अस्वच्छ उपकरणे, दलदलीतील कीटकांचा प्रादुर्भाव आणि माश्या, तसेच खाद्य दर्जाच्या पॅकेजिंग साहित्याचा अभाव यांसारखी उल्लंघने आढळून आली.
