बिहारमध्ये लागू असलेल्या मद्यबंदीला चकवा देण्यासाठी तस्कर कोणत्या थराला जाऊ शकतात, याचे धक्कादायक उदाहरण हाजीपूर येथे समोर आले आहे. सदर पोलीस ठाण्याच्या हद्दीत दिघी मालमल्ला चौड परिसरात पोलिसांनी एका अॅम्ब्युलन्समधून मोठ्या प्रमाणात मद्यसाठा जप्त केला. बाहेरून पाहता ही अॅम्ब्युलन्स अगदी सामान्य वाटत होती, मात्र तिच्या छतामध्येच एक गुप्त ‘मद्यसाठा’ लपवण्यात आला होता.
गुप्त माहितीच्या आधारे पोलिसांनी टाटा विंगर या अॅम्ब्युलन्सला अडवून तपासणी केली. सुरुवातीला वाहनात काहीच संशयास्पद आढळले नाही. मात्र छताची रचना वेगळी वाटल्याने अधिक बारकाईने तपासणी करण्यात आली. त्यावेळी छतामध्ये तयार केलेल्या गुप्त कप्प्यातून तब्बल 1500 मद्याच्या बाटल्या आढळून आल्या. ही बाब पाहून पोलिस अधिकारीही काही काळ स्तब्ध झाले.
पोलिसांच्या माहितीनुसार, तस्करांनी अॅम्ब्युलन्सच्या छतावर विशेष गुप्त केबिन तयार करून त्यात मद्यसाठा लपवला होता. तपासणी नाक्यांवर सहज सुटका व्हावी, यासाठी ही युक्ती वापरण्यात आली होती. इतक्या कुशलतेने तयार केलेल्या या गुप्त कप्प्यामुळे ही तस्करी बराच काळ लक्षात आली नसावी, असा अंदाज व्यक्त केला जात आहे.
हेही वाचा: strait of Hourmuz : जगाचं टेंशन वाढणार! आता होर्मुझ खाडीतून इतकी जहाजच पार होणार, इराणच्या निर्णयाने सर्वांना मोठा धक्का
उपविभागीय पोलीस अधिकारी सुबोध कुमार यांनी सांगितले की, वाहनाच्या वरच्या आणि खालच्या भागातही लपवलेले कप्पे तयार करण्यात आले होते. या कारवाईत एकूण सुमारे 550 लिटर विदेशी मद्य जप्त करण्यात आले आहे. पोलिस नोंदीनुसार, ही अॅम्ब्युलन्स मुजफ्फरपूर येथील मुन्ना कुमार यांच्या नावावर नोंदणीकृत असल्याचे समोर आले आहे.
दरम्यान, छापेमारीदरम्यान अॅम्ब्युलन्सचा चालक अंधाराचा फायदा घेत घटनास्थळावरून फरार झाला. पोलिसांनी वाहन आणि मद्यसाठा जप्त केला असून, आरोपी चालक आणि मालकाच्या शोधासाठी पथके रवाना करण्यात आली आहेत. या प्रकरणामागील संपूर्ण तस्करी जाळ्याचा तपासही सुरू करण्यात आला आहे.
या घटनेमुळे बिहारमधील मद्यबंदी कायद्याला चकवा देण्यासाठी वापरल्या जाणाऱ्या नव्या पद्धतींचा पर्दाफाश झाला असून, प्रशासनासाठी ही गंभीर इशारा मानली जात आहे.
हेही वाचा: Shrikant Purohit: अटक, नऊ वर्ष तुरुंगात अन् आता ब्रिगेडियर पदाचा बहुमान; मालेगाव प्रकरणातून मुक्त होताच कर्नल पुरोहित यांचा सन्मान