खोपोली येथील मंगेश काळोखे हत्याकांडाने संपूर्ण रायगड जिल्हा हादरला असतानाच, आता या प्रकरणाला एक अनपेक्षित आणि खळबळजनक राजकीय वळण मिळाले आहे. आमदार महेंद्र थोरवे यांनी या हत्येचे थेट 'बीड कनेक्शन' उघड केल्याने खळबळ उडाली आहे. मुख्य आरोपी रवी देवकर याचा अंगरक्षक (बॉडीगार्ड) हा बीडचा असून, त्यानेच मंगेश काळोखे यांच्यावर 19 वेळा वार करून त्यांची निर्घृण हत्या केल्याचा दावा थोरवे यांनी केला आहे. हा धक्कादायक खुलासा करताना त्यांनी या गुन्हेगाराचे धागेदोरे थेट बीडमधील बड्या राजकीय नेत्यांशी जोडल्याने खळबळ उडाली आहे.
या प्रकरणाचा गुंता आता अधिकच वाढत चालला आहे. आमदार थोरवे यांच्या दाव्यानुसार, हत्येतील प्रमुख आरोपीचा बॉडीगार्ड हा वाल्मिक कराड आणि राज्याचे मंत्री धनंजय मुंडे यांच्या गटातील सक्रिय सदस्य आहे. सोशल मीडियावर या बॉडीगार्डचे मुंडे आणि कराड यांच्यासोबतचे फोटो व्हायरल झाल्याचेही त्यांनी स्पष्ट केले आहे. एका स्थानिक वादाचे रूपांतर थेट राज्याच्या मोठ्या राजकीय वर्तुळाशी जोडल्या जाणाऱ्या गुन्हेगारी कटात झाल्याने पोलीस प्रशासन आणि राजकीय यंत्रणेत मोठी खळबळ उडाली आहे.
हेही वाचा: BMC Election : मुंबई महापालिकेसाठी भाजप सज्ज, उमेदवारी जाहीर, युवा चेहऱ्यांना संधी
या हत्येमागील पार्श्वभूमी पाहिली तर राजकीय वैमनस्याची काळी बाजू समोर येते. खोपोली नगरपरिषदेच्या प्रभाग क्रमांक 3 मध्ये शिवसेनेच्या मानसी काळोखे आणि राष्ट्रवादीच्या उर्मिला देवकर यांच्यात अटीतटीची लढत झाली होती. या निवडणुकीत मानसी काळोखे यांनी 700 हून अधिक मतांनी विजय मिळवला. मात्र, हा पराभव विरोधकांच्या जिव्हारी लागला आणि त्यातूनच मंगेश काळोखे यांची हत्या करण्याचा कट रचला गेल्याचे प्राथमिक तपासात आणि आरोपांमध्ये म्हटले जात आहे. राजकीय वर्चस्वाच्या लढाईत एका निष्पाप कार्यकर्त्याचा बळी गेल्याने जनक्षोभ उसळला आहे.
या हत्येच्या गुन्ह्यात पोलिसांनी आतापर्यंत अजित पवार गटाचे जिल्हाध्यक्ष सुधाकर घारे आणि प्रवक्ते भरत भगत यांच्यासह आठ जणांवर गुन्हा दाखल केला आहे. विशेष म्हणजे सुधाकर घारे हे खासदार सुनील तटकरे यांचे अत्यंत विश्वासू मानले जातात. एका बाजूला सत्तेत एकत्र असलेले पक्ष आणि दुसऱ्या बाजूला स्थानिक पातळीवरील हे जीवघेणे संघर्ष यामुळे रायगडच्या राजकारणात मोठा पेच निर्माण झाला आहे. स्वतःच्या समर्थकाची हत्या झाल्याने संतप्त झालेले आमदार महेंद्र थोरवे यांनी आता याविरोधात आवाज उठवला आहे.
आगामी काळात हे प्रकरण शांत होण्याची चिन्हे दिसत नाहीत. सोमवारी संध्याकाळी खोपोली पोलीस ठाण्यावर भव्य 'कँडल मार्च' काढून मृताला श्रद्धांजली अर्पण केली जाणार आहे. त्याचबरोबर, जोपर्यंत या प्रकरणातील सर्व मुख्य सूत्रधार आणि आरोपींना अटक होत नाही, तोपर्यंत पोलीस ठाण्यातच ठिय्या मांडण्याचा इशारा आमदार थोरवे यांनी दिला आहे. यामुळे खोपोलीमध्ये तणावाचे वातावरण असून, पोलीस या 'बीड कनेक्शन'चा तपास नेमका कसा करतात, याकडे संपूर्ण राज्याचे लक्ष लागले आहे.
