नवी मुंबई : नवी मुंबईतील ऐरोली परिसरात घडलेल्या एका धक्कादायक हत्याकांडाचा उलगडा तब्बल ११ महिन्यांनंतर झाला आहे. अनैतिक संबंधांमध्ये अडथळा ठरत असल्याच्या संशयातून एका विवाहित महिलेने आपल्या प्रियकराच्या मदतीने पतीची हत्या केल्याचा आरोप पोलिसांनी केला आहे. हत्येनंतर पुरावे नष्ट करण्यासाठी मृतदेहाचे तुकडे करून जंगलात टाकल्याचा धक्कादायक प्रकार तपासात समोर आला आहे. या प्रकरणी पोलिसांनी महिला आणि तिच्या प्रियकराला अटक केली असून पुढील तपास सुरू आहे.
पोलिसांनी दिलेल्या माहितीनुसार, ऐरोली परिसरात राहणारी सुनिता कुशवाह हिचे रिक्षाचालक राहुल प्रजापती याच्याशी प्रेमसंबंध निर्माण झाले होते. हे संबंध सुरू असताना पती बलीराम कुशवाह हा त्यांच्या नात्यात अडथळा ठरत असल्याची भावना दोघांच्या मनात निर्माण झाली. त्यानंतर दोघांनी मिळून बलीरामची हत्या करण्याचा कट रचल्याचा आरोप आहे.
तपासात समोर आलेल्या माहितीनुसार, आरोपींनी प्रथम बलीरामचा गळा दाबून त्याचा जीव घेतला. त्यानंतर धारदार शस्त्राने वार करून मृत्यूची खात्री केली. गुन्ह्याचे पुरावे नष्ट करण्यासाठी त्यांनी मृतदेहाचे तीन तुकडे केले. हे तुकडे गोण्या आणि चादरीत गुंडाळून राहुलच्या रिक्षातून गवळीदेव डोंगर परिसरात वेगवेगळ्या ठिकाणी नेऊन टाकण्यात आल्याचा आरोप पोलिसांनी केला आहे.
घटना घडल्यानंतर बराच काळ बलीरामचा कोणताही ठावठिकाणा लागला नव्हता. सुरुवातीला त्याच्या बेपत्ता होण्याकडे फारसे लक्ष गेले नाही. मात्र, जवळपास आठ महिन्यांनंतर बलीरामच्या भावाने पोलिसांकडे बेपत्ता असल्याची तक्रार दाखल केली. त्यानंतर रबाळे एमआयडीसी पोलिसांनी या प्रकरणाचा तपास सुरू केला.
तपासादरम्यान पोलिसांनी बलीरामच्या कुटुंबीयांसह संबंधित व्यक्तींची चौकशी केली. तसेच जुने कॉल डिटेल रेकॉर्ड आणि इतर तांत्रिक पुरावे तपासले. चौकशीदरम्यान सुनिता आणि राहुल यांच्या जबाबात वारंवार विसंगती आढळून आली. पोलिसांनी अधिक सखोल चौकशी केल्यानंतर दोघांनीही गुन्ह्याची कबुली दिल्याचे सांगण्यात आले.
घटनेला जवळपास अकरा महिने उलटल्याने मृतदेहाचे अवशेष शोधण्याचे मोठे आव्हान पोलिसांसमोर आहे. गवळीदेव डोंगर परिसरात शोधमोहीम सुरू असून उपलब्ध पुरावे गोळा करण्याचे काम सुरू आहे. या तपासात फॉरेन्सिक पथकाचीही मदत घेतली जात आहे.
या घटनेमुळे नवी मुंबई परिसरात खळबळ उडाली असून अनैतिक संबंधातून घडलेल्या या हत्याकांडाची सर्वत्र चर्चा सुरू आहे. पोलिसांनी दोन्ही आरोपींना न्यायालयासमोर हजर केले असून त्यांच्याकडून आणखी माहिती मिळविण्यासाठी पुढील तपास सुरू आहे. तसेच या गुन्ह्यात आणखी कोणाचा सहभाग आहे का, याचाही तपास केला जात आहे
