फलटण उपजिल्हा रुग्णालयातील आणखी एका डॉक्टरने आत्महत्या केल्याची धक्कादायक बातमी समोर आली आहे. डॉ. राजेंद्र रूपनवर यांनी मुंबईतील सायन रेल्वे स्टेशनवर गळफास घेत टोकाचं पाऊल उचललं आहे. यावेळी सायन रुग्णालयात उपचारादरम्यान आज त्यांचा मृत्यू झाला. दरम्यान समोर आलेल्या माहितीनुसार, माजी मंत्री तानाजी सावंत यांचा पीए असल्याचा दावा करणाऱ्या प्रसाद कोंडे देशमुख यांनी डॉ. राजेंद्र रूपनवर यांनी जीवे मारण्याची धमकी दिल्याचा आरोप डॉ. रूपनवर यांनी केला होता.
तसेच उपजिल्हा रुग्णालयाच्या अधीक्षक डॉ. लीला मदने यांच्याकडूनही त्रास दिला जात असल्याचा त्यांनी आरोप केला होता. दरम्यान तक्रार करूनही न्याय मिळत नसल्याने डॉ. रूपनवर यांनी आत्महत्या केली. यापूर्वी देखील त्यांनी हातावर सुसाईड नोट लिहून आत्महत्येचा प्रयत्न केला होता. यापूर्वी त्यांनी 29 ऑगस्टला इन्स्टाग्रामवरील व्हिडिओद्वारे आत्महत्या करण्याचा इशाराही दिला होता. मात्र, प्रशासनाने दखल न घेतल्याचा आरोप त्यांनी केली. अखेर काल सायन स्टेशनवर त्यांनी गळफास घेतला. दरम्यान डॉ. रूपनवर यांच्या आत्महत्येनंतर MARD संघटना आक्रमक होण्याची शक्यता आहे.
या घटनेनंतर बीएमसी मार्डचे स्टेटमेंट समोर
31 ऑगस्ट 2026 डॉ. राजेंद्र रुपनवार यांच्या अकाली निधनाबद्दल बीएमसी मार्डकडून तीव्र दुःख व्यक्त केलं आहे. फाळटण, सातारा येथे वैद्यकीय अधिकारी म्हणून कार्यरत असलेले डॉ. राजेंद्र रुपनवार यांच्या अकाली निधनाबद्दल बीएमसी मार्डकडून तीव्र दुःख आणि शोक व्यक्त करण्यात आला आहे. डॉ. रुपनवार यांनी 27 ऑगस्ट 2026 रोजी सायन रेल्वे स्थानकात आत्महत्येचा प्रयत्न केल्याची माहिती आहे. त्यानंतर त्यांना सायन रुग्णालयात उपचारासाठी दाखल करण्यात आले होते.
मात्र, वैद्यकीय उपचारांचे प्रयत्न करूनही 31 ऑगस्ट 2026 रोजी त्यांचे निधन झाले. वैद्यकीय क्षेत्रातील एका तरुण डॉक्टरचा अशा प्रकारे झालेला मृत्यू अत्यंत चिंताजनक आणि दुर्दैवी आहे. या दुर्दैवी घटनेमागील नेमकी कारणे अद्याप स्पष्ट झालेली नसली, तरी कामाच्या ठिकाणी होणारा कथित छळ तसेच बाह्य किंवा राजकीय दबाव यासंदर्भातील समोर येणारे आरोप गंभीर चिंतेचा विषय आहेत. वैद्यकीय कर्तव्य बजावताना कोणत्याही प्रकारची धमकी, छळ, दडपशाही किंवा अनुचित बाह्य हस्तक्षेप अस्वीकार्य असून, या सर्व बाबींची सखोल चौकशी होणे आवश्यक आहे.
बीएमसी मार्डने संबंधित अधिकाऱ्यांकडे पुढील मागण्या केल्या आहेत:
* डॉ. रुपनवार यांच्या मृत्यूपूर्वीच्या परिस्थितीची वेळबद्ध, स्वतंत्र आणि निष्पक्ष चौकशी करण्यात यावी.
* छळ, धमकी, दबाव, जबरदस्ती किंवा बाह्य हस्तक्षेपाच्या सर्व आरोपांची चौकशी करून पारदर्शक तपासाद्वारे सत्य समोर आणावे.
* दोषी आढळणाऱ्यांविरोधात कायदा आणि योग्य प्रक्रियेनुसार कठोर कारवाई करण्यात यावी.
डॉक्टरांच्या सुरक्षिततेचा आणि सन्मानाचा प्रश्न उपस्थित होत असताना वैद्यकीय क्षेत्र गप्प बसू शकत नाही. प्रत्येक डॉक्टरला भीती, धमकी किंवा कोणत्याही अनुचित हस्तक्षेपाशिवाय आपले कर्तव्य बजावता येईल, असे सुरक्षित आणि सन्मानजनक वातावरण मिळणे आवश्यक आहे. बीएमसी मार्ड डॉ. राजेंद्र रुपनवार यांच्या कुटुंबीय, मित्रपरिवार आणि सहकाऱ्यांप्रती मनःपूर्वक संवेदना व्यक्त करते. या कठीण प्रसंगी आम्ही त्यांच्या कुटुंबीय आणि सहकाऱ्यांसोबत ठामपणे उभे आहोत. तसेच, या दुर्दैवी घटनेमागील परिस्थितीची निष्पक्ष आणि पारदर्शक चौकशी करून सत्य समोर आणण्याची मागणी संबंधित अधिकाऱ्यांकडे करीत आहोत.
