Crime News: उत्तर प्रदेशातील बरेली जिल्ह्यातून प्रेम, विश्वास आणि विवाहसंस्थेला हादरवून टाकणारी एक धक्कादायक घटना समोर आली आहे. तब्बल नऊ वर्षे प्रेमसंबंधात असलेल्या जोडप्याने कुटुंबीयांच्या संमतीने विवाह केला, मात्र लग्नानंतर अवघ्या साठ दिवसांतच या नात्याचा अत्यंत क्रूर शेवट झाला. पत्नीनेच आपल्या पतीचा गळा दाबून खून केल्याचा प्रकार उघडकीस आल्याने परिसरात खळबळ उडाली आहे.
इज्जतनगर पोलीस ठाण्याच्या हद्दीत घडलेल्या या घटनेत जितेंद्र कुमार यादव आणि ज्योती यांच्यात गेल्या अनेक वर्षांपासून प्रेमसंबंध होते. दोघांनीही एकमेकांशी लग्न करण्याचा निर्णय घेत कुटुंबीयांची मान्यता मिळवली आणि २५ नोव्हेंबर २०२५ रोजी विवाहसोहळा पार पडला. सुरुवातीचे काही दिवस सर्व काही सुरळीत सुरू असल्याचं दिसत होतं. मात्र लवकरच घरातील वातावरण बदलू लागलं.
लग्नानंतर जितेंद्रला ऑनलाईन जुगाराची सवय लागल्याचा आरोप आहे. या व्यसनामुळे घरखर्च, आर्थिक स्थैर्य आणि विश्वास यावर परिणाम होऊ लागला. ज्योतीच्या बँक खात्यातून पैसे काढून जुगारात घालवल्याने दोघांमध्ये सतत वाद होऊ लागले. दिवसेंदिवस हे भांडण वाढत गेलं आणि घरातील तणाव टोकाला पोहोचला.
२६ जानेवारी रोजी पैशांच्या कारणावरून झालेल्या तीव्र वादानंतर ज्योतीने आपल्या माहेरच्यांना घरी बोलावून घेतल्याची माहिती पोलिसांनी दिली आहे. त्यानंतर परिस्थिती आणखी गंभीर झाली. चौकशीदरम्यान समोर आलेल्या माहितीनुसार, वादावेळी जितेंद्रला आवरण्यात आलं आणि रागाच्या भरात त्याचा गळा दाबण्यात आला. या घटनेत पत्नीबरोबरच तिच्या आई-वडिलांचाही सहभाग असल्याचं तपासात निष्पन्न झालं आहे.
खून झाल्यानंतर हा प्रकार आत्महत्येचा वाटावा, यासाठी आरोपींनी कट रचल्याचा आरोप आहे. मृतदेह घरातील वेंटिलेटरला लटकवून गळफास घेतल्याचं भासवण्याचा प्रयत्न करण्यात आला. सुरुवातीला पोलिसांनीही या प्रकरणाची नोंद संशयास्पद मृत्यू म्हणून केली होती. मात्र पोस्टमॉर्टम अहवालाने संपूर्ण सत्य उघड केलं.
वैद्यकीय तपासणीत जितेंद्रचा मृत्यू गळा आवळल्यामुळे झाल्याचं स्पष्ट झाल्यानंतर पोलिसांनी तपासाची दिशा बदलली. चौकशीदरम्यान मिळालेल्या पुराव्यांच्या आधारे पत्नी ज्योती, तिचे वडील कालीचरण आणि आई चमेली यांना अटक करण्यात आली. पोलिस अधिकाऱ्यांनी दिलेल्या माहितीनुसार, चौकशीत आरोपींनी गुन्ह्याची कबुली दिली आहे.
दरम्यान, या प्रकरणात सहभागी असल्याचा संशय असलेला ज्योतीचा भाऊ सध्या फरार असून त्याचा शोध घेण्यासाठी पोलिसांची पथकं कार्यरत आहेत. प्रेमातून विवाह आणि त्यानंतर अवघ्या काही दिवसांत घडलेला हा रक्तरंजित प्रकार समाजात गंभीर प्रश्न निर्माण करणारा ठरत आहे.