Mothers of Four Minor Boys Arrested : उत्तर प्रदेशातील बदायूं जिल्ह्यातून एक धक्कादायक आणि तितकीच चर्चेत असणारी घटना समोर आली आहे. अल्पवयीन मुलांनी एका मुलीची छेड काढली, म्हणून पोलिसांनी थेट त्यांच्या मातांनाच अटक केली आहे. "पालकांनी मुलांना चांगले संस्कार दिले नाहीत, म्हणून त्यांना धडा शिकवण्यासाठी ही कारवाई केली," असे विचित्र समर्थन पोलीस ठाण्याच्या प्रभारी अधिकाऱ्याने (SHO) दिले आहे.
पालकांना 'धडा' शिकवण्यासाठी पोलिसांचा अजब कारवाई
बदायूं जिल्ह्यातील एका गावातील अल्पसंख्याक समुदायातील 4 मुलांनी एका मुलीची छेड काढल्याचा आरोप आहे. हे चारही मुलगे 13 वर्षांखालील असल्याने पोलिसांनी थेट त्यांच्या आईला अटक केली. पोलीस ठाण्याचे प्रभारी अजय पाल सिंह यांनी या कारवाईचे समर्थन करताना सांगितले की, "ही मुले उद्धट आहेत आणि चुकीच्या कामात गुंतलेली आहेत. त्यांच्या पालकांनी त्यांना चांगले संस्कार दिलेले नाहीत आणि त्यांचे संगोपन नीट केलेले नाही. अशा पालकांना संदेश जावा आणि त्यांनी धडा शिकावा, यासाठी ही अटक करण्यात आली आहे."
नेमकी घटना काय?
मिळालेल्या माहितीनुसार, एका किशोरवयीन मुलीच्या पालकांनी बुधवारी तक्रार दाखल केली होती. शाळेत येता-जाता गावातील 4 मुलांनी तिला अश्लील टोमणे मारले आणि तिचा छळ केल्याचा आरोप पालकांनी केला होता. या तक्रारीनंतर पोलिसांनी भारतीय न्याय संहिता (BNS) आणि पोक्सो (POCSO) कायद्यांतर्गत गुन्हा दाखल केला. ही मुले अल्पवयीन असल्याने पोलिसांनी शुक्रवारी त्यांच्या घरी नोटीस बजावली आणि प्रतिबंधात्मक अटकेच्या कलमाखाली त्यांच्या मातांना ताब्यात घेतले.
वडिलांनाही अटक करण्याची तयारी
पोलीस केवळ मातांना अटक करून थांबले नाही, तर या मुलांच्या वडिलांवरही कारवाईचा इशारा दिला आहे. या चारही मुलांचे वडील उत्तर प्रदेशबाहेर कामाला आहेत. "मुलांचे वडील जेव्हा घरी परततील, तेव्हा त्यांनाही अटक करण्यात येईल," असे प्रभारी अधिकारी सिंह यांनी स्पष्ट केले आहे. पोलिसांच्या या भूमिकेमुळे कायदेतज्ज्ञांमध्ये आणि नागरिकांमध्ये मोठे प्रश्नचिन्ह उपस्थित केले जात आहे.
वरिष्ठ अधिकारी अनभिज्ञ?
या गंभीर आणि अनोख्या कारवाईबद्दल जेव्हा बदायूं जिल्ह्याचे एसएसपी ब्रिजेश कुमार सिंह यांच्याशी संपर्क साधला, तेव्हा त्यांचे जनसंपर्क अधिकारी फोनवर होते, मात्र त्यांना या प्रकरणाची माहिती नव्हती. बरेलीचे डीआयजी अजय कुमार साहनी यांनी देखील या विषयावर कोणतीही प्रतिक्रिया दिलेली नाही. दरम्यान, अटक करण्यात आलेल्या मातांना त्याच दिवशी उपविभागीय दंडाधिकारी (SDM) न्यायालयात हजर करण्यात आले, जिथे वैयक्तिक बंधपत्र सादर केल्यानंतर त्यांची सुटका करण्यात आली.
संस्कारांच्या नावाखाली कायदेशीर पेच
मुलांनी केलेल्या गुन्ह्यासाठी आई-वडिलांना जबाबदार धरून त्यांना तुरुंगात पाठवण्याची ही कारवाई सध्या चर्चेचा विषय ठरली आहे. कायद्यानुसार अल्पवयीन मुलांच्या गुन्ह्यासाठी पालकांकडून हमीपत्र घेतले जाते, परंतु 'संस्कार' दिले नाहीत म्हणून अटक करणे कितपत योग्य आहे, असा सवाल उपस्थित केला जात आहे. ही मुले अल्पसंख्याक समुदायातील असल्याचा उल्लेखही पोलीस अधिकाऱ्याने केला आहे, ज्यामुळे या प्रकरणाला वेगळे वळण मिळण्याची शक्यता आहे.
हेही वाचा – Crime News: आधी फुकट पाणीपुरीसाठी आग्रह; नकार दिल्यानंतर त्याने थेट चाकू काढला आणि काहीच क्षणांत…
