छत्रपती संभाजीनगर: रक्षकच जेव्हा भक्षक बनतो तेव्हा न्याय कुणाकडे मागायचा, असाच संतप्त सवाल निर्माण करणारी एक धक्कादायक घटना छत्रपती संभाजीनगरमध्ये समोर आली आहे. शहरातील पोलीस दल या घटनेमुळे पुरते हादरले असून, एका ५३ वर्षीय पोलीस उपनिरीक्षकावर (PSI) खाजगी शाळेतील शिक्षिकेवर अत्याचार केल्याप्रकरणी गुन्हा दाखल करण्यात आला आहे. हरीष खटावकर असे या आरोपी पोलीस उपनिरीक्षकाचे नाव असून, त्याच्या या अमानुष कृत्यामुळे संपूर्ण शहरात तीव्र संताप व्यक्त होत आहे.
कारमध्ये डांबून बेदम मारहाण
पीडित ४८ वर्षीय विवाहित शिक्षिकेने दिलेल्या तक्रारीनुसार, संशयित आरोपी पोलीस उपनिरीक्षक हरीष खटावकर याने केवळ अत्याचारच केला नाही, तर तिला एका कारमध्ये कोंडून जबर मारहाण देखील केली. या पीडित महिलेने आरडाओरडा करू नये किंवा कोणाशी संपर्क साधू नये म्हणून आरोपीने तिचा मोबाईल फोनही बळजबरीने हिसकावून घेतला होता.
मे २०२५ पासून सुरू होता छळ
पीडिता आणि आरोपी पोलीस अधिकारी खटावकर यांची गेल्या चार वर्षांपूर्वी ओळख झाली होती. याच ओळखीचा आणि विश्वासाचा गैरफायदा घेत खटावकर याने मे २०२५ मध्ये पीडितेला एका नामांकित हॉटेलमध्ये बोलावून घेतले आणि तिच्यावर जबरदस्तीने अत्याचार केला.
यानंतरही हा त्रास थांबला नाही. ऑक्टोबर २०२५ मध्ये 'माझ्या घराचे नवीन इंटीरियर डिझाईन पाहायला चल' असा बहाणा करून खटावकर याने पीडितेला स्वतःच्या घरी बोलावले. तिथे तिच्या असहायतेचा गैरफायदा घेत त्याने पुन्हा शारीरिक संबंध प्रस्थापित केले.
ब्लॅकमेलिंग आणि धमक्यांचे सत्र
हा गैरप्रकार कोणाला सांगितल्यास समाजात आणि कुटुंबात तुझी नाहक बदनामी करेन, अशी भीती आरोपी सतत दाखवत होता. बदनामीच्या आणि धमक्यांच्या जोरावर तो पीडितेला सतत ब्लॅकमेल करत गप्प राहण्यास भाग पाडत होता. हा संपूर्ण मानसिक आणि शारीरिक छळ मे २०२५ पासून ते १५ जुलै २०२६ पर्यंत सुरू होता. अखेर नराधमाच्या छळाला कंटाळून पीडितेने हिंमत एकवटली आणि पोलीस ठाणे गाठले.
जवाहरनगर पोलीस ठाण्यात गुन्हा दाखल
पीडित शिक्षिकेच्या तक्रारीवरून १६ जुलै रोजी जवाहरनगर पोलीस ठाण्यात संशयित आरोपी हरीष खटावकर याच्याविरुद्ध विविध गंभीर कलमांखाली गुन्हा दाखल करण्यात आला आहे. कायदा आणि सुव्यवस्था राखण्याची जबाबदारी असलेल्या पोलीस अधिकाऱ्यानेच असे संतापजनक कृत्य केल्यामुळे पोलीस प्रशासनावर आता गंभीर प्रश्नचिन्ह उपस्थित होत आहेत. या प्रकरणाचा पुढील तपास पोलीस करत आहेत.
