गोंदिया : गोंदिया जिल्ह्यातील देवरी तालुक्यात बिबट्याच्या कातडीच्या तस्करीचा धक्कादायक प्रकार समोर आला आहे. बिबट्याची कातडी विक्री करण्याच्या प्रयत्नात असलेल्या दोघांना नागपूरच्या महसूल गुप्तचर संचालनालयाच्या प्रादेशिक युनिटने अटक केली आहे. देवरी-पुराडा मार्गावरील ढिवरिनटोला परिसरात सापळा रचून धनराज रामलाल उईके आणि नीलकंठ रामचंद्र पांढरे यांना ताब्यात घेण्यात आले. यातील धनराज उईके हा माजी उपसरपंच असल्याची माहिती आहे. आरोपींकडून पांढऱ्या कापडात गुंडाळलेली बिबट्याची कातडी जप्त करण्यात आली. कारवाईनंतर दोन्ही आरोपींना पुढील तपासासाठी देवरी वन विभागाच्या ताब्यात देण्यात आले आहे. ही कातडी कुठून आणली, कोणाला विक्री केली जाणार होती आणि या तस्करीमागे मोठे रॅकेट आहे का, याचा तपास सुरू आहे. दरम्यान, नागपूरच्या पथकाने कारवाई केल्याने स्थानिक वन विभागाच्या भूमिकेवरही प्रश्न उपस्थित होत आहेत. या तस्करीची माहिती स्थानिक यंत्रणेला होती का, आणि असल्यास यापूर्वी कारवाई का झाली नाही, याबाबतही आता चर्चा सुरू झाली आहे. दरम्यान, याबाबतची माहिती देवरीतील वन परिक्षेत्र अधिकारी सुभांगी मिश्रा यांनी दिली आहे.
हेही वाचा : ठाणे हादरलं! ठाकरे गटाचा नेता ठार; रात्री भररस्त्यात गोळ्या झाडून संपवलं
